Barekh nawsh l'marya|ܒܲܪܸܟ݂ܝ ܢܲܦ̮ܫܝ ܠܡܵܪܝܵܐ|ܒܪܟ݂ܝ ܢܦܫܝ ܠܡܪܝܐ

ܒܲܪܸܟ݂ܝ ܢܲܦ̮ܫܝ ܠܡܵܪܝܵܐ. ܠܵـܟ݂ ܝܵܐܹܐ ܫܘܼܒ݂ܚܵܐ ܐܲܠܵܗܵܐ. ܒܲܪܸܟ݂ܝ ܢܲܦ̮ܫܝ ܠܡܵܪܝܵܐ܀ ܡܵܪܝܵܐ ܐܲܠܵܗܝ ܝܼܪܸܒ݂ܬ݁ ܛܵܒ݂܀ ܙܝܼܘܵܐ ܘܗܸܕ݂ܪܵܐ ܠܒܸܫܬ݁܀ ܘܐܸܬ݂ܟܲܣܝܼܬ݁ ܢܘܼܗܪܵܐ ܐܲܝـܟ݂ ܡܲܪܛܘܼܛܵܐ܀ ܡܬܲܚܬ݁ ܫܡܲܝܵܐ ܐܲܝـܟ݂ ܝܵܪܝܼܥܬܵܐ܀ ܥܒܲܕ݂ ܒܡܲ̈ܝܵܐ ܡܸܕ݂ܝܵـܪ̈ܵܘܗܝ܀ ܘܣܵܡ݂ ܥܲܠ ܥܢܵـܢܹ̈ܐ ܡܲܪܟܲܒ݂ܬܹܗ܀ ܘܲܡܗܲܠܸـܟ݂ ܥܲܠ ܟܸܢܦܹ̈ܐ ܕܪܘܼܚܵܐ܀ ܥܒܲܕ݂ ܡܲܠܲܐܟ݂ܵـܘ̈ܗܝ ܪܘܼܚ܀ ܘܲܡܫܲܡܫܵܢܵـܘ̈ܗܝ ܢܘܼܪ ܝܵܩܕܵܐ܀ ܐܲܬ݂ܩܸܢ ܐܲܪܥܵܐ ܥܲܠ ܡܲܬ݂ܩܢܹܝ̈ـܗ̇܀ ܕܠܵܐ ܬܙܘܼܥ ܠܥܵܠܲܡ ܥܵܠܡܝܼܢ܀ ܬܗܘܿܡܵܐ ܐܲܝـܟ݂ ܡܲܪܛܘܼܛܵܐ ܟܲܣܝܼܬܵܝܗܝ܀ ܘܥܲܠ ܛܘܼܪܹ̈ܐ ܩܵܡܘ ܡܲـ̈ـܝܵܐ܀ ܡ̣ܢ ܟܐܵܬ݂ܵܟ݂ ܥܲܪܩܝܼܢ܀ ܘܡ̣ܢ ܩܵܠܵܐ ܕܪ̈ܲܥܡܲܝـܟ ܡܸܬ݂ܪܲܗܒ݂ܝܼܢ܀ ܣ݂ܠܸܩܘ ܛܘܼܪܹ̈ܐ ܘܲܢܚܸܬ݂̈ ܦܲܩܥܵܬ݂ܵܐ܀ ܒܐܲܬ݂ܪܵܐ ܕܬܲܩܸܢܬ݁ ܠܗܘܿܢ܀ ܬܚܘܼܡܵܐ ܣܵܡܬ݁ ܠܗܘܿܢ܀ ܕܠܵܐ ܢܸܥ̱ܒ݁ܪܘܿܢ ܘܲܢܟܲܣܘܿܢܵܗ̇ ܠܐܲܪܥܵܐ܀ ܫܲܕܲܪܬ݁ ܡܲܒܘܼܥܹ̈ܐ ܒܢܲܚ̈ܠܸܐ܀ ܘܒܲܝܢܵܬ݂ ܛܘܼܪܹ̈ܐ ܡܗܲܠܟ݂ܝܼܢ܀ ܘܡܲܫܩܹܝܢ ܟܠܵܗ̇ ܚܲܝ̱ܘܬ݂ܵܐ ܕܕܲܒ݂ܪܵܐ܀ ܘܣܵܒ݂ܥܝܼܢ ܥܪ̈ܵܕܹܐ ܕܲܨܗܹܝܢ܀ ܦܵܪܲܚܬ݂ܵܐ ܕܲܫܡܲܝܵܐ ܥܠܲܝܗܘܿܢ ܫܵܟ݂ܢܵܐ܀ ܘܡ̣ܢ ܒܲܝܢܵܬ݂ ܛܘܼܪܹ̈ܐ ܝܵܗ݇ܒ݁ܝܼܢ ܩܵܠܵܐ܀ ܡܲܫܩܸܐ ܛܘܼܪܹ̈ܐ ܡ̣ܢ ܡܸܕ݂ܝܵـܪ̈ܵܘܗܝ܀ ܘܡ̣ܢ ܦܹܐܪ̈ܲܝ ܥܒ݂ܵܕܲܝ̈ـܟ ܬܸܣܒܲܥ ܐܲܪܥܵܐ܀ ܡܵܘܥܹܐ ܥܡܝܼܪܵܐ ܠܲܒ݂ܥܝܼܪܵܐ܀ ܘܥܸܣܒܵܐ ܠܦܘܼܠܚܵܢܹܗ ܕܒܲܪܢܵܫܵܐ܀ ܠܡܲܦܵܩܘܼ ܠܲܚܡܵܐ ܡ̣ܢ ܐܲܪܥܵܐ܀ ܚܲܡܪܵܐ ܡܚܲܕܹ݁ܐ ܠܸܒܹ݁ܗ ܕܒܲܪܢܵܫܵܐ܀ ܘܡܲܦܨܲܚ ܐܲܦܵـܘ̈ܗܝ ܒܡܸܫܚܵܐ܀ ܠܲܚܡܵܐ ܣܵܡܹـܟ݂ ܠܸܒܹ݁ܗ ܕܒܲܪܢܵܫܵܐ܀ ܢܸܣܒ݁ܥܘܼܢ ܐܝܼܠܵܢܵـܘ̈ܗܝ ܕܡܵܪܝܵܐ. ܠܵـܟ݂ ܝܵܐܹܐ ܫܘܼܒ݂ܚܵܐ ܐܲܠܵܗܵܐ܀

ܘܡܲܩܦܝܼܢ ܡܲܙܡܘܿܪܵܐ ܗܵܢܵܐ ܕܐܵܬܹܐ ܘܡܸܬ݂ܐ̱ܡܲܪ ܒܙܵܘܓܹ̈ܐ ܘܒܲܠܒ݂ܵܟ݂ܬܵܐ:

ܫܲܒܲܚܘ ܥܲܒ݂ܕܵܘ̈ܗܝ ܕܡܵܪܝܵܐ. ܬܢܝ. ܫܲܒܲܚܘ ܠܲܫܡܹܗ ܕܡܵܪܝܵܐ. ܠܵـܟ݂ ܝܵـܐܹܐ ܫܘܼܒ݂ܚܵܐ ܐܲܠܵܗܵܐ: ܕܐܲܢ݇ܬ݁ܘܼ ܒܵܪܘܿܝܹܗ ܕܢܘܼܗܪܵܐ܀ ܢܸܗܘܸܐ ܫܡܹܗ ܕܡܵܪܝܵܐ ܡܒܲܪܲܟ݂. ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ܀ ܡ̣ܢ ܡܲܕ݂ܢܵܚܵܘ̈ܗܝ ܕܫܸܡܫܵܐ ܘܲܥܕܲܡܵܐ ܠܡܲܥܪ̈ܵܒ݂ܵܘܗܝ. ܪܲܒ݁ܘܼ ܫܡܹܗ ܕܡܵܪܝܵܐ܀ ܘܪܵܡ ܥܲܠ ܟܠܗܘܿܢ ܥܲܡܡܹ̈ܐ ܡܵܪܝܵܐ. ܘܥܲܠ ܫܡܲܝܵܐ ܐܝܼܩܵܪܹܗ܀ ܡܲܢܘܼ ܐܲܝـܟ݂ ܡܵܪܝܵܐ ܐܲܠܵܗܲܢ. ܕܝܵܬܹܒ݂ ܒܪܵܘܡܵܐ ܘܚܵܙܹܐ ܒܥܘܼܡܩܵܐ܀ ܕܝܵܬܹܒ݂ ܒܪܵܘܡܵܐ ܘܚܵܙܹܐ ܒܥܘܼܡܩܵܐ. ܒܲܫܡܲܝܵܐ ܘܒܲܐܪܥܵܐ܀ ܡܪܝܼܡ ܡ̣ܢ ܩܸܩܠ̱ܬ݂ܵܐ ܠܒ݂ܵܝܫܵܐ. ܕܢܵܘܬ݁ܒ݂ܝܼܘܗܝ ܥܲܡ ܪܵܘܪ̈ܒ݂ܵܢܹܐ ܕܥܲܡܵܐ܀ ܡܵܘܬܸ݁ܒ݂ ܥܩܲܪܬ݂ܵܐ ܒܒܲܝܬܵܐ. ܘܐܸܡܵܐ ܕܲܒ݂ܢܲـܝ̈ܵـܐ ܟܲܕ݂ ܚܵܕ݂ܝܵܐ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ܀ ܡ̣ܢ ܥܵܠܲܡ ܘܲܥܕ݂ܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܫܲܒܲܚܘ ܥܲܒ݂ܕܵܘ̈ܗܝ ܕܡܵܪܝܵܐ. ܬܢܝ. ܫܲܒܲܚܘ ܠܲܫܡܹܗ ܕܡܵܪܝܵܐ܀ ܠܵـܟ݂ ܝܵـܐܹܐ ܫܘܼܒ݂ܚܵܐ ܐܲܠܵܗܵܐ: ܕܐܲܢ݇ܬ݁ܘܼ ܒܵܪܘܿܝܹܗ ܕܢܘܼܗܪܵܐ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.