Ba'zqiputha |ܒܲܙܩܝܼܦܘܼܬ݂ܵܐ|ܒܙܩܝܦܘܬܐ

ܫܲܗܪܐ ܕܲܩܝܵܡܬܵܐ
ܣܘܿܓ݁ܝܼܬ̣ܵܐ: ܒܲܙܩܝܼܦܘܼܬ݂ܵܐ ܬܲܗܪܵܐ ܚܙܹܝܬ݂
ܥܲܠ ܟܪܘܿܒ݂ܵܐ ܘܓܲܝܵܣܵܐ

1
ܒܲܙܩܝܼܦܘܼܬ݂ܵܐ ܬܲܗܪܵܐ ܚܙܹܝܬ݂: ܟܲܕ ܓܲܝܵܣܵܐ ܠܡܵܪܲܢ ܩܪܵܐ.

ܕܐܸܬ݁ܕܲܟ݂ܪܲܝܢܝ ܡܵܪܝ ܒܝܘܿܡ ܡܹܐܬ݂ܝܵـܟ݂: ܒܗ̇ܝ ܡܲܠܟ݁ܘܼܬ݂ܵܐ ܕܠܵܐ ܥܵܒ݂ܪܵܐ܀
2
ܥܒܲܕ݂ ܒܵܥܘܼܬ݂ܵܐ ܘܐܵܘܫܸܛ ܝܲܗ݇ܒ݂: ܠܡܲܠܟܵܐ ܙܩܝܼܦܵܐ ܘܪ̈ܲܚܡܹܐ ܫ̣ܐܸܠ.

ܘܲܡܠܹܐ ܪ̈ܲܚܡܹܐ ܒܩܵܠܹܗ ܫܡܲܥ: ܘܲܠܒ݂ܵܥܘܼܬܹܗ ܬܲܪܥܵܐ ܦܬܲܚ܀
3
ܐܸܬ݁ܕܲܟ݂ܪܲܝܢܝ ܡܵܪܝ ܩܥܵܐ ܟܲܕ݂ ܙܩܝܼܦ: ܒܗ̇ܝ ܡܲܠܟ݁ܘܼܬ݂ܵܐ ܕܠܵܐ ܥܵܒ݂ܪܵܐ.

ܘܲܒ݂ܗ̇ܘ ܫܘܼܒ݂ܚܵܐ ܕܒܹܗ ܡܸܬ݂ܓܠܹܝܬ݁: ܐܸܚܙܸܐ ܚܢܵܢܵܟ݂ ܕܐܵܘܕܝܼܬ݂ ܒܵܟ݂܀
4
ܐܸܡܲܪ ܡܵܪܲܢ ܕܐܵܘܕܝܬ݁ ܒܝܼ¹: ܝܵܘܡܵܢ ܬܸܗܘܸܐ ܒܓܲܢܲܬ݂ ܥܕܸܢ.

ܗܲܡܸܝܢ ܓܲܒ݂ܪܵܐ ܕܠܵܐ ܡܸܬ݂ܟ݁ܠܹܝܬ݁: ܡ̣ܢ ܡܲܠܟ݁ܘܼܬ݂ܵܐ ܕܠܵܗ̇ ܚܵܝܪܲܬ݁܀
5
ܐܵܬܵ݀ܐ ܙܩܝܼܦܵܐ² ܣܲܒ݂ ܠܵܟ݂ ܘܙܹܠ: ܩܠܝܼܕ݂ܵܐ ܪܲܒܵܐ³ ܕܒܹܗ ܡܸܬ݂ܦܬܲܚ.

ܬܲܪܥܵܐ ܪܲܒܵܐ ܕܗ̇ܝ ܓܲܢܬ݂ܵܐ: ܘܥܵܐܸܠ⁴ ܐܵܕܼܵܡ ܕܲܛܪܝܼܕ݂ ܗ̣݇ܘܵܐ܀
6
ܡܸܠܬܹܗ ܕܡܵܪܲܢ ܐܲܝܟ݂ ܣܲܩܪܵܐ: ܡ̣ܢ ܒܹܝܬ݂ ܡܲܠܟܵܐ ܐܸܬ݂ܚܲܬ݂ܡܲܬ݀.

ܘܲܠܓܲܝܵܣܵܐ ܐܸܫܬܵܘܫܛܲܬ݀: ܘܫܲܩܠܵܗ̇ ܘܲܪܕ݂ܵܐ ܠܓܲܢܲܬ݂ ܥܕܸܢ܀
7
ܫܡܲܥ ܗ̣݇ܘܵܐ ܟܪܘܿܒ݂ܵܐ ܘܲܪܗܸܛ ܡ̣ܛܵܐ: ܘܲܠܓܲܝܵܣܵܐ ܒܬܲܪܥܵܐ ܠ̣ܒܲـܟ݂.

ܟܠܵܝܗܝ ܒܲܫܢܵܢܵܐ ܕܐܲܚܝܼܕ݂⁵ ܗ̣݇ܘܵܐ: ܘܟܲܕ݂ ܡܬ݂ܒܲܠܗܸܐ ܗܵܟܲܢ ܐ݇ܡܲܪ܀
8
ܐ. ܟܪܘܿܒ݂ܵܐ
ܐ݇ܡܲܪ ܠܝܼ ܓܲܒ݂ܪܵܐ ܡ̇ܢ ܫܲܕܪܵܟ݂: ܘܡܵܢܵܐ ܒܵܥܹܝܬ݁⁶ ܘܐܲܝܟܲܢ ܐ݇ܬܲܝܬ݁.

ܘܐܲܝܕܵܐ ܥܸܠܬ݂ܵܐ ܩܪܵܬ݂ܵܟ݂ ܠܟ̣ܵܐ: ܓܠܝܼ ܘܦܲܫܸܩ ܠܝܼ ܡ̇ܢ ܫܲܕܪܵܟ݂܀
9
ܐ. ܓܲܝܵܣܵܐ
ܐܵܡܲܪ ܐ݇ܢܵܐ ܠܵܟ݂ ܡ̇ܢ ܫܲܕܪܲܢܝ⁷: ܟܠܝܼ ܠܲܫܢܵܢܵܟ݂ ܘܡܸܠܲܝ̈ ܫܡܲܥ.

ܓܲܝܵܣܵܐ ܐ݇ܢܵܐ ܘܪ̈ܲܚܡܹܐ ܒܥܹܝܬ݂: ܘܡܵܪܵܟ݂ ܫܲܠܚܲܢܝ⁸ ܕܐܸܬܹܝܬ݂ ܠܟ݂ܵܐ܀
10
ܒ. ܟܪܘܿܒ݂ܵܐ
ܒܐܲܝܢܵܐ ܚܲܝܠܵܐ ܗ̤ܘܵܐ ܡܹܐܬ݂ܝܵܟ݂: ܘܒ݂ܐܲܬ݂ܪܵܐ ܕܚܝܼܠܵܐ ܡ̇ܢ ܐܲܪܕܝܵܟ݂.

ܝܲܡܵܐ ܕܢܘܼܪܵܐ ܡ̇ܢ ܐܲܥܒ݁ܪܵܟ݂: ܕܬܸܥܘܿܠ ܠܲܥܕܸܢ ܡ̇ܢ ܫܲܕܪܵܟ݂܀
11
ܒ. ܓܲܝܵܣܵܐ
ܒܚܲܝܠܹܗ ܕܲܒ݂ܪܵܐ ܕܗ̤ܘ ܫܲܕܪܲܢܝ: ܥܸܒ݂ܪܹܬ݂ ܘܐܸܬܹܝܬ݂ ܘܠܵܐ ܐܸܬ݂ܟ݁ܠܝܼܬ݂.

ܘܟ݂ܠ ܚܲܝ̈ـܠܵܘܵܢ ܒܹܗ ܫܲܥܒ݁ܕܹܬ݂: ܘܐܸܬܹܝܬ݂ ܕܐܸܥܘܿܠ ܐܲܝܟ݂ ܕܐܲܬ݂ܟ݁ܠܲܢܝ܀
12
ܓ. ܟܪܘܿܒ݂ܵܐ
ܓܲܝܵܣܵܐ ܐܲܢ݇ܬ݁ ܐܲܝܟ݂ ܕܐܸܡܲܪܬ݁: ܘܐܲܬ݂ܪܲܢ ܕܝܼܠܲܢ ܠܵܐ ܡܸܬ݂ܓ݁ܢܸـܒ݂.

ܣܝܼܓ݁ ܗ̣݇ܘ ܒܪܘܼܡܚܵܐ ܕܠܹܗ ܢܵܛܪܵܐ: ܗܦܘܿܟ݂ ܠܵܟ݂ ܓܲܒ݂ܪܵܐ ܐܘܼܪܚܵܐ ܛ̣ܥܲܝܬ݁܀
13
ܓ. ܓܲܝܵܣܵܐ
ܓܲܝܵܣܵܐ ܗ݇ܘܹܝܬ݂ ܘܐܸܬ݂ܚܲܠܦܹـܬ݂: ܘܠܵܐ ܗ̣݇ܘܵܐ ܕܐܸܓ݁ܢܘܿܒ݂ ܐܸܬܹܝܬ݂ ܠܟ݂ܵܐ.

ܩܠܝܼܕ݂ܵܐ ܕܲܥܕܸܢ ܗܵܐ ܐܝܼܬ݂ ܥܠܲܝ: ܕܐܹܦ̮ܬܲܚ ܘܐܸܥܘܿܠ ܘܠܵܐ ܐܸܬ݂ܟ݂ܠܸܐ܀
14
ܕ. ܟܪܘܿܒ݂ܵܐ
ܕܚܝܼܠ ܗ̣݇ܘ ܐܲܬ݂ܪܲܢ ܘܠܵܐ ܡܸܬ݁ܬ݁ܕ݂ܝܼܫ: ܕܢܘܼܪܵܐ ܗ̣݇ܘ ܫܘܼܪܹܗ ܘܠܵܐ ܡܬ݂ܟ݁ܒܸܫ.

