Bakh Lakh Mennakh|ܒܵܟ݂ ܠܵܟ݂ ܡܸܢܵܟ݂|ܒܟ ܠܟ ܡܢܟ

ܒܵܟ݂ ܠܵܟ݂ ܡ̣ܢܵܟ݂ ܫܵܐܹܠ ܐ݇ܢܵܐ

ܒܩܵܠ ܐܝܼܬ݂ ܠܲܢ ܣܲܒ݂ܪܵܐ.

ܒܵܟ݂ ܠܵܟ݂ ܡ̣ܢܵܟ݂ ܫܵܐܹܠ ܐ݇ܢܵܐ؛ ܗܲܒ݂ܠܝܼ ܡܲܕܥܵܐ ܘܠܸܫܵܢܵܐ.

ܕܲܥܠܲܝܟ ܡܵܪܝ ܘܐܲܠܵܗܝ ܬܟ݂ܝܼܠ ܐ݇ܢܵܐ؛ ܕܐܲܢ݇ܬ݁ ܬܸܗܘܸܐ ܠܝܼ ܡܚܲܟ݁ܡܵܢܵܐ.܀

ܠܵܘ ܥܲܠ ܝܲܠܕܵܟ݂ ܡܬ݂ܘܿܡܵܝܵܐ؛ ܒܵܥܹܐ ܕܲܢܡܸܠܸܠ ܕܵܘܝܵܐ.

ܐܸܠܵܐ ܥܲܠ ܦܲܓ݁ܪܵܢܵܝܵܐ؛ ܟܲܕ݂ ܠܲܝܬ݁ ܠܵܟ݂ ܥܠܲܝ ܣܘܼܢܩܵܢܵܐ.܀

ܠܵܐ ܡܸܬ݁ܕ̱ܪܸܟ݂ ܐܲܠܵܗܵܝܵܐ؛ ܕܠܲܝܬ݁ ܐܲܬ݂ܪܵܐ ܘܠܵܐ ܫܘܼܢܵܝܵܐ.

ܘܐܵܦ ܠܡܵܘܠܵܕ݂ܵܟ݂ ܐ݇ܢܵܫܵܝܵܐ؛ ܙܥܘܿܪ ܟܠ ܦܘܼܡܵܐ ܘܠܸܫܵܢܵܐ.܀

ܐܘܿ ܕܝܼܠܝܼܕ݂ܝܼܢ ܡ̣ܢ ܡܲܝ̈ܵܐ؛ ܘܗܘ̤ܵܘ ܠܐܲܠܵܗܵܐ ܒܢܲܝ̈ܵܐ.

ܦܪܘܿܥܘ ܫܘܼܒ݂ܚܵܐ ܒܩܵܠܹ̈ܐ ܚܠܲܝ̈ܵܐ؛ ܠܗ̇ܘ ܕܐܸܬ݂ܓ݁ܠܝܼ ܒܝܵܘܡܵܐ ܗܵܢܵܐ.܀

ܗܵܐ ܐܵܕ݂ܵܡ ܕܓܲܒ݂ܠܹܗ ܠܐܵܕ̣ܵܡ؛ ܒܚܘܼܒܹܗ ܢܚܸܬ݂ ܠܡܸܣܥܲܪ ܠܐܵܕ݂ܵܡ.

ܘܐܸܬ݂ܒܲܪܢܲܫ ܡ̣ܢ ܒܵܪ݇ܬ݂ ܐܵܕ݂ܵܡ؛ ܬܲܗܪܵܐ ܠܵܐ ܡܸܬ݂ܡܲܠܠܵܢܵܐ.܀

ܗܵܐ ܒܬ݂ܘܼܠܬܵܐ ܒܲܪܬܹܗ ܕܐܵܕ݂ܵܡ؛ ܝܸܠܕܲܬ̤ ܒܪܹܗ ܘܡܵܪܹܗ ܕܐܵܕ݂ܵܡ.

ܫܡܲܥܘ ܬܲܗܪܵܐ ܐܘܿ ܒܢܲܝ̈ ܐܵܕ݂ܵܡ؛ ܘܲܩ̣ܥܵܘ ܕܡܵܪܲܢ ܗܘ̤ ܗܵܢܵܐ.܀

ܗܵܐ ܨܲܠܡܵܐ ܕܐܲܠܵܗܘܼܬ݂ܵܐ؛ ܘܗܲܝܟ݁ܠܵܐ ܕܲܬ݂ܠܝܼܬ݂ܵܝܘܼܬ݂ܵܐ.

