Ahdan Temha |ܐܲܚܕܲܢܝ ܬܸܡܗܵܐ|ܐܚܕܢܝ ܬܡܗܐ

ܐܲܚܕܲܢܝ ܬܸܡܗܵܐ ܐܵܦ ܬܲܗܪܵܐ

ܕܲܥܒ݂ܝܼܕ݂ܵܐ ܠܡܵܪܝ ܝܵܘܣܸܦ ܚܢܵܢܝܼܫܘܿܥ ܡܝܼܛܪܵܦܘܿܠܹܝܛܵܐ ܕܐܵܬ݂ܘܿܪ̈ܵܝܹܐ ܕܙܲܒ݂ܢܲܢ. ܒܲܫܢܲܬ݂ ܐܨܟܚ ܠܡܵܪܲܢ.

ܒܩܵܠ؛ ܐܲܥܫܸܢܘ ܥܲܡܡܹ̈ܐ.

ܐ؛

ܐܲܚܕܲܢܝ ܬܸܡܗܵܐ ܐܵܦ ܬܲܗܪܵܐ؛ ܒܚܲܕ݂ܬ݂ܵܬ̣̈ܵܐ ܕܐܲܟ݂ܪܸܙ ܥܝܼܪܵܐ.

ܠܪ̈ܵܥܵܘܵܬ݂ܵܐ ܒܓ݁ܵܘ ܕܲܒ݂ܪܵܐ؛ ܥܲܠ ܝܲܠܕܹܗ ܕܲܒ݂ܪܵܐ ܒܘܼܟ݂ܪܵܐ.܀

ܒ؛

ܒܒܹܝܬ݂ܠܚܸܡ ܩܪܝܼܬ݂ܵܐ ܙܥܘܿܪܬܵܐ؛ ܝܵܘܡܵܢܵܐ ܗܘ̤ܵܬ݂ ܬܸܕ݂ܡܘܿܪܬܵܐ.

ܪ̈ܘܼܚܵܢܹܐ ܐܲܝܬ݁ܝܼܘ ܣܒܲܪܬ݂ܵܐ؛ ܘܲܫܠܵܡܵܐ ܥܲܠ ܥܵܡܲܪܬܵܐ.܀

ܓ؛

ܓܢܝܼܙ ܡ̣ܢ ܥܝܼܪܹ̈ܐ ܒܐܝܼܬ݂ܘܼܬܹܗ؛ ܝܵܘܡܵܢܵܐ ܓܠ̣ܵܐ ܟܲܣܝܘܼܬܹܗ.

ܘܐܲܪܟܸܢ ܪܵܘܡܵܐ ܕܪܲܒ݁ܘܼܬܹܗ؛ ܕܢܸܦܪܘܿܩ ܒܪ̈ܲܚܡܵܘܗܝ ܠܲܒ݂ܪܝܼܬܹܗ.܀

ܕ؛

ܕܵܡܟ݁ܝܼܢ ܗ݇ܘ̣ܵܘ ܪ̈ܵܥܵܘܵܬ݂ܵܐ؛ ܘܲܓ݁ܙܵܪ̈ܲܝܗܘܿܢ ܒܚܲܩܠܵܬ̣̈ܵܐ.

ܒܚܸܫܘܿܟ݂ܵܐ ܕܠܲܝܠܵܘܵܬ̣̈ܵܐ؛ ܚ̣ܙܵܘ ܢܘܼܗܪܵܐ ܕܠܲܝܬ݁ ܠܹܗ ܕܡܘܼܬ݂ܵܐ.܀

ܗ؛

ܗܵܝܕܹܝܢ ܐܸܬ݂ܚܙܝܼܘ ܪ̈ܘܼܚܵܢܹܐ؛ ܠܪ̈ܵܥܵܘܵܬ݂ܵܐ ܦܲܓ݁ܪ̈ܵܢܹܐ.

ܟܲܕ݂ ܦܵܪܚܝܼܢ ܗ݇ܘ̣ܵܘ ܒܲܥܢܵܢܹ̈ܐ؛ ܘܲܡܫܲܒ݁ܚܝܼܢ ܠܡܵܪܹܐ ܟܝܵܢܹ̈ܐ.܀

ܘ؛

ܘܥܲܠ ܐܲܪܥܵܐ ܐܲܟ݂ܪܸܙܘ ܫܠܵܡܵܐ؛ ܘܐܵܘܝܘܼܬ݂ܵܐ ܒܗܵܢܵܐ ܝܵܘܡܵܐ.

ܘܝܲܗ݇ܒ݂ܘ ܣܲܒ݂ܪܵܐ ܠܓܸܢܣܵܐ ܛܠܝܼܡܵܐ. ܕܢܸܬ݂ܚܲܪܲܪ ܡ̣ܢ ܛܵܠܘܿܡܵܐ.܀

ܙ؛

ܙܸܠܘ ܠܒܹܝܬ݂ܠܚܸܡ ܒܚܲܕ݂ܘܼܬ݂ܵܐ؛ ܦܩܲܕ݂ܘ ܥܝܼܪܹ̈ܐ ܠܪ̈ܵܥܵܘܵܬ݂ܵܐ.

ܘܗܵܕܹܐ ܐܝܼܬܹܝܗ̇ ܠܟ݂ܘܿܢ ܐܵܬ̤ܵܐ؛ ܥܘܼܠܵܐ ܟܪܝܼܟ݂ ܒܥܲܙܪܘܼܪ̈ܝܵܬ݂ܵܐ.܀

ܚ؛

ܚܲܝܠܵܘܵܬ̣̈ܵܐ ܪ̈ܘܼܚܵܢܹܐ؛ ܒܵܬܲܪ ܕܣܲܒܲܪܘ ܠܦܲܓ݁ܪ̈ܵܢܹܐ.

ܣܠܸܩ̣ܘ ܘܐܸܬ݂ܥܲܠܝܼܘ ܒܲܥܢܵܢܹ̈ܐ؛ ܘܐܸܬ݂ܓ݁ܢܸܙܘ ܡ̣ܢ ܚܙܵܬ݂ܵܐ ܕܥܲܝܢܹ̈ܐ.܀ 

ܛ؛

ܛܲܝܸܒ݂ܘ ܐܘܼܪܚܵܐ ܠܡܲܪܕܝܼܬ݂ܵܐ؛ ܪ̈ܵܥܵܘܵܬ݂ܵܐ ܒܵܗ̇ ܒܫܵܥܬ݂ܵܐ.

ܘܐܸܬ݂ܡܲܛܝܼܘ ܠܲܬ݂ܪܲܥ ܡܥܲܪܬ݂ܵܐ؛ ܘܲܣܓܸܕ݂ܘ ܠܲܒ݂ܪܵܐ ܕܲܒ݂ܬ݂ܘܼܠܬܵܐ.܀

ܝ؛

ܝܵܘܡܵܢܵܐ ܫܠܸܡܘ ܡܸܠܲܝ̈ܗܘܿܢ؛ ܘܐܸܫܬܲܪܲܪܘ ܓܸܠܝܵܢܲܝ̈ܗܘܿܢ.

ܕܲܢܒ݂ܝܼܹ̈ܐ ܕܐܸܬ݂ܢܲܒ݁ܝܼܘ ܠܗܘܿܢ؛ ܥܲܠ ܡܵܘܠܵܕܹܗ ܕܒܲܪ ܡܵܪܗܘܿܢ.܀

ܟ؛

ܟܪܝܼܟ݂ ܒܥܲܙܪܘܼܪܹ̈ܐ ܪܡ̤ܐ ܒܐܘܼܪܝܵܐ؛ ܘܲܡܙܝܼܥ ܠܐܲܪܥܵܐ ܘܠܲܫܡܲܝܵܐ.

ܕܟܲܕ݂ ܐܸܬ݂ܒ݁ܪܝܼܘ ܡ̣ܢ ܫܘܼܪܵܝܵܐ؛ ܒܐܝܼܕܹܗ ܐܸܬ݂ܵܘ ܠܲܗܘܵܝܵܐ.܀

ܠ؛

ܠܦܵܪܹܣ ܫܲܕܲܪ ܚܲܕ݂ ܟܵܘܟ݁ܒ݂ܵܐ؛ ܘܠܲܡܓ݁ܘܼܫܫܹ̈ܐ ܩ̣ܪܵܐ ܒܣܘܼܪܗܵܒ݂ܵܐ.

ܘܐܲܝܬ݁ܝܼܘ ܠܒ݂ܘܼܢ݇ܬܵܐ ܥܲܡ ܕܲܗܒ݂ܵܐ. ܘܡܘܼܪܵܐ ܘܩܲܪܸܒ݁ܘ ܠܒܲܪ ܛܵܒ݂ܵܐ.܀

ܡ؛

ܡ̣ܢ ܕܲܫܡܲܥ ܗܵܕܹܐ ܡܲܠܟܵܐ؛ ܗܹܪܘܿܕܸܣ ܡܠܸܐ ܟܠ ܬܘܼܟܵܐ.

ܐܸܬ݂ܒܲܠܗܝܼ ܘܲܢ̣ܣܲܒ݂ ܡܸܠܟܵܐ؛ ܡ̣ܢ ܪ̈ܲܒܲܝ ܟܵܗܢܹ̈ܐ ܘܫܲܪܟܵܐ.܀

ܢܢ؛

ܢܒ݂ܝܼܵܐ ܗܵܟܲܢܵܐ ܡܲܠܸܠ؛ ܦܲܢܝܼܘ ܟܵܗܢܹ̈ܐ ܠܗ̇ܘ ܕܫܲܐܸܠ.

ܕܡ̣ܢ ܒܹܝܬ݂ܠܚܸܡ ܢܸܦܘܿܩ ܒܚܹܝܠ؛ ܡܲܠܟܵܐ ܘܢܸܪܥܝܼܘܗܝ ܠܝܼܣܪܵܝܹܠ.܀

ܣ؛

ܣܲܪܗܸܒ݂ ܡܲܠܟܵܐ ܘܲܩ̣ܪܵܐ ܠܗܘܿܢ؛ ܠܲܡܓ݁ܘܼܫܹ̈ܐ ܘܝܼܠܸܦ ܡ̣ܢܗܘܿܢ.

ܕܡܵܢܵܐ ܗܝ̤ ܥܸܠܲܬ̤ ܡܹܐܬܲܝܬ݂ܗܘܿܢ؛ ܠܒܹܝܬ݂ ܠܚܸܡ ܫܲܕܲܪ ܐܸܢܘܿܢ.܀

ܥ؛

ܥܲܩܸܒ݂ܘ ܐܲܢ݇ܬ݁ܘܿܢ ܥܲܠ ܛܲܠܝܵܐ؛ ܐܸܡܲܪ ܠܗܘܿܢ ܗܹܪܘܿܕ ܕܵܘܝܵܐ.

ܘܬ݂ܵܘ ܠܘܵܬ݂ܝ ܘܚܵܘܵܘ ܠܝܼ ܒܟܸܣܝܵܐ؛ ܕܐܸܙܲܠ ܘܐܸܣܓ݁ܘܿܕ݂ ܠܹܗ ܒܓܸܠܝܵܐ.܀

ܦ؛

ܦܘܼܩܕܵܢܵܐ ܡ̣ܢ ܡܲܠܟܵܐ ܫܩܲܠ̣ܘ؛ ܘܲܠܒܹܝܬ݂ܠܚܸܡ ܚ̣ܙܲܩܘ ܐܸܙܲܠܘ.

ܘܲܠܒܲܝܬܵܐ ܒܚܲܕ݂ܘܼܬ݂ܵܐ ܥܲܠ̣ܘ؛ ܣܓܸܕ݂ܘ ܠܛܲܠܝܵܐ ܘܲܗܦܲܟ݂ܘ ܒܲܥܓܲܠ.܀

ܨ؛

ܨܸܒ݂ܝܵܢܹܗ ܥܲܒ݂ܕܹܗ ܐ݇ܢܵܫܵܐ؛ ܡܸܛܠ ܦܘܼܪܩܵܢ ܒܢܲܝ̈ܢܵܫܵܐ.

ܘܲܒ݂ܛܲܝܒ݁ܘܼܬܹܗ ܣܒܲܠ ܚܲܫܵܐ؛ ܕܲܢܫܵܘܙܸܒ݂ ܠܲܢ ܡ̣ܢ ܒܝܼܫܵܐ.܀

ܩ؛

ܩܵܠܲܝ̈ܢ ܢܸܗܘܘܿܢ ܚܲܕ݂ ܩܵܠܵܐ؛ ܘܲܢܫܲܒܲܚ ܒܟ݂ܠ ܗܘܼܠܵܠܵܐ؛

ܠܗ̇ܘ ܕܐܲܩܢܝܼ ܠܓܸܢܣܲܢ ܚܲܝܠܵܐ؛ ܕܢܸܙܟܸܐ ܠܒ݂ܝܼܫܵܐ ܢܵܟ݂ܘܿܠܵܐ.܀

ܪ؛

ܪܵܘܡܵܐ ܢܸܪܥܲܡ ܒܚܲܕ݂ܘܼܬ݂ܵܐ؛ ܘܐܲܪܥܵܐ ܬܸܠܒܲܫ ܦܨܝܼܚܘܼܬ݂ܵܐ.

ܘܥܲܡ ܡܓ݁ܘܼܫܹ̈ܐ ܘܪ̈ܵܥܵܘܵܬ݂ܵܐ؛ ܢܸܦܪܘܿܥ ܟܠܲܢ ܬܵܘܕܝܼܬ݂ܵܐ.܀

ܫ؛

ܫܘܼܒ݂ܚܵܐ ܠܗ̇ܘ ܕܝܲܗ݇ܒ݂ܠܲܢ ܦܲܓ݁ܪܹܗ؛ ܘܐܲܫܝܼܓ݁ ܟܘܼܬ̈ܡܵܬܲܢ ܒܲܕ݂ܡܹܗ.

ܟܠܲܢ ܐܲܟ݂ܚܲܕ݂ ܢܲܣܸܩ ܠܹܗ؛ ܬܸܫܒ݁ܘܿܚܬܵܐ ܒܝܘܿܡ ܡܵܘܠܵܕܹܗ.܀

ܬ؛

ܬܵܘܕܝܼܬ݂ܵܐ ܢܲܣܸܩ ܘܫܘܼܒ݂ܚܵܐ؛ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ.

ܘܪ̈ܲܚܡܵܘܗܝ ܢܸܗܘܘܿܢ ܒܫܘܼܪܬܵܚܵܐ ܥܲܠ ܟܠܲܗܘܿܢ ܒܢܲܝ̈ ܕܲܚܝܼܚܵܐ.܀

ܬ؛

ܬܸܫܒ݁ܘܿܚܬܵܐ ܕܠܵܐ ܦܘܼܣܩܵܢܵܐ؛ ܠܒ݂ܵܪܘܿܝܵܐ ܘܲܡܚܲܕ݂ܬ݂ܵܢܵܐ ܘܲܠܬܲܚܘܿܒ݂ܵܐ ܡܪܲܟ݁ܒ݂ܵܢܵܐ.

ܓܲܠܝܘܼܬ݂ ܐܲܦܹ̈ܐ ܒܹܝܬ݂ ܕܝܼܢܵܐ.܀