Ashen Amme Zmaraykon|ܐܲܥܫܸܢܘ ܥܲܡܡܹ̈ܐ ܙܡܵܪ̈ܲܝܟ݁ܘܿܢ|ܐܥܫܢܘ ܥܡܡܐ ܙܡܪܝܟܘܢ

ܐܲܥܫܸܢܘ ܥܲܡܡܹ̈ܐ ܙܡܵܪ̈ܲܝܟ݁ܘܿܢ

ܐܲܙܥܹܩܝ ܥܹܕܬܵܐ. 

ܐ: ܐܲܥܫܸܢܘ ܥܲܡܡܹ̈ܐ ܙܡܵܪ̈ܲܝܟ݁ܘܿܢ؛ ܘܚܘܼܨܘ ܡ̣ܢܹ̈ܐ ܕܩܝܼܬ݂ܵܪ̈ܲܝܟ݁ܘܿܢ. ܘܝܲܒܸ݁ܒ݂ܘ ܒܩܵܠ ܫܝܼܦܘܿܪ̈ܲܝܟ݁ܘܿܢ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܒ: ܒܗܵܢ ܠܸܠܝܵܐ ܗܘ̤ܵܐ ܐܝܼܡܵܡܵܐ؛ ܐܝܼܡܵܡܵܐ ܕܠܵܐ ܗܘ̤ܵܐ ܒܥܵܠܡܵܐ. ܐܲܟ݂ܘܵܬܹܗ ܐ݇ܚܪܹܢܵܐ ܝܵܘܡܵܐ؛ ܕܩܵܡܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܓ: ܓܘܼܕ̈ܝܼܢ ܓܘܼܕ̈ܝܼܢ ܐܵܬܹܝܢ ܗ݇ܘ̣ܵܘ؛ ܘܲܒ݂ܚܲܕ݂ ܩܵܠܵܐ ܙܵܡܪܝܼܢ ܗ݇ܘ̣ܵܘ. ܥܝܼܪܹ̈ܐ ܘܡܝܼܬܹ̈ܐ ܕܩܵܝܡܝܼܢ ܗ݇ܘ̣ܵܘ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܕ: ܕܢܲܚ̣ ܫܸܡܫܵܐ ܕܙܲܕܝܼܩܘܼܬ݂ܵܐ؛ ܒܐܲܬ݂ܪܵܐ ܡܠܸܐ ܚܸܫܘܿܟ݂ܘܿܬ݂ܵܐ. ܘܥܸܫܢܲܬ݂ ܒܹܗ ܢܲܗܝܼܪܘܼܬ݂ܵܐ؛ ܕܩܵܡܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܗ: ܗܘ̤ܵܐ ܠܸܠܝܵܐ ܒܗ̇ܘ ܐܝܼܡܵܡܵܐ؛ ܕܚܵܫ̣ ܒܹܗ ܦܵܪܘܿܩܹܗ ܕܥܵܠܡܵܐ. ܘܲܒ݂ܗܵܢ ܠܸܠܝܵܐ ܐܝܼܡܵܡܵܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܘ: ܘܲܠܦܲܪܕܲܝܣܵܐ ܕܵܡܹܐ ܗ݇ܘ̣ܵܐ؛ ܩܲܒ݂ܪܵܐ ܕܡܵܪܲܢ ܒܹܗ ܓܢܸܐ ܗ݇ܘ̣ܵܐ. ܘܛܵܒ݂ ܡ̣ܢ ܦܲܪܕܲܝܣܵܐ ܦܐܹܐ ܗ݇ܘ̣ܵܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܙ: ܙܵܘܥܵܐ ܢܦܲܠ ܥܲܠ ܢܵܛܘܿܪܹ̈ܐ؛ ܘܲܗܘ̤ܵܘ ܐܲܝܟ݂ ܡܝܼܬܹ̈ܐ ܩܒ݂ܝܼܪܹ̈ܐ. ܕܲܫܡܲܥܘ ܩܵܠ ܡܝܼܬܹ̈ܐ ܘܥܝܼܪܹ̈ܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܚ: ܚܲܕ݂ܘܼܬ݂ܵܐ ܒܹܝܬ݂ ܬܲܠܡܝܼܕܹ̈ܐ؛ ܦܨܝܼܚܘܼܬ݂ܵܐ ܒܹܝܬ݂ ܥܲܢܝܼܕܹ̈ܐ. ܘܐܲܝܠܸܠܘ ܝܗ݇ܘܼܕ݂ܵܝܹ̈ܐ ܘܫܹܐܕܹ̈ܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܛ: ܛܸܒ݁ܝܼ̈ܢ ܛܸܒ݁ܝܼ̈ܢ ܐܵܬܹܝܢ ܗ݇ܘ̣ܵܘ. ܫܲܪ̈ܒ݁ܝܼܢ ܫܲܪ̈ܒ݁ܝܼܢ ܢܵܦ̇ܩܝܼܢ ܗ݇ܘ̣ܵܘ. ܚܲܝܠܝܼ̈ܢ ܚܲܝܠܝܼ̈ܢ ܙܵܥ̇ܩܝܼܢ ܗ݇ܘ̣ܵܘ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܝ: ܒܸ݁ܒ݂ܘ ܥܝܼܪܹ̈ܐ ܒܪ̈ܵܘܡܲܝܗܘܿܢ؛ ܗܲܠܸܠܘ ܩܒ݂ܝܼܪܹ̈ܐ ܒܥܘܼܡܩܲܝ̈ܗܘܿܢ. ܘܚܲܕ݂ ܩܵܠܵܐ ܗܘ̤ܵܘ ܩܵܠܲܝ̈ܗܘܿܢ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܟܟ: ܟܸܢܫ̈ܝܼܢ ܟܸܢܫ̈ܝܼܢ ܟܸܢܫܝܼܢ ܗ݇ܘ̣ܵܘ؛ ܣܸܕ݂ܪ̈ܝܼܢ ܣܸܕ݂ܪ̈ܝܼܢ ܣܵܕ݂ܪܝܼܢ ܗ݇ܘ̣ܵܘ. ܪ̈ܲܥܡܝܼܢ ܪ̈ܲܥܡܝܼܢ ܪܵܥܡܝܼܢ ܗ݇ܘ̣ܵܘ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܠ: ܠܵܐ ܦܵܫ̣ ܒܢܸܩܥܹ̈ܐ ܫܝܘܿܠܵܝܹ̈ܐ؛ ܘܠܵܐ ܡܸܕ݂ܝܵܪܹ̈ܐ ܥܸܠܵܝܹ̈ܐ. ܕܠܵܐ ܩ̣ܢܵܘ ܚܘܼܕܵܬ݂ܵܐ ܘܚܲܝܹ̈ܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܡ: ܡܲܪܝܲܡ ܒܵܬܲܪ ܪ̈ܘܼܚܵܢܹܐ؛ ܚܙܵܬܹܗ ܠܣܲܒ݂ܪܵܐ ܕܦܲܓ݁ܪ̈ܵܢܹܐ. ܘܣܲܒ݁ܪܲܬ̤ ܥܠܵܘܗܝ ܠܲܡܬܲܠܡܕ݂ܵܢܹ̈ܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܢܢ: ܢܵܛܘܿܪܹ̈ܐ ܥܲܠ̣ܘ ܠܲܡܕ݂ܝܼܢ݇ܬܵܐ؛ ܘܐܲܟ݂ܪܸܙܘ ܒܲܟ݂ܢܘܼܫܬܵܐ ܠܝܼܛܬܵܐ. ܕܲܫܡܲܥܢܲܢ ܫܡܘܼܥܬܵܐ ܕܚܝܼܠܬܵܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܣ: ܣܸܕ݂ܪܹ̈ܐ ܕܢܘܼܪ̈ܵܢܹܐ ܣܕ݂ܝܼܪܝܼܢ؛ ܥܲܠ ܩܲܒ݂ܪܹ̈ܐ ܘܩܵܥܹܝܢ ܘܐܵܡܪܝܼܢ. ܒܩܵܠܹ̈ܐ ܕܚܝܼܠܹ̈ܐ ܕܬܲܗܝܼܪܝܼܢ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܥ: ܥܛܝܼܦܝܼܢ ܢܘܼܗܪܵܐ ܩܢܘܿܡܲܝ̈ܗܘܿܢ؛ ܘܐܲܝܟ݂ ܒܲܪ̈ܩܹܐ ܦܲܪ̈ܨܘܿܦܲܝܗܘܿܢ. ܘܝܼܠܸܦܢܲܢ ܡ̣ܢ ܩܵܠܲܝ̈ܗܘܿܢ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܦ: ܦܲܢܝܼܘ ܗܸܢܘܿܢ ܨܹܝܕ݂ ܡܲܪܝܲܡ؛ ܠܚܲܝܵܐ ܒܲܥܝܲܬ݁ܝ ܕܡܝܼܬ݂ܠܹܗ ܘܩܵܡ̣. ܙܹܠܝ ܣܲܒܲܪܝ ܕܗܵܐ ܐܸܬ݂ܢܲܚܲܡ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܨ: ܨܹܝܼܕ݂ ܫܸܡܥܘܿܢ ܪܹܫ ܫܠܝܼܚܘܼܬ݂ܵܐ؛ ܡܛܵܬ̤ ܡܲܪܝܲܡ ܡܣܲܒ݁ܪܵܢܝܼܬ݂ܵܐ. ܟܲܕ݂ ܐܵܡܪܵܐ ܠܹܗ ܒܚܲܕܘܼܬ݂ܵܐ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܩ: ܩܵܡ̣ ܫܸܡܥܘܿܢ ܪܗܸܛ ܠܲܩܒ݂ܘܼܪܬܵܐ؛ ܘܲܚ̣ܙܵܐ ܬܲܡܵܢ ܬܸܕܡܘܿܪܬܵܐ. ܘܲܗܦܲܟ݂ ܘܣܲܒܲܪ ܥܲܠ ܩܝܵܡܬܵܐ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܪ: ܪܵܚܹܡܢܵܫܵܐ ܘܦܵܪܘܿܩܵܐ؛ ܐܸܬ݂ܓ݁ܠܝܼ ܠܩܲܠܝܘܼܦܵܐ ܘܠܘܼܩܵܐ. ܘܣܲܒܲܪܘ ܥܠܵܘܗܝ ܠܟܸܢܫܵܐ ܫܚܝܼܩܵܐ؛ ܘܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܫ: ܫܠܝܼܚܹ̈ܐ ܥܸܣܪܵܐ ܟܲܕ݂ ܟܢܝܼܫܝܼܢ؛ ܒܥܸܠܝܼܬ݂ܵܐ ܘܛܵܒ݂ ܚܲܫܝܼܫܝܼܢ. ܥܲܠ ܥܠܲܝܗܘܿܢ ܘܦܵܫ̣ܘ ܬܲܡܝܼܗܝܼܢ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܬ: ܬܲܪ̈ܥܹܐ ܛܦܹܝܢ ܗ݇ܘ̣ܵܘ ܒܐܲܦܲܝ̈ܗܘܿܢ؛ ܘܡ̣ܢ ܫܸܠܝܵܐ ܩܵܡ̣ ܒܲܝܢܵܬ݂ܗܘܿܢ ܫ̣ܪܵܐ ܙܵܘܥܗܘܿܢ ܘܫܲܪܲܪ ܐܸܢܘܼܢ؛ ܕܩܵܡ̣ ܠܹܗ ܡܵܪܲܢ ܫܘܼܒ݂ܚܵܐ ܠܹܗ.܀

ܬ: ܬܵܐ ܡܢܲܚܡܵܢܵܐ ܕܐ݇ܢܵܫܘܼܬ݂ܵܐ؛ ܨܹܝܕ݂ ܫܵܡܘܿܥܹ̈ܐ ܕܣܘܿܓ݁ܝܼܬ݂ܵܐ. ܘܦܘܿܚ ܒܗܘܿܢ ܪܹܝܚܵܐ ܕܚܲܝܘܼܬ݂ܵܐ؛ ܕܢܲܣܩܘܼܢ ܠܵܟ݂ ܫܘܼܒ݂ܚܵܐ ܘܣܸܓ݁ܕ݂ܬ݂ܵܐ.܀