ܕܲܥܠܵܘܗܝ ܡܲܠܠܲܬ݂ ܐܝܼܬ݂ܘܼܬ݂ܵܐ؛ ܟܲܕ݂ ܒܪܵܬ̤ ܠܐܵܕ݂ܵܡ ܥܲܦܪܵܢܵܐ.܀

ܗܵܐ ܫܸܒ݁ܠܵܐ ܕܚܲܝܹ̈ܐ ܝܼܥܲܬ̤؛ ܡ̣ܢ ܐܲܪܥܵܐ ܕܠܵܐ ܐܸܙܕܲܪܥܲܬ̤.

ܘܲܠܟ݂ܠܹܗ ܓܸܢܣܲܢ ܣܲܒ݁ܥܲܬ̤؛ ܒܐܘܼܟ݂ܠܵܐ ܠܵܐ ܡܸܬ݂ܚܲܒ݁ܠܵܢܵܐ.܀

ܘܛܘܿܛܝܼܬ݂ܵܐ ܐܲܠܵܗܵܝܬ݂ܵܐ؛ ܡ̣ܢ ܓܦܸܬܵܐ ܐܵܕ݂ܵܡܵܝܬܵܐ.

ܘܡ̣ܢ ܫܒ݂ܫܬܵܐ ܡܲܪܝܵܡܲܝܬܵܐ؛ ܕܒ݂ܵܗ̇ ܪܘܝܼ ܓܸܢܣܲܢ ܥܲܦܪܵܢܵܐ.܀

ܐܝܼܠܵܢܵܐ ܕܲܒ݂ܪܹܫ ܛܘܼܪܵܐ؛ ܟܲܕ݂ ܠܵܐ ܒܛܸܢ ܐܵܘܠܸܕ݂ ܐܸܡܪܵܐ.

ܡܲܪܝܲܡ ܐܝܼܬܹܝܗ̇ ܒܲܫܪܵܪܵܐ؛ ܕܝܸܠܕܲܬ̤ ܠܥܵܠܡܵܐ ܡܚܲܪܪܵܢܵܐ.܀

ܘܗ̇ܘ ܣܲܢܝܵܐ ܕܡܸܬ݂ܓܵܘܙܲܠ ܗ݇ܘ̣ܵܐ؛ ܒܢܘܼܪܵܐ ܟܲܕ݂ ܠܵܐ ܝܵܩܹܕ݂ ܗ݇ܘ̣ܵܐ.

ܐ݇ܪܵܙܵܐ ܕܡܲܪܝܲܡ ܨܵܐܲܪ ܗ݇ܘ̣ܵܐ؛ ܕܛܸܥܢܲܬ̤ ܒܥܘܼܒܵܗ̇ ܠܡܲܚܝܵܢܵܐ.܀

ܘܫܲܒ݂ܛܵܐ ܕܐܲܗܪܘܿܢ ܕܠܵܐ ܢܨܝܼܒ݂ ܗ݇ܘ̣ܵܐ؛ ܛܲܪ̈ܦܹܐ ܥܲܡ ܠܘܼܙܹ̈ܐ ܛܥܲܢ ܗ݇ܘ̣ܵܐ.

ܣܵܗܕܵܐ ܠܡܲܪܝܲܡ ܐܝܼܬ݂ܵܘܗܝ ܗ݇ܘ̣ܵܐ؛ ܕܒܸܛܢܲܬ݂ ܗ݇ܘ̣ܵܬ݂ ܠܥܸܠ ܡ̣ܢ ܟܝܵܢܵܐ.܀

ܘܛܲܠܝܵܐ ܬܘܼܒ݂ ܕܡ̣ܢ ܩܕ݂ܝܼܡ ܝܼܠܝܼܕ݂؛ ܐܲܟ݂ܡܵܐ ܕܐܸܬ݂ܢܲܒ݁ܝܼ ܕܵܘܝܼܕ݂.

ܘܒ݂ܐܝܼܕ݂ܵܘ̈ܗܝ ܟܠܹܗ ܥܵܠܡܵܐ ܥܒ݂ܝܼܕ݂؛ ܒܒܹܬ݂ܠܚܸܡ ܕܢܲܚ̣ ܝܵܘܡܵܢܵܐ.܀

ܘܒܸܛܢܲܬ̤ ܘܝܸܠܕܲܬ̤ ܒܬ݂ܘܼܠܬܵܐ ܒܪܵܐ؛ ܘܲܫܡܹܗ ܐܲܬ݂ܩܪܝܼ ܕܘܼܡܵܪܵܐ.

ܐܵܦ ܐܲܠܵܗܵܐ ܓܲܢ݇ܒܵܪܵܐ؛ ܥܲܡܵܢܘܼܐܹܝܠ ܚܲܢܵܢܵܐ.܀