Baslotha damwaraktha|ܒܲܨܠܘܿܬ݂ܵܗ̇ ܕܲܡܒܲܪܲܟ݂ܬܵܐ|ܒܨܠܘܬܗ ܕܡܒܪܟܬܐ

ܥܘܿܢܝܼܬ݂ܵܐ ܕܡܲܪܝܲܡ

ܫܲܒܲܚ... ܒܲܨܠܘܿܬ݂ܵܗ̇ ܕܲܡܒܲܪܲܟ݂ܬܵܐ: ܫܲܝܢܵܐ ܢܲܡܠܸـܟ݂ ܒܲܒ݂ܪܝܼܬ݂ܵܐ. ܘܲܒ݂ܒ݂ܵܥܘܼܬ݂ܵܐ ܕܲܒ݂ܬ݂ܘܼܠܬܵܐ: ܝܲܠܕܸܝ̈ܗ̇ ܕܥܹܕ݁ܬܵܐ ܢܸـܬ݂ܢܲܛܪܘܼܢ܀ ܚܲܝܠܵܐ ܕܲܢܚܸܬ݂ ܡ̣ܢ ܪܵܘܡܵܐ: ܘܩܲܕ݁ܫܵܗ̇ ܘܨܲܒ݁ܬ݂ܵܗ̇ ܠܐܝܼܩܵܪܹܗ. ܘܝܸܠܕܲܬ݀ ܢܘܼܗܪܵܐ ܫܲܪܝܼܪܵܐ: ܘܣܲܒ݂ܪܵܐ ܘܚܲܝܹ̈ܐ ܠܒܸܪ̈ܝܵܬ݂ܵܐ. ܢܸܗܘܸܐ ܥܲܡܲܢ ܘܒܲܝܢܵܬܲܢ: ܟܠܗܘܿܢ ܝܵܘ̈ܡܵܬܵܐ ܕܚܲܝܝ̈ܢ. ܘܢܲܐܣܸܐ ܠܡܲܪ̈ܥܹܐ ܘܠܲܟ݂ܪ̈ܝܼܗܹܐ: ܘܠܐܲܝܠܹܝܢ ܕܲܪܡܹܝܢ ܒܢܸܣܝܘܿܢܹ̈ܐ. ܘܢܲܦܢܸܐ ܠܐܲܝܠܹܝܢ ܕܐܝܼܬܲܝܗܘܿܢ: ܒܐܘܼܪ̈ܚܵܬ݂ܵܐ ܪ̈ܲܚܝܼܩܵܬ݂ܵܐ. ܒܲܫܠܵܡܵܐ ܠܓ݂ܵܘ ܒܵܬܲܝ̈ܗܘܿܢ: ܕܠܵܐ ܢܸܬ݂ܢ̱ܟ݂ܘܢ ܡ̣ܢ ܒܝܼܫܵܐ܀ ܘܐܲܝܠܹܝܢ ܕܲܒ݂ܝܲܡܡܹ̈ܐ ܪܵܕܹܝܢ: ܢܸܫܬܵܘܙܒ݂ܘܼܢ ܡ̣ܢ ܟܝܼܡܘܿܢܹ̈ܐ. ܘܐܲܝܠܹܝܢ ܕܲܒ݂ܝܲܒ݂ܫܵܐ ܡܗܲܠܟ݂ܝܼܢ: ܢܸـܬ݂ܦܲܨܘܿܢ ܡ̣ܢ ܒܲܪܒ݁ܪ̈ܵܝܹܐ. ܘܐܲܝܠܹܝܢ ܕܲܒ݂ܫܸܒ݂ܝܵܐ ܐܸܫܬ݁ܒ݂ܝܼܘ: ܢܸܫܬ݁ܪܘܿܢ ܡ̣ܢ ܐܲܣܘܼܪ̈ܲܝܗܘܿܢ. ܘܐܲܝܠܹܝܢ ܕܒܲܩܛܝܼܪܵܐ ܕܒ݂ܝܼܪܝܼܢ: ܚܢܵܢܵـܟ݂ ܢܒܲܝܲܐ ܟܲܪܝܘܼܬ݂ܗܘܿܢ. ܘܐܲܝܠܹܝܢ ܕܒ݂ܝܼܫܵܐ ܫܵܚܹܩ ܠܗܘܿܢ: ܢܸܓ݂ܥܘܿܪ ܒܹܗ ܚܲܝܠܵܟ݂ ܪܲܒܵܐ. ܘܐܲܝܠܹܝܢ ܕܒܲܚܛܵܗܹ̈ܐ ܡܗܲܠܟ݂ܝܼܢ: ܚܲܣܵܐ ܘܲܫܒ݂ܘܿܩ ܚܵܘ̈ܒܲܝܗܘܿܢ. ܘܐܲܝܠܹܝܢ ܕܩܲܪܸܒ݂ܘ ܩܘܼܪ̈ܒܵܢܹܐ: ܬܸܬ݁ܢܝܼܚ ܒܗܘܿܢ ܐܲܠܵܗܘܼܬ݂ܵܟ݂. ܘܐܲܝܠܹܝܢ ܕܲܫܟܸـܒ݂ܘ ܥܲܠ ܣܲܒ݂ܪܵܟ݂: ܢܲܚܸܡ ܘܐܲܚܵܐ ܒܛܲܝܒ݁ܘܼܬ݂ܵܟ݂܀ ܘܲܚܢܲܢ ܕܐܸܚܲܕ݂ܢܲܢ ܓܵܘܣܵܐ: ܒܲܨܠܘܿܬ݂ܵܗ̇ ܕܲܡܒܲܪܲܟ݂ܬܵܐ. ܡܲܪܝܲܡ ܒܬ݂ܘܼܠܬܵܐ ܩܲܕ݁ܝܼܫܬܵܐ: ܐܸܡܹܗ ܕܝܼܫܘܿܥ ܦܵܪܘܿܩܲܢ. ܒܵܗ̇ ܢܸܬ݂ܢ̱ܛܲܪ ܡ̣ܢ ܒܝܼܫܵܐ: ܘܢܸܙܟܸ݁ܐ ܠܟ݂ܠܗܹܝܢ ܨܸܢ̈ܥܵܬܹܗ܀ ܘܲܒ݂ܗܵܘ̇ ܝܵܘܡܵܐ ܪܲܒܵܐ ܕܒ݂ܘܼܚܪܵܢܵܐ: ܕܩܵܝܡܝܼܢ ܡܝܼ̈ܬܹܐ ܡ̣ܢ ܩܲܒ݂ܪܹ̈ܐ: ܘܦܵܪܫܝܼܢ ܛܵܒܵܐ ܡ̣ܢ ܒܝܼܫܹ̈ܐ. ܢܸܫܬ݁ܘܸܐ ܕܥܲܡܵܗ̇ ܢܸܬ݂ܒܲܣܲܡ: ܒܲܓ݂ܢܘܿܢܵܐ ܕܡܲܠܟ݁ܘܼܬ݂ ܪܵܘܡܵܐ: ܘܢܸܙܡܲܪ ܫܘܼܒ݂ܚܵܐ ܬܠܝܼܬ݂ܵܝܵܐ: ܠܐܲܒ݂ܵܐ ܘܲܒ݂ܪܵܐ ܘܪܘܼܚܩܘܼܕ݂ܫܵܐ.