B'thar'a D'shulama|ܒܬܲܪܥܵܐ ܕܫܘܼܠܵܡܵܐ|ܒܬܪܥܐ ܕܫܘܠܡܐ

ܕܒ݂ܵܣܵܠܝܼܩܹ̈ܐ. ܒܲܪܸܟ݂ܘ ܠܢܲܦ̮ܫܝ ܠܡܵܪܝܵܐ: ܩܵܝ̈ܡܵܢ ܗ̣݇ܘܲܝ̈ ܪܸ̈ܓ݂ܠܲܝ ܒܬܲܪ̈ܥܲܝܟ݁ܝ ܐܘܿܪܸܫܠܸܡ. ܣܲܒܲܪ ܒܐܲܠܵܗܵܐ ܘܲܥܒܸ̇ܕ݂ ܛܵܒ݂ܬ݂ܵܐ: ܘܚܲܝܲܝ̈ ܠܲܫܝܘܿܠ ܡܲܛ̣ܝܼܘ. ܕܨܘܼܪܬܵܐ. ܬܲܪܥܵܐ ܓܹܝܪ ܪܲܒܵܐ ܕܲܡܠܸܐ ܣܘܼܥܪ̈ܵܢܹܐ. ܒܬܲܪܥܵܐ ܕܫܘܼܠܵܡܵܐ ܕܚܲܝܲܝ̈ܟ݁ܝ ܩܵܝ̇ܡܲܬ݁ܝ ܢܲܦ̮ܫܝ ܕܵܘܝܼܬ݂ܵܐ. ܗܵܪܟܵܐ ܐܝܼܬ݂ܠܹܟ݂ܝ ܐܲܬ݂ܪܵܐ ܠܡܸܒ݂ܥܵܐ ܫܘܼܒ݂ܩܵܢܵܐ. ܬܲܡܵܢ ܓܹܝܪ ܕܸܡܥܹ̈ܐ ܠܵܐ ܡܵܘܬ݁ܪ̈ܵܢ. ܐܵܦܠܵܐ ܬܝܵܒ݂ܘܼܬ݂ܵܐ ܡܥܲܕ݁ܪܵܐ. ܕܡܵܐ ܕܥܲܠ̣ ܠܹܗ ܚܵܬ݂ܢܵܐ. ܘܲܙܡܝܼܢܵܘ̈ܗܝ ܥܵܐ̇ܠܝܼܢ ܥܲܡܹܗ. ܘܡܸܬ݁ܬ݁ܚܸܕ݂ ܠܹܗ ܬܲܪܥܵܐ. ܘܥܵܒ݂̇ܪܵܐ ܠܹܗ ܘܹܐܠܵܐ. ܡܸܟܹ݁ܝܠ ܡܲܢܘܼ ܣܲܒ݂ܪܝ ܐܸܠܵܐ ܐܸܢ ܐܲܢ݇ܬ݁ ܡܵܪܝܵܐ. ܪܵܚܹ̇ܡ ܐ݇ܢܵܫ̈ܵܐ ܐܲܠܵܗܵܐ ܚܘܼܣ ܥܠܲܝ.

ܘܫܲܒܲܚ. ܒܬܲܪܥܵܐ ܕܫܘܼܠܵܡܵܐ ܕܚܲܝܲܝ̈ܟ݁ܝ ܩܵܝ̇ܡܲܬ݁ܝ ܢܲܦ̮ܫܝ ܕܵܘܝܼܬ݂ܵܐ. ܗܵܪܟܵܐ ܐܝܼܬ݂ܠܹܟ݂ܝ ܐܲܬ݂ܪܵܐ ܠܡܸܒ݂ܥܵܐ ܫܘܼܒ݂ܩܵܢܵܐ. ܬܲܡܵܢ ܓܹܝܪ ܕܸܡܥܹ̈ܐ ܠܵܐ ܡܵܘܬ݁ܪ̈ܵܢ. ܐܵܦܠܵܐ ܬܝܵܒ݂ܘܼܬ݂ܵܐ ܡܥܲܕ݁ܪܵܐ. ܕܡܵܐ ܕܥܲܠ̣ ܠܹܗ ܚܵܬ݂ܢܵܐ. ܘܲܙܡܝܼܢܵܘ̈ܗܝ ܥܵܐ̇ܠܝܼܢ ܥܲܡܹܗ. ܘܡܸܬ݁ܬ݁ܚܸܕ݂ ܠܹܗ ܬܲܪܥܵܐ. ܘܥܵܒ݂̇ܪܵܐ ܠܹܗ ܘܹܐܠܵܐ. ܡܸܟܹ݁ܝܠ ܡܲܢܘܼ ܣܲܒ݂ܪܝ ܐܸܠܵܐ ܐܸܢ ܐܲܢ݇ܬ݁ ܡܵܪܝܵܐ. ܪܵܚܹ̇ܡ ܐ݇ܢܵܫ̈ܵܐ ܐܲܠܵܗܵܐ ܚܘܼܣ ܥܠܲܝ:

ܥܵܠܲܡ. ܥܢܝܼ ܠܣܵܓ݂ܘܿܕܲܝ̈ܟ ܡܫܝܼܚܵܐ: ܘܫܲܕܲܪ ܠܲܢ ܡ̣ܢ ܒܹܝܬ݂ ܓܲܙܵܟ݂: ܚܢܵܢܵܐ ܘܪ̈ܲܚܡܹܐ ܘܦܘܼܪܩܵܢܵܐ: ܘܫܘܼܒ݂ܩܵܢܵܐ ܕܚܵܘܒܹ̈ܐ. ܘܐܲܝܟ݂ ܕܲܥ̣ܢܲܝܬܵܝܗܝ ܠܕ݂ܵܢܝܼܐܹܝܠ ܡ̣ܢ ܓܘܼܒܵܐ ܕܐܲܪ̈ܝܵܘܵܬ݂ܵܐ: ܘܠܲܕ݂ܒܹܝܬ݂ ܚܲܢܵܢܝܵܐ ܒܐܲܬ݁ܘܿܢܵܐ ܕܢܘܼܪܵܐ. ܐܵܦܠܲܢ ܡܵܪܲܢ ܫܵܘܙܸܒܲܝܢ ܡ̣ܢ ܡܲܠܟܹ̈ܐ ