Am Kolhon Qandishayk|ܥܲܡ ܟܠܗܘܿܢ ܩܲܕܝܼܫܲܝ̈ܟ|ܥܡ ܟܠܗܘܢ ܩܕܝܫܝܟ

ܥܘܿܢܝܼܬ݂ܵܐ ܕܓܲܒ݂ܪܹܐ. ܪܹܫ ܩܵܠܵܐ.

ܚܲܕܵܐ ܢܲܦܫܹܗ ܕܥܲܒ݂ܕܵܟ. ܥܲܡ ܟܠܗܘܿܢ ܩܲܕܝܼܫܲܝ̈ܟ: ܐܲܢܝܼܚ ܡܲܠܟܵܐ ܡܫܝܼܚܵܐ: ܠܪܘܼܚܹܗ ܕܥܲܒ݂ܕܵܟ ܒܲܫܠܵܡܵܐ. ܐܲܝܟܵܐ ܕܠܵܐ ܡܲܡܠܸـܟ ܚܲܫܵܐ: ܘܠܵܐ ܥܵܩܬ݂ܵܐ ܘܠܵܐ ܟܲܪܝܘܼܬ݂ܵܐ: ܐܸܠܵܐ ܚܲܝܹ̈ܐ ܡܠܝܼܟܹ̈ܐ ܕܲܠܥܵܠܲܡ܀

ܪܲܒ݁ܘܼ ܡܵܪܲܢ ܘܲܡܫܲܒܲܚ ܪܵܘܪܒ݂ܵܐܝܼܬ݂. ܥܲܠ ܐܲܠܵܗܵܐ ܗ݇ܘ̣ ܬܘܼܟ݂ܠܵܢܲܢ: ܓܵܒ݂ܘܿܠܹܗ ܕܐܲܒ݂ܘܼܢ ܐܵܕ݂ܵܡ: ܣܲܒ݂ܪܵܐ ܕܡܵܘܬܲܢ ܘܲܕ݂ܚܲܝܲܝ̈ܢ. ܠܵܐ ܥܵܠܡܵܐ ܡܸܕܸ݁ܡ ܐܝܼܬ݂ܵܘܗܝ: ܘܠܵܐ ܢܝܵܚܵܘܗ̈ܝ ܡܸܕܸ݁ܡ ܐܸܢܘܿܢ: ܐܸܠܵܐ ܢܲܚܸܡ ܘܐܲܚܵܢ ܒܛܲܝܒ݁ܘܼܬ݂ܵܟ܀

ܕܵܪܵܐ ܠܕ݂ܵܪܵܐ ܢܸܫܬܲܥܘܿܢ ܥܒ݂ܵܕܲܝ̈ـܟ. ܡ̣ܢ ܟܠܗܹܝܢ ܒܸܪ̈ܝܵܬ݂ܵܐ: ܐܵܘܪܸܒ݂ ܛܵܒ݂ܵܐ ܒܚܘܼܒܹ݁ܗ: ܠܨܲܠܡܵܐ ܕܨܵܪܲܬ݀ ܛܲܝܒ݁ܘܼܬܹܗ. ܕܡܵܘܬܵܐ ܚܲܒܸ݁ܠ ܗܲܕܵܡܵܘܗ̈ܝ: ܡܠܲـܟ ܠܹܗ ܚܲܝܹ̈ܐ ܘܢܘܼܚܵܡܵܐ: ܠܓܸܢܣܹܗ ܕܐܵܕ݂ܵܡ ܕܲܒ݂ܠܝܼ ܒܲܚܒ݂ܵܠܵܐ܀

ܬܸܫܒ݁ܚܵܬܹ̈ܗ ܕܡܵܪܝܵܐ ܐܹܡܲܠܸܠ ܒܦܘܼܡܝ. ܦܸܪܫܲܬ݀ ܠܵܗ̇ ܡ̣ܢ ܦܲܓ݂ܪܵܐ: ܢܲܦ̮ܫܵܐ ܒܝܲܕ݂ ܦܘܼܩܕܵܢܵـܟ: ܕܬܸܬ݂ܥܲܠܸܐ ܠܐܵܘܨܲܪ ܚܲܝܹ̈ܐ. ܐܲܝܟܵܐ ܕܟ݂ܠܗܘܿܢ ܩܲܕܝܼܫܲܝ̈ـܟ: ܡܣܲܟܹ݁ܝܢ ܠܹܗ ܠܝܵܘܡܵܟ ܪܲܒܵܐ: ܕܢܸܠܒ݁ܫܘܼܢ ܫܘܼܒ݂ܚܵܐ ܘܢܸܦܪ̱ܥܘܼܢ ܬܵܘܕܝܼܬ݂ܵܐ܀

ܡܗܲܝܡܲܢܘܼ ܡܵܪܝܵܐ ܒܡܸܠܵܘ̈ܗܝ. ܠܵܐ ܬܸܟ݂ܪܸܐ ܠܵܟ ܥܲܠ ܕܲܫܟܸܒ݂ܬ݁: ܕܢܘܼܚܵܡܵܐ ܥܬ݂ܝܼܕ ܕܲܢܥܝܼܪܵܟ: ܐܲܝܟ݂ ܕܐܸܫܬܵܘܕܝܼ ܦܵܪܘܿܩܲܢ. ܕܟ݂ܠ ܐܲܝܢܵܐ ܕܲܡܗܲܝܡܸܢ ܒܝܼ: ܐܝܼܬ݂ ܠܹܗ ܚܲܬ݂ܵܐ ܕܲܠܥܵܠܲܡ: ܘܐܸܢܵܐ ܐܲܩܝܼܡܝܼܘܗܝ ܒܝܵܘܡܵܐ ܕܢܘܼܚܵܡܵܐ܀

ܗܸܢܘܿܢ ܥܵܒ݂ܪܝܼܢ ܘܐܲܢ݇ܬ݁ ܩܲܝܵܡ ܐܲܢ݇ܬ݁. ܥܵܠܡܵܐ ܗܵܢܵܐ ܥܵܒܲܪ ܠܹܗ: ܘܲܪ̈ܓ݂ܝܼܓ݂ܵܬܹܗ ܡܸܫܬܲܪ̈ܝܵܢ: ܘܠܵܐ ܡܩܵܘܸܐ ܡܸܕܸ݁ܡ ܠܲܓ݂ܡܵܪ. ܐܸܠܵܐ ܫܪܵܪܵܐ ܘܟܹܐܢܘܼܬ݂ܵܐ: ܘܚܲܝܹܐ ܕܲܡܠܲـܟ ܦܵܪܘܿܩܲܢ: ܠܐܲܝܠܹܝܢ ܕܪܲܚܡܘܼܗܝ ܘܲܢܛܲܪܘ ܦܘܼܩܕܵܢܵܘ̈ܗܝ܀

ܐܲܠܵܗܵܐ ܫܡܲܥܢܲܢ ܒܐܸܕ݂ܢܲܝ̈ܢ. ܫܡܲܥܢܲܢ ܡܵܪܲܢ ܕܟܹܐܢܘܼܬܲܟ: ܒܘܼܣܵܡܵܐ ܠܟܹܐܢܹ̈ܐ ܛܲܝܒܲܬ݀: ܘܲܠܥܵܘܵܠܹ̈ܐ ܫܘܼܢܵܩܵـܐ. ܠܥܲܢܝܼܕܲܝ̈ܢ ܕܲܠܘܵܐ ܐܸܢܘܿܢ: ܒܡܵܘܬ݁ܗܘܿܢ ܩܸܢܛܵܐ ܕܒ݂ܘܼܨܵܪܹܐ: ܣܘܿܓ݂ܐܵܐ ܕܪܲܚܡܲܝܟ ܢܩܘܼܡ ܡܵܪܝ ܒܐܲܦܲܝ̈ܗܘܿܢ܀

ܚܸܟ݂ܡ̱ܬ݂ܵܐ ܪܵܢܹܐ ܦܘܼܡܹܗ ܕܙܲܕܝܼܩܵܐ. ܦܵܘܠܘܿܣ ܛܘܼܒ݂ܵܢܵܐ ܩܵܥܹܐ: ܕܲܥܬ݂ܝܼܕ݂ ܗ݇ܘ̣ ܗܵܢܵܐ ܕܡܵܐܹܬ݂: ܕܢܸܠܒܲܫ ܠܵܐ ܡܵܝܘܿܬ݂ܘܼܬ݂ܵܐ. ܘܐܵܦ ܗܵܢܵܐ ܡܸܬ݂ܚܲܒ݁ܠܵܢܵܐ: ܕܢܸܫܬܲܚܠܲܦ ܠܲܕ݂ܠܵܐ ܚܒ݂ܵܠܵܐ: ܚܲܝܠܵܐ ܕܓܲܒ݂ܠܹܗ ܢܚܲܕܸ݁ܬ݂ ܨܘܼܪܵܬܹܗ܀

ܦܵܪܹܣ ܓܸܦܵܘ̈ܗܝ ܘܲܡܩܲܒܸ݁ܠ ܠܗܘܿܢ. ܥܲܡ ܟܸܢܫܹܵܐ ܫܡܲܝܵـܢܹ̈ܐ: ܦܵܪܚܝܼܢ ܟܹܐܢܹ̈ܐ: ܒܪܵܘܡܵܐ ܠܐܘܼܪܥܹܗ ܕܡܵܪܲܢ ܡܵܐ ܕܐܵܬܹ݁ܐ. ܘܥܵܐܠܝܼܢ ܥܲܡܹܗ ܠܲܓ݂ܢܘܿܢܵܐ: ܕܲܢܩܲܒ݁ܠܘܼܢ ܡܘܼܠܟܵܢܲܝ̈ܗܘܿܢ: ܒܐܲܬ݂ܪܵܐ ܕܚܲܝܹ̈ܐ ܕܥܸܠܵܝ ܡ̣ܢ ܩܸܢܛܵܐ܀

ܝܲܗ݇ܒ݂ܘ ܡܹܐܟ݂ܘܼܠܬ݁ܝ ܡܪܵܪܹ̈. ܐܝܼܠܵܢܵܐ ܕܲܒ݂ܦܲܪܕܲܝܣܵܐ: ܡܵܘܬܵܐ ܝܲܗ݇ܒ݂ ܗ݇ܘ̣ܵܐ ܠܐܵܕ݂ܵܡ: ܒܝܲܕ ܡܹܐܟ݂ܘܼܠܬܵܐ ܕܡ̣ܢ ܦܹܐܪܵܐ. ܨܠܝܼܒ݂ܵܐ ܕܲܒ݂ܪܹܫ ܓܵܓ݂ܘܼܠܬܵܐ: ܐܲܪܕܝܼ ܚܲܝܹ̈ܐ ܘܢܘܼܚܵܡܵܐ: ܠܓܸܢܣܹܗ ܕܐܵܕ݂ܵܡ ܕܲܒ݂ܠܝܼ ܒܲܚܒ݂ܵܠܵܐ܀