B'endan Sapra d'Methpathhin|ܒܥܸܕܵܢ ܨܲܦܪܵܐ ܕܡܸܬ݂ܦܲܬ݂ܚܝܼܢ|ܒܥܸܕܵܢ ܨܦܪܐ ܕܡܬܦܬܚܝܢ

ܡܵܪܝܵܐ ܒܨܲܦܪܵܐ ܬܸܫܡܲܥ ܩܵܠܝ. ܒܥܸܕܵܢ ܨܲܦܪܵܐ ܕܡܸܬ݂ܦܲܬ݂ܚܝܼܢ: ܬܲܪ̈ܥܲܝ ܪܵܘܡܵܐ ܠܲܨܠܘܿܬ݂ܵܐ: ܩܲܒܸ݁ܠ ܡܵܪܲܢ ܒܵܥܘܼܬܲܢ. ܘܦܲܢܵܐ ܒܪ̈ܲܚܡܲܝܟ ܫܹܐ̈ܠܵܬܲܢ: ܘܲܥܒܸܕ݂ ܣܲܒ݂ܪܵܐ ܘܦܘܼܪܩܵܢܵܐ: ܠܢܲܦ̮ܫ̈ܵܬ݂ܵܐ ܕܲܡܣܲܟ݁ܝܵܢ ܠܵܟ݂.

ܘܲܒ݂ܨܲܦܪܵܐ ܐܸܬ݁ܛܲܝܲܒ݂ ܘܐܸܬ݂ܚܙܸܐ ܠܵܟ݂. ܨܲܦܪܹܗ ܕܡܵܪܲܢ ܡܲܛܝܼ ܠܹܗ: ܘܡ̣ܢ ܫܹܠܝ ܕܵܢܲܚ ܦܵܪܘܿܩܲܢ: ܘܲܠܟܹܐܢܹ̈ܐ ܝܵܗܹܒ݂ ܐܲܓ݂ܪܵܐ. ܘܛܘܼܒ݂ܵܘܗܝ ܠܐܲܝܢܵܐ ܕܐܸܬ݂ܟܲܫܲܪ: ܘܲܦܠܲܚ ܒܟܲܪܡܹܗ ܕܲܡܫܝܼܚܵܐ: ܘܲܢܣܲܒ݂ ܐܲܓ݂ܪܹܗ ܡܲܠܝܵܐܝܼܬ݂.

ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ. ܒܥܸܕܵܢ ܨܲܦܪܵܐ ܫܘܼܒ݂ܚܵܐ ܠܵܟ݂: ܡ̣ܢ ܥܸܠܵܝܹ̈ܐ ܘܬܲܚܬܵܝܹ̈ܐ: ܒܪܵܐ ܕܝܵܬܹܒ݂ ܡ̣ܢ ܝܲܡܝܼܢܵܐ. ܕܲܠܩܵܠ ܩܲܪܢܵܐ ܡܸܬ݁ܬ݁ܥܝܼܪܝܼܢ: ܣܵܒܹ̈ܐ ܥܠܲܝܡܹ̈ܐ ܘܝܲܠܘܼ̈ܕܸܐ: ܕܲܠܬܸܫܒ݁ܘܿܚܬܵܟ݂ ܒܪܲܝܬ݁ ܐܸܢܘܿܢ. 

ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ. ܛܘܼܒ݂ܵܘܗܝ ܠܐܲܝܢܵܐ ܕܐܸܬ݁ܬܲܓܲܪ: ܐܲܝܟ݂ ܬܹܐܓ݂ܘܼܪܬܵܟ݂ ܐܘܿ ܐܲܒ݂ܘܼܢ: ܘܟܲܢܸܫ ܥܘܼܬ݂ܪܵܐ ܪܘܼܚܵܢܵܐ. ܘܲܡܠܵܐ ܐܸܠܦܹܗ ܟܠ ܛܘܼܒ݂ܝܼ̈ܢ: ܘܲܬ݂ܪܲܨ ܘܲܢܦܲܩ ܠܲܠܡܹܐܢܵܐ: ܠܒܹܝܬ݂ ܘܲܥܕܵܐ ܕܟ݂ܠܗܘܿܢ ܟܹܐܢܹ̈ܐ.

ܢܹܐܡܲܪ ܟܠܹܗ ܥܲܡܵܐ ܐܵܡܹܝܢ ܘܐܵܡܹܝܢ. ܡܵܪܲܢ ܬܹܐܬܸܐ ܡܲܠܟܘܼܬ݂ܵܟ݂: ܘܢܸܗܘܸܐ ܒܐܲܪܥܵܐ ܨܸܒ݂ܝܵܢܵܟ݂: ܐܲܟ݂ܡܵܐ ܕܐܝܼܬ݂ܵܘܗܝ ܒܲܫܡܲܝܵܐ. ܗܲܒ݂ܠܲܢ ܠܲܚܡܵܐ ܕܣܘܼܢܩܵܢܲܢ: ܘܠܵܐ ܬܲܥܸܠܲܝܢ ܠܢܸܣܝܘܿܢܵܐ: ܐܸܠܵܐ ܦܲܨܵܢ ܡ̣ܢ ܒܝܼܫܵܐ܀