Azeq edta b'oshane|ܐܲܙܥܸܩܝ ܥܹܕܬܵܐ ܒܐܘܿܫܲܥܢܹ̈ܐ|ܐܙܥܩܝ ܥܕܬܐ ܒܐܘܫܥܢܐ

ܐܲܙܥܸܩܝ ܥܹܕܬܵܐ ܒܐܘܿܫܲܥܢܹ̈ܐ

ܪܹܫ ܩܵܠܵܐ.

ܐ: ܐܲܙܥܸܩܝ ܥܹܕܬܵܐ ܒܐܘܿܫܲܥܢܹ̈ܐ؛ ܩܕ݂ܵܡ ܡܵܪܵܐ ܕܲܫܡܲܝܵܢܹ̈ܐ.ܥܲܡ ܛܠܵܝܘܿܢܹ̈ܐ ܘܫܲܒ݂ܪ̈ܘܿܢܹܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܒ: ܒܲܣܝܼܡܝܼܢ ܗ݇ܘ̣ܵܘ ܩܵܠܲܝܗ̈ܘܿܢ؛ ܘܲܚܠܹܝܢ ܗܘ̣ܵܘ ܗܘܼܠܵܠܲܝܗ̈ܘܿܢ.ܟܲܕ݂ ܙܵܡܪܝܼܢ ܗ݇ܘ̣ܵܘ ܒܦܘܼܡܲܝܗ̈ܘܿܢ؛ ܐܘܼܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܓ: ܓܘܼܕܲܝ̈ܗܘܿܢ ܐܲܬ݂ܗܲܪܘ ܐܸܢܘܿܢ؛ ܠܐܲܒ݂ܵܗܹ̈ܐ ܒܦܸܬ݂ܓ݁ܵܡܲܝ̈ܗܘܿܢ. ܒܠܸܥܙܹ̈ܐ ܕܠܸܫܵܢܘܿܢܲܝ̈ܗܘܿܢ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܕ: ܕܘܼܡܵܪܵܐ ܐܸܚܲܕ݂ ܐܸܢܘܿܢ؛ ܠܐܲܒ݂ܵܗܹ̈ܐ ܒܫܲܒ݂ܪ̈ܘܿܢܲܝܗܘܿܢ؛ ܒܕܲܫܡܲܥܘ ܫܸܡܥܵܐ ܕܠܵܐ ܫܡܝܼܥܠܗܘܿܢ. ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܗ: ܗܵܕܹܐ ܒܲܠܚܘܿܕ݂ ܗܘ̤ܵܬ݂ ܙܡܝܼܪܬ݁ܗܘܿܢ؛ ܘܗܵܕܹܐ ܒܲܠܚܘܿܕ݂ ܗܘ̤ܵܬ݂ ܩܝܼܢܬ݁ܗܘܿܢ. ܘܗܵܢܵܐ ܗܘ̤ܵܐ ܬܘܼܪܓܵܡܘܿܢܗܘܿܢ؛ ܐܘܿܫܲܥ. ܠܵܟ݂ ܒܲܡ.܀

ܘ: ܘܲܢܚܸܬ݂ܘ ܥܝܼܪܹ̈ܐ ܒܣܸܕ݂ܪ̈ܲܝܗܘܿܢ؛ ܘܪ̈ܘܼܚܵܢܵܝܹܐ ܒܟܸܢܫܲܝ̈ܗܘܿܢ. ܘܲܠܥܸܙܘ ܥܲܡ ܠܸܥܙܘܿܢܲܝ̈ܗܘܿܢ؛ ܐܘܼܫܲܥܢܵܐ ܠܲܟ݂ ܒܲܡܪ̈ܵܘܡܹܐ.܀

ܙ: ܙܵܥ̣ܘ ܣܵܦܪܹ̈ܐ ܒܲܙܡܵܪ̈ܲܝܗܘܿܢ؛ ܘܲܦܪ̈ܝܼܫܹܐ ܒܙܘܼܡܵܪ̈ܲܝܗܘܿܢ. ܘܟ݂ܵܗܢܹ̈ܐ ܬܘܼܒ݂ ܒܗܘܼܠܵܠܲܝ̈ܗܘܿܢ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܚ: ܚܲܕ݂ ܗ݇ܘ̣ܵܐ ܙܡܵܪܵܐ ܕܡܸܙܕܡܲܪ ܗ݇ܘ̣ܵܐ؛ ܘܙܘܼܡܵܪܵܐ ܕܡܸܙܕܲܡܪ ܗ݇ܘ̣ܵܐ. ܘܡܵܪܵܐ ܕܒܹܗ ܡܸܫܬܲܒܲܚ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܛ: ܛܘܼܪܵܐ ܕܙܲܝܬܹ̈ܐ ܐܸܫܬ݁ܓܸܫ ܗ݇ܘ̣ܵܐ؛ ܟܲܕ݂ ܡܵܪܲܢ ܒܹܗ ܥܵܒܲܪ ܗ݇ܘ̣ܵܐ. ܘܟܸܢܫܵܐ ܩܕ݂ܵܡܵܘܗܝ ܩܵܥܹ̇ܐ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܝ: ܝܘܼܒܵܒ݂ ܫܲܒ݂ܪܹ̈ܐ ܣܵܓܹܐ ܗ݇ܘ̣ܵܐ؛ ܘܲܚܣܵܡ ܦܪ̈ܝܼܫܹܐ ܥܵܫܹܢ ܗ݇ܘ̣ܵܐ. ܒܩܵܠ ܛܠܵܝܘܿܢܹ̈ܐ ܕܪܵܥܹܡ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܟ: ܟܸܢܫܵܐ ܒܟܸܢܫܵܐ ܦܵܓܲܥ ܗ݇ܘ̣ܵܐ؛ ܘܣܸܕ݂ܪܵܐ ܠܚܲܒ݂ܪܹܗ ܐܵܪܲܥ ܗ݇ܘ̣ܵܐ. ܘܟ݂ܠܢܵܫ ܒܚܲܝܠܹܗ ܡܲܙܥܸܩ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܠ: ܠܲܝܬ݁ ܫܲܒ݂ܪܘܿܢܵܐ ܕܲܫܠܸܐ ܗ݇ܘ̣ܵܐ؛ ܘܠܵܐ ܥܘܼܠܘܿܢܵܐ ܕܫܲܬ݁ܝܼܩ ܗ݇ܘ̣ܵܐ. ܘܠܵܐ ܦܘܼܡܘܿܢܵܐ ܕܠܵܐ ܪܥܸܡ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܡ: ܡܘܼܫܹܐ ܗܵܕܹܐ ܠܵܐ ܟܬܲܒ݂ ܗ݇ܘ̣ܵܐ؛ ܘܕܵܘܝܼܕ݂ ܗܵܕܹܐ ܠܵܐ ܙܡܲܪ ܗ݇ܘ̣ܵܐ. ܐܲܝܟ݂ ܕܫܲܒ݂ܪܘܿܢܵܐ ܙܵܡܲܪ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܢܢ: ܢܒ݂ܝܼܵܐ ܠܵܐ ܐܸܬ݂ܢܲܒܝܼ ܗ݇ܘ̣ܵܐ؛ ܘܣܵܦܪܵܐ ܒܣܸܦܪܹܗ ܠܵܐ ܪܫܲܡ ܗ݇ܘ̣ܵܐ. ܠܸܥܙܵܐ ܕܝܵܘܡܵܢ ܐܸܫܬ݁ܡܲܥ ܗ݇ܘ̣ܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܣ: ܣܵܦܪܹ̈ܐ ܕܥܵܘܠܵܐ ܟܡܝܼܪܝܼܢ ܗ݇ܘ̣ܵܘ؛ ܒܲܒ݂ܢܲܝ̈ܗܘܿܢ ܕܡܲܙܥܩܝܼܢ ܗ݇ܘ̣ܵܘ. ܒܚܲܕ݂ ܨܸܒ݂ܝܵܢܵܐ ܘܐܵܡܪܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ݂ ܒܲܡ.܀

ܥ: ܥܝܼܠܵܐ ܫܝܼܛܵܐ ܚܵܙܹܝܢ ܗ݇ܘ̣ܵܘ؛ ܓܵܚܟ݁ܝܼܢ ܗ݇ܘ̣ܵܘ ܘܠܵܐ ܒܵܗܬ݁ܝܼܢ ܗ݇ܘ̣ܵܘ. ܒܲܛܠܵܝܹ̈ܐ ܕܡܲܙܥܩܝܼܢ ܗ݇ܘ̣ܵܘ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܦ: ܦܲܪ̈ܵܫܹܐ ܐܸܬ݂ܪܲܓܲܠܘ ܗ݇ܘ̣ܵܘ؛ ܘܪ̈ܲܟܵܒܹܐ ܐܸܬ݂ܥܲܪܓܲܠܘ ܗ݇ܘ̣ܵܘ. ܘܠܲܪܟ݂ܝܼܒ݂ ܥܝܼܠܵܐ ܡܒܲܪܟ݂ܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܨ: ܨܲܝܵܕܹ̈ܐ ܕܲܦܫܝܼܛܝܼܢ ܗ݇ܘ̣ܵܘ؛ ܘܝܲܠܘܼܕܹ̈ܐ ܕܲܒ݂ܪܝܼܪܝܼܢ ܗ݇ܘ̣ܵܘ. ܒܚܲܕ݂ ܠܸܫܵܢܵܐ ܩܵܥ̇ܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܩ: ܩܕ݂ܵܡܵܘܗܝ ܕܡܵܪܲܢ ܦܵܪܣܝܼܢ ܗ݇ܘ̣ܵܘ؛ ܡܵܐܢܲܝ̈ܗܘܿܢ ܟܲܕ݂ ܛܥܝܼܢܝܼܢ ܗ݇ܘ̣ܵܘ. ܣܵܘܟܵܬ̣̈ܵܐ ܘܲܡܗܲܠܠܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ݂ ܒܲܡܪ̈ܘܡܹܐ.܀

ܪ: ܪ̈ܘܼܚܵܢܵܝܹܐ ܛܵܝܣܝܼܢ ܗ݇ܘ̣ܵܘ؛ ܘܦܲܪ̈ܣܵܘܗܝ ܕܥܝܼܠܵܐ ܡܢܲܫܩܝܼܢ ܗ݇ܘ̣ܵܘ. ܘܲܒ݂ܫܵܘܝܘܼ ܬܘܼܒ݂ ܩܵܥܹ̇ܝܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ݂ ܒܲܡܪ̈.܀ܫ؛ܫܡܲܝܵܢܹ̈ܐ ܠܵܐ ܪܓ݁ܝܼܫܝܼܢ ܗ݇ܘ̣ܵܘ؛ ܒܝܲܠܘܼܕܹ̈ܐ ܕܲܒ݂ܪܝܼܪܝܼܢ ܗ݇ܘ̣ܵܘ. ܒܚܲܕ݂ ܦܘܼܩܕܵܢܵܐ ܙܵܡܪܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ ܒܲܡܪ̈ܵܘܡܹܐ.܀

ܬ: ܬܲܚܬܵܝܹ̈ܐ ܠܵܐ ܪܓ݁ܝܼܫܝܼܢ ܗ݇ܘ̣ܵܘ؛ ܒܝܲܩܝܼܪܵܐ ܕܠܹܗ ܫܵܝܛܝܼܢ ܗ݇ܘ̣ܵܘ. ܒܚܲܝܠܹܗ ܫܘܿܥܹ̈ܐ ܡܗܲܠܠܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܵܟ݂ ܒܲܡܪ̈.܀

ܬ: ܬܵܐ ܝܵܬܹܒ݂ ܡ̣ܢ ܝܲܡܝܼܢܵܐ؛ ܠܢܘܼܚܵܡܹܗ ܕܲܡܪܸܟ݁ܒ݂ܵܢܵܐ. ܘܗܲܒ݂ ܠܹܗ ܕܢܲܩܒ݁ܠܵܟ݂ ܒܐܘܿܫܲܥܢܵܐ؛ ܥܲܡ ܛܠܵܝܹ̈ܐ ܒܢܵܘ̈ܗܝ ܕܲܓ݁ܢܘܿܢܵܐ.܀

ܬ: ܬܸܫܒ݁ܘܿܚܬ݂ܵܐ ܠܵܟ݂ ܡ̣ܢ ܟܠܵܐ؛ ܘܬ݂ܵܘܕܝܼܬ݂ܵܐ ܠܵܟ݂ ܡ̣ܢ ܟܠܵܐ. ܡܫܝܼܚܵܐ ܐܲܠܵܗܵܐ ܕܟ݂ܠܵܐ؛ ܐܵܡܹܝܢ ܪ̈ܲܚܡܲܝܟ ܥܲܠ ܟܠܵܐ.܀