ܫܢܵܢܵܐ ܚܕ݂ܵܪܵܘܗܝ ܡܸܫܬܲܠܗܒ݂ܵܐ: ܘܐܲܝܟܲܢ ܐܲܡܪܲܚܬ݁ ܕܬܹܐܬܹܐ ܠܟ݂ܵܐ⁹܀
15
ܕ. ܓܲܝܵܣܵܐ
ܕܚܝܼܠ ܗ̣݇ܘ ܐܲܬ݂ܪܵܟ݂ ܐܲܝܟ݂ ܕܐܸܡܲܪܬ݁: ܥܕܲܡܵܐ ܕܡܵܪܵܟ݂ ܙܩܝܼܦܵܐ ܪܟܸـܒ݂.

ܘܪܘܼܡܚܵܐ ܕܚܲܫܵܐ ܗ̤ܘ ܩܲܒ݁ܠܵܗ̇: ܘܲܫܢܵܢܵܟ݂ ܬܘܼܒ݂ ܠܵܐ ܩܵܛܠܵܐ܀
16
ܗ. ܟܪܘܿܒ݂ܵܐ
ܗܵܐ ܡ̣ܢ ܙܲܒ݂ܢܵܐ¹⁰ ܕܐܵܕܼܵܡ ܢܦܲـܩ̣: ܠܵܐ ܚܙܹܐ ܠܝܼ ܐ݇ܢܵܫ ܕܐܸܬ݂ܵܐ ܠܟ݂ܵܐ.

ܛܪܝܼܕ݂ ܗ̣݇ܘ ܓܸܢܣܟ݂ܘܿܢ ܡ̣ܢ ܓܲܢܬ݂ܵܐ: ܠܵܐ ܥܵܐܹܠ ܐܲܢ݇ܬ݁ ܠܐ ܬܸܬ݂ܚܪܹܐ¹¹܀
17
ܗ. ܓܲܝܵܣܵܐ
ܗܵܐ ܡ̣ܢ ܙܲܒ݂ܢܵܐ¹² ܕܐܵܕܼܵܡ ܢܦܲܩ̣: ܪܓܝܼܙ ܗ̣݇ܘ ܡܵܪܵܟ݂ ܥܲܠ ܫܲܪܒ݁ܬܲܢ.

ܘܐܸܬ݂ܪܲܥܝܼ ܠܹܗ ܘܬܲܪܥܵܐ ܦ̣ܬܲܚ: ܘܡ̣ܢ ܝܲܬ݁ܝܼܪ ܗ̣݇ܘ ܬܢܵܢ ܩܵܝܡܲܬ݁܀
18
ܘ. ܟܪܘܿܒ݂ܵܐ
ܘܵܠܹܐ ܕܬܸܕܲܥ ܕܠܵܐ ܡܸܫܟ݁ܚܵܐ: ܕܓܲܒ݂ܪܵܐ ܛܲܡܵܐܐ ܢܸܥܘܿܠ ܠܟ݂ܵܐ.

ܘܐܲܢ݇ܬ݁ ܩܵܛܘܿܠܵܐ ܘܐܵܫܹܕ݂ ܕܡܵܐ: ܠܐܲܬ݂ܪܵܐ ܕܟܹܐܢܹ̈ܐ ܡ̇ܢ ܐܲܝܬ݁ܝܵܟ݂܀
19
ܘ. ܓܲܝܵܣܵܐ
ܘܵܠܹܐ ܕܬܸܪܲܓܸܫ¹³ ܕܗܵܟܲܢ ܨܒ݂ܵܐ: ܡܕܲܟܹܐ ܛܲܡܹ̈ܐܐ ܕܥܲܡܝ ܐܸܙܕܩܸܦ.

ܘܒܲܕ݂ܡܵܐ ܕܕܲܦܢܹܗ ܡ̣ܪܲܩ ܚܲܠܠܲܢܝ: ܘܲܠܦܲܪܕܲܝܣܵܐ ܗ̤ܘ ܫܲܕܪܲܢܝ܀
20
ܙ. ܟܪܘܿܒ݂ܵܐ
ܙܹܠ ܠܵܟ݂ ܓܲܒ݂ܪܵܐ ܠܵܐ ܬܸܬ݂ܚܪܸܐ: ܕܐܸܢܵܐ ܗܵܟܲܢ ܐܬ݂ܦܲܩܕܹܬ݂.

ܕܐܝܼܠܵܢ ܚܲܝܹ̈ܐ ܗ̇ܘ ܕܐܝܼܬ̣ܵܘܗܝ ܬܢܵܢ: ܒܪܘ݂ܡܚܵܐ ܐܸܛܪܝܼܘܗܝ ܡ̣ܢ ܓܸܢܣܟ݂ܘܿܢ܀
21
ܙ. ܓܲܝܵܣܵܐ
ܙܹܠ ܠܵܟ݂ ܥܝܼܪܵܐ ܘܝܼܠܲܦ ܚܙܝܼ: ܕܦܹܐܪܵܐ ܕܚܲܝܹ̈ܐ ܕܲܒ݂ܓܲܢܬ݂ܵܟ݂.

ܗܵܐ ܒܓܵܓ݁ܘܿܠܬܵܐ ܫܒܲܩܬܹܗ ܬܠܸܐ: ܕܢܸܥܘܿܠ ܓܸܢܣܲܢ ܘܠܵܐ ܢܸـܬ݂ܟ݁ܠܸܐ܀
22
ܚ. ܟܪܘܿܒ݂ܵܐ
ܚܵܘܵܐ ܘܐܵܕ݂ܵܡ ܟܬܲܒ݂ܘ ܗ̣݇ܘܵܘ ܘܚܵܒ݂ܘ: ܚܲܕ݂ ܐܸܫܛܵܖܵܐ ܘܠܵܐ ܡܸܬ݂ܠܚܵܐ¹⁴.

ܒܲܓ݁ܙܵܪ ܕܝܼܢܵܐ ܡܸܟܵܐ ܢܦܲܩܘ: ܕܒ݂ܐܲܪܥܵܐ ܕܟ݂ܘܼܒܹ̈ܐ ܢܸܫܬܲܦܠܘܼܢ܀
23
ܚ. ܓܲܝܵܣܵܐ
ܚܵܘܒ݁ܬ̣ܵܐ ܦܪܝܼܥܵܐ ܟܪܘܿܒ̣ܵܐ ܫܡܲܥ: ܘܗܵܐ ܒܲܙܩܝܼܦܵܐ ܐ݇ܫܛܵܪܹܗ ܩܒ݂ܝܼܥ.

ܒܲܕܡܵܐ ܘܡܲܝ̈ܵܐ ܡܵܪܵܟ݂ ܠܚܵܝܗܝ: ܒܨܸܨܹ̈ܐ ܬܲܠܚܹܗ ܘܠܵܐ ܡܸܬ݂ܬܒܲܥ¹⁵܀
24
ܛ. ܟܪܘܿܒ݂ܵܐ
ܛܪܝܼܕ݂ ܗ̣݇ܘ ܐܵܕ݂ܵܡ¹⁶ ܡ̣ܢ ܓܲܢܬ̣ܵܐ: ܘܠܵܐ ܐܝܼܬ݂ ܦܘܼܪܣܵܐ ܕܢܹܐܬܸܐ ܠܟ݂ܵܐ.

ܫܢܵܢܵܐ ܕܚܲܪܒܵܐ ܡܸܬ݂ܗܲܦܟ݂ܵܐ: ܘܐܸܢܗ̤ܘ ܕܢܹܐܬܸܐ ܒܹܗ ܦܵܓ݁ܥܵܐ܀
25
ܛ. ܓܲܝܵܣܵܐ
ܛܪܝܼܕ݂ܵܐ ܦ̣ܢܵܐ ܠܹܗ ܠܒܹܝܬ݂ ܐܲܒ݂ܘܼܗܝ: ܕܪܵܥܝܵܐ ܪܲܒܵܐ¹⁷ ܢܦܲܩ ܐܸܫܟ݁ܚܹܗ.

ܠܥܸܪܒܵܐ ܕܲܢܦܲܩ¹⁸ ܡ̣ܢ ܥܵܢܹ̈ܗ: ܘܥܲܠ ܟܲܬ݂ܦܵܬܹ̈ܗ ܛ̣ܥܲܢ ܙܲܝܚܹܗ܀
26
ܝ. ܟܪܘܿܒ݂ܵܐ
ܝܵܘܡܵܢ ܡܸܕܸܡ ܚܲܕ݂ܬ݂ܵܐ ܚܙܹܝܬ݂: ܗܠܲܟ݂ܬ݂ܵܐ ܕܥܵܐܠܵܐ ܠܓ݁ܵܘ ܓܲܢܬ̣ܵܐ.

ܗܵܐ ܕܘܪ̈ܟܵܬܹܗ ܕܐܵܕ݂ܵܡ ܚܙܹܝܬ݂: ܕܲܢܦܲܩ ܡܸܟܵܐ ܘܠܵܐ ܬܘܼܒ݂ ܦ̣ܢܵܐ܀
27
ܝ. ܓܲܝܵܣܵܐ
ܝܼܫܘܿܥ ܡܵܪܵܟ݂ ܚܕܲܬܵܐ ܣ̣ܥܲܪ: ܕܲܫܪܲܝܗܝ ܠܐܵܕ݂ܵܡ ܕ݂ܐܲܣܝܼܪ ܗ̣݇ܘܵܐ. ܘܐܲܩܝܼܡ ܟܸܢܫܹ̈ܐ¹⁹ ܡ̣ܢ ܓܵܘ ܫܝܘܿܠ: ܘܫܲܕܪܲܢܝ ܕܐܸܩܕ݂ܘܿܡ ܐܸܦ̮ܬܲܚ ܠܗܘܿܢ܀
28
ܟ. ܟܪܘܿܒ݂ܵܐ
ܟܪܘܿܒ݂ܵܐ ܐܸܢܵܐ ܘܐܲܝܟܲܢ ܦ̣ܣܲܥܬ݁: ܥܲܠ ܡܲܛܲܪܬܵܐ ܕܠܝܼ ܡܲܓ݁ܥܠܵܐ.

ܗܵܐ ܢܘܼܪܵܐ ܠܵܐ ܡܸܙܕܟܸܐ: ܘܐܲܢ݇ܬ݁ ܒܲܪ ܐܵܕ݂ܵܡ ܟܡܵܐ ܡܲܡܪܚܲܬ݁܀
29
ܟ. ܓܲܝܵܣܵܐ
ܟܵܢܵܬ݂ܵܟ݂ ܐܝܼܬܲܝ ܘܚܲܕ݂ ܐܝܼܬ݂ ܠܲܢ: ܡܵܪܵܐ ܕܓ݁ܵܘܵܐ ܐܵܦ ܠܝܼ ܘܠܵܟ݂.

ܘܪܲܒ݁ ܫܘ݂ܠܛܵܢܹܗ ܡ̣ܢܵܟ݂ ܘܡܹܢܝ: ܘܠܵܐ ܕܵܚܹܠ ܐ݇ܢܵܐ ܕܗ̤ܘ ܫܲܕܪܲܢܝ܀
30
ܠ. ܟܪܘܿܒ݂ܵܐ
ܠܵܐ ܡܸܫܟܲܚ ܐܲܢ݇ܬ݁ ܕܬܹܥܘܿܠ ܠܟ݂ܵܐ: ܕܐܲܬ݂ܪܵܐ ܗ̣݇ܘ ܙܲܗܝܵܐ ܘܠܵܐ²⁰ ܡܸܬ݁ܕܪܸܟ݂.

ܫܟ݂ܝܼܢܬܵܐ ܒܓ݁ܵܘܹܗ ܡܸܙܕܲܝܚܵܐ: ܘܪܘܼܡܚܵܐ ܕܢܘܼܪܵܐ ܠܹܗ ܢܵܛܪܵܐ܀
31
ܠ. ܓܲܝܵܣܵܐ
ܠܵܐ ܡܸܫܟܲܚ ܐܲܢ݇ܬ݁ ܕܬܸܟ݂ܠܸܐ ܠܐ݇ܢܵܫ. ܩ̣ܗܵܬ݀ ܠܵܗ̇ ܪܘܼܡܚܵܐ²¹ ܘܐܸܫܬܲܗܝܲܬ̤: ܙܩܝܼܦܵܐ ܦܲܬ݂ܚܵܗ̇ ܠܓܲܢܲܬ݂ ܥܕܸܢ: ܘܠܵܐ ܐܝܼܬ݂ ܦܘܼܪܣܵܐ ܕܬ݂ܘܼܒ݂ ܬܸܬ݁ܚܸܕ݂܀
32
ܡ. ܟܪܘܿܒ݂ܵܐ
ܡ̣ܢ ܩܸܪܝܵܢܵܐ ܠܵܐ ܫܡܝܼܥ ܠܵܟ݂: ܟܪܘܿܒ݂ܵܐ ܘܚܲܪܒܵܐ ܕܡܸܬ݂ܗܲܦܟ݂ܵܝܢ.

ܠܡܸܛܲܪ ܐܘ݂ܪܚܵܐ ܕܓܲܢܲܬ݂ ܥܕܸܢ: ܡ̣ܢ ܒܹܝܬ݂ ܐܵܕ݂ܵܡ ܕܠܵܐ ܢܸܥܠܘܿܢ܀
33
ܡ. ܓܲܝܵܣܵܐ
ܡ̣ܢ ܓܸܠܝܵܢܵܐ ܠܵܐ ܫܡܝܼܥ ܠܵܟ݂: ܕܲܢܚܸܬ݂ ܡܵܪܵܟ݂ ܘܐܢܵܫܵܐ ܗܘܵܐ.

ܘܪܲܥܝܼ ܠܐܵܕ݂ܵܡ ܕܪܲܓܢܼܝ ܗ݇ܘ̣ܵܐ²²: ܕܢܲܦܢܹܝܘܗܝ ܠܲܥܕܸܢ ܕܲܛܪܝܼܕ݂ ܗ݇ܘ̣ܵܐ܀
34
ܢܢ. ܟܪܘܿܒ݂ܵܐ
ܢܘܼܪܵܐ ܘܚܲܪܒܵܐ ܡܸܬ݂ܗܲܦܟ݂ܵܐ: ܘܠܐܝܼܠܵܢ ܚܲܝܹ̈ܐ ܗ̤‍ܝ ܢܵܛܪܵܐ.

ܣܲܪܕܲܬ݂ ܠܐܵܕ݂ܵܡ ܟܲܕ݂ ܐܸܬ݂ܥܒܲܪ: ܘܐܲܢ݇ܬ݁ ܐܲܝܟܲܢܵܐ ܠܵܐ ܕܵܚܠܲܬ݁܀
35
ܢܢ. ܓܲܝܵܣܵܐ
ܢܝܼܫܹܗ ܕܡܵܪܵܟ݂ ܗܵܐ ܐܝܼܬ݂ ܥܠܲܝ: ܕܪܘܼܡܚܵܐ ܘܚܲܪܒܵܐ ܒܹܗ ܩܵܗܝܵܐ.

ܘܲܓ݁ܙܵܪ ܕܝܼܢܵܐ ܒܹܗ ܡܸܫܬ݁ܪܸܐ: ܘܐܵܕ݂ܵܡ ܕܲܛܪܝܼܕ݂ ܒܹܗ ܡܸܬ݂ܦܢܸܐ܀
36
ܣ. ܟܪܘܿܒ݂ܵܐ
ܣܸܕ݂ܪܹ̈ܝ ܢܘܼܪܵܐ ܬܢܵܢ ܩܵܝܡܝ݂ܢ: ܐܲܠܦܹ̈ܐ ܘܬܸܓ̈ܡܹܐ²³ ܕܠܵܐ ܡܸܬ݂ܡܢܸܝܢ.

ܕܚܝ݂ܠܝ݂ܢ ܟܸܢܫܹ̈ܐ ܘܠܵܐ ܡܸܫܟ݁ܚܲܬ݁: ܕܬܸܪܕܸܐ ܘܬܸܥܘܿܠ²⁴ ܒܲܝܢܵܬ݂ܗܘܿܢ܀
37
ܣ. ܓܲܝܵܣܵܐ
ܣܸܕ݂ܪܹ̈ܐ ܘܟܸܢܫܹ̈ܐ ܕܐܹܡܲܪܬ݁ ܠܝܼ: ܙܩܝܼܦܵܐ ܚܵܙܹܝܢ ܘܡܸܣܬܲܪܕ݂ܝܼܢ:

ܘܐܵܬܹܗ ܕܲܒ݂ܪܵܐ ܠܗܘܿܢ ܡܲܪܗܒ݂ܵܐ: ܘܣܵܓ݁ܕ݂ܝܼܢ ܩܘܼܕ݂ܡܹܝܗ̇ ܘܠܝܼ ܡܝܲܩܪܝܼܢ܀
38
ܥ. ܟܪܘܿܒ݂ܵܐ
ܥܠ ܡܲܪܟܲܒ݂ܬ̣ܵܐ ܢܝܼܫܹܗ ܕܡܵܪܝ: ܓܢܹܐ ܒܲܬ݂ܪܘܿܢܘܿܣ ܘܡ̣ܢܲܢ ܟܣܹܐ ܗ̤ܘ.

ܘܐܲܢ݇ܬ݁ ܐܲܝܟܲܢܵܐ ܐܲܝܟ݂ ܕܐܵܡܪܲܬ݁: ܢܝܼܫܹܗ ܛܥܝܼܢ ܐܲܢ݇ܬ݁ ܘܲܡܙܲܝܚܲܬ݁܀
39
ܥ. ܓܲܝܵܣܵܐ
ܥܠ ܡܲܪܟܲܒ݂ܬ̣ܵܐ ܢܝܼܫܹܗ²⁵ ܠܥܹܠ: ܘܗܵܐ ܒܓܼܵܓ݁ܘܿܠܬܵܐ ܙܩܝܼܦܹܗ ܠܬܲܚܬ݁.

ܘܣܲܩܪܵܐ ܚܲܕ݂ܬ̣ܵܐ ܒܲܕ݂ܡܹܗ ܟܬܲܒ݂: ܕܢܲܦܢܹܐ ܠܐܵܕ݂ܵܡ ܠܓ̣ܵܘ ܓܲܢܬ݂ܵܐ܀
40
ܦ. ܟܪܘܿܒ݂ܵܐ
ܦܲܥܠܵܐ ܕܲܕ݂ܡܵܐ ܡ̇ܢ ܐܲܝܬ݁ܝܵܟ݂: ܩܵܛܹܠ ܐ݇ܢܵܫܵܐ ܡ̇ܢ ܫܲܕܪܵܟ݂.

ܪܘܼܡܚܵܐ ܠܲܛܫܵܐ ܘܐܸܢ ܡܲܡܪܚܸܬ²⁶: ܫܢܵܢܵܐ ܠܩܘܼܒ݂ܠܵܟ݂ ܡܸܫܬܲܠܗܒ݂ܵܐ܀
41
ܦ. ܓܲܝܵܣܵܐ
ܦܵܠܚܹܗ ܕܡܲܠܟܵܐ ܠܵܐ ܬܸܬ݂ܪܗܸܒ݂: ܫܪܸܐ ܗ̣݇ܘ ܫܘܼܠܛܵܢܵܟ݂ ܕܡܵܪܵܟ݂ ܨܒ݂ܵܐ.

ܙܩܝܼܦܵܐ ܐܵܬܵܐ ܐܲܝܬ݁ܝܬ݂ ܠܵܟ݂. ܐܸܢ ܫܲܪܝܼܪ ܠܵܐ ܬܸܬ݁ܦܝܼܪ܀
42
ܨ. ܟܪܘܿܒ݂ܵܐ
ܨܠܝܼܒܹܗ ܕܲܒ݂ܪܵܐ ܕܐܲܝܬ݁ܝܼܬ݁ ܠܝܼ: ܠܵܐ ܡܲܡܪܲܚ²⁷ ܐ݇ܢܵܐ ܕܐܹܚܘܼܪ ܒܹܗ.

ܫܲܪܝܼܪ ܘܲܕ݂ܚܝܼܠ ܘܠܵܐ ܡܸܬ݁ܟܠܹܝܬ݁: ܕܬܸܥܘܿܠ ܠܲܥܕܸܢ ܕܗܵܟܲܢ ܨܒ݂ܵܐ܀
43
ܨ. ܓܲܝܵܣܵܐ
ܨܠܝܼܒܹܗ ܕܡܵܪܲܢ ܣܝܵܓ݁ܵܐ ܬܪܲܥ: ܗ̇ܘ ܕܲܒ݂ܢܹܐ ܗَܘܵܐ ܒܹܝܬ݂ ܠܲـܟ݂ ܠܟ݂ܘܿܢ.

ܥܒܲܪ ܠܹܗ ܪܘܼܓ݁ܙܵܐ ܘܫܲܝܢܵܐ ܗ̤ܘܵܐ: ܘܐܘܼܪܚܵܐ ܕܲܥܕܸ݁ܢ ܠܵܐ ܦܵܣܩܵܐ܀
44
ܩ. ܟܪܘܿܒ݂ܵܐ
ܩܛܝܼܠܵܐ ܒܲܕܡܹܗ²⁸ ܫ̣ܠܲܚ ܣܲܗܕܲܢܝ: ܕܐܲܪܦܸܐ ܫܢܵܢܵܐ ܕܲܛܥܝܼܢ ܗ݇ܘܹܝܬ݂.

ܕܚܝܼܠܵܐ ܗ̇ܝ ܐܵܬܵܐ ܕܐܲܝܬ݁ܝܼܬ݁ ܠܝܼ: ܘܠܵܐ ܡܲܗܦܹـܟ݂ ܐܲܢ݇ܬ݁ ܥܘܿܠ ܝܵܪܬܵܐ܀
45
ܩ. ܓܲܝܵܣܵܐ
ܩܝܵܡܬܵܐ ܠܓܸܢܣܵܐ ܕܐ݇ܢܵܫܵܐ ܗ̤ܘܵܬ݀: ܕܲܣܚܝܼܦܝܼܢ ܗ݇ܘ̣ܵܘ ܡ̣ܢ ܐܲܬ݂ܪܗܘܿܢ.

ܟܪ̈ܘܿܒܹܐ ܘܥܝܼܪܹ̈ܐ ܥܲܡܲܢ ܚܕ݂ܵܘ: ܕܐܸܬ݂ܦܲܢܝܢܲܢ²⁹ ܠܲܡܕ݂ܝܼܢ݇ܬ݁ܟ݂ܘܿܢ܀
46
ܪ. ܟܪܘܿܒ݂ܵܐ
ܪܲܒ݁ ܗ̣݇ܘ ܚܢܵܢܵܐ ܕܗ̣ܘܵܐ³⁰ ܠܟ݂ܘܿܢ: ܝܲܠܕܵܘ̈ܗܝ ܕܐܵܕ݂ܵܡ ܕܲܚ̣ܛܵܐ ܘܡܝܼܬ݂.

ܥܘܿܠ ܓܲܝܵܣܵــܐ ܘܠܵܐ ܡܸܬ݂ܟ݁ܠܹܝܬ݁: ܦܬ݂ܝܼܚ ܗ̣݇ܘ ܬܲܪܥܵܐ ܠܲܕܸܬ݂ܵܝܒܝܼܢ³¹܀
47

ܪ. ܓܲܝܵܣܵܐ
ܪܲܒ݁ ܗ̣݇ܘ ܘܲܫܒ݂ܝܼܚ ܚܢܵܢܹܗ ܕܡܵܪܝ: ܕܪ̈ܲܚܡܵܘܗܝ ܣܵܥܪܘܼܗܝ ܕܚܘܼܒܹܗ ܥܨܵܝܗܝ³².

ܐܘܿ ܪ̈ܘܼܚܵܢܹܐ ܥܲܡܲــܢ ܚܕ݂ܵܘ: ܕܐܸܬ݂ܚܲܠܲܛܢܲܢ ܥܲܡ ܓܸܢܣܟ݂ܘܿܢ³³܀
48

ܫ. ܟܪܘܿܒ݂ܵܐ
ܫܢܵܢܵܐ ܘܚܲܪܒܵܐ ܕܲܛܥܝܼܢ ܗ݇ܘܹܝܬ݂: ܢܝܚܐ³⁴ ܙܲܓ݁ܪܵܗ̇ ܡ̣ـܢ ܓܸܢܣܟ݂ܘܿܢ.

ܛܪܝܼܕܹܐ ܕܲܦ̣ܢܵܘ ܠܵܐ ܬܸܕ݂ܚܠܘܼܢ: ܥܘܿܠܘ ܒܲܕ݂ܝܵܨܵܐ ܠܓ݁ܵܘ ܓܲܢܬ݂ܵܐ܀
49
ܫ.

ܫܘܼܒ݂ܚܵܐ ܒܲܥܕܸܢ ܕܐܸܫܬܲܝܢܲܬ݀: ܫܠܵܡܵܐ ܒܐܲܪܥܵܐ ܕܐܸܬ݂ܚܲܪܪܲܬ݀.

ܒܪܝܼـܟ݂ ܗ̣݇ܘ ܙܩܝܼܦܵܐ ܕܗ݀ܘ ܪܲܥܝܲـܢ: ܕܡ̣ܢ ܓܸܢܣܟ݂ܘܿܢ³⁵ ܠܵܐ ܢܸـܬ݂ܓ݁ܠܸܙ܀
50
ܬ:

ܬܵܘܕܝܼܬ݂ܵܐ ܠܵܟ݂ ܡܵܪܵܐ ܕܟ݂ܠ: ܕܐܲܦܢܝܼܬ݁ ܠܐܵܕ݂ܵܡ ܕܲܛܪܝܼܕ݂ ܗ݇ܘܵܐ.

ܘܲܠܓܲܝܵܣܵܐ ܕܪ̈ܲܚܡܹܐ ܫܐܸܠ: ܦܬܲܚܬܵܝܗܝ ܠܬܲܪܥܵܐ ܕܐܲܚܝܼܕ݂ ܗ݇ܘܵܐ܀
51
ܬ:

ܬܵܘܕܝܼܬ̣ܵܐ ܠܵܟ݂ ܕܲܒ݂ܡܸܠܬ݂ܵܟ݂: ܥܲܠ ܓܲܝܵܣܵܐ ܠܓܲܢܲܬ݂ ܥܕܸܢ.

ܘܣܲܒ݂ܪܵܐ ܛܵܒ݂ܵܐ ܠܐܵܕ݂ܵܡ ܗ̤ܘܵܐ: ܘܦ̣ܢܵܐ ܠܐܲܬ݂ܪܵܐ ܕܡ̣ܢܸܗ ܢܦܲܩ̣܀

1. This word is not found in the Ktawa d'turgame of the ACOE (KT)

2. ܨܠܝܼܒ݂ܵܐ in KT

3. ܕܲܥܕܹܢ in KT

4. ܕܢܸܥܘܿܠ in KT

5. ܕܲܠܒ݂ܝܟ݂ in KT

6. ܘܡܘܿܢ ܒܵܥܹܐ ܐܲܢ݇ܬ݁ in KT

7. ܕܠܝܼ ܡܫܲܐܠܲܬ݀ in KT

8. ܫܲܕܪܲܢܝ in KT

9. This whole verse is different in KT - ܘܪܘܼܡܚܵܐ ܕܢܘܼܪܵܐ ܠܹܗ ܢܵܛܪܵܐ

10. ܝܵܘܡܵܐ in KT

11. ܐܘܿ ܝܵܪܬܵܐ in KT

12. ܝܵܘܡܵܐ in K

13. ܕܬܸܕܲܥ in KT

14. ܡܸܬ݂ܦܪܲܥ in KT

15. ܘܗܵܐ ܡܸܬ݂ܦܪܲܥ in KT

16. ܓܸܢܣܟ݂ܘܿܢ in KT

17. ܛܵܒ݂ܵܐ in KT

18. ܕܲܛܥܵܐ in KT

19. ܡܝܼܬܹ̈ܐ in KT

20. ܗܵܢܵܐ ܕܠܵܐ in KT

21. ܚܲܪܒܵܟ݂ in KT

22. ܡ̣ܢ ܓܸܠܝܵܢܵܐ ܐܢ݇ܬ݁ ܠܵܐ ܚܙܲܝܬ݁: ܕܲܢܚܸܬ݂ ܡܵܪܵܟ݂ ܘܦܲܓ݂ܪܲܢ ܠܒܸܫ. ܘܲܢܝܼܚ ܠܵܕ݂ܵܡ ܕܐܲܒ݁ܝܼܕ݂ ܗ݇ܘ̣ܵܐ in KT

23. ܘܟܸܢܫܹ̈ܐ in KT

24. ܘܬܸܥܒܲܪ in KT

25. ܙܝܼܘܹܐ in KT

26. Last two sections are interchanged in KT - one says ܘܪܘܼܡܵܐ ܕܢܘܼܪܵܐ ܠܵܟ݂ ܢܵܛܪܵܐ

27. ܡܸܫܟܲܚ in KT

28. ܒܲܥܕܸܢ in KT

29. ܕܐܸܬ݂ܡܲܢܲܥܢܲܢ in KT

30. ܕܲܪܕ݂ܵܐ

31. ܩܕܵܡ ܓܸܢܣܟ݂ܘܿܢ in KT

32. ܨܒܵ in KT

33. ܟܸܢܫܟ݂ܘܿܢ in KT

34. ܙܩܝܼܦܵܐ in KT

35. ܥܸܢܝܵܢܟ݂ܘܿܢ in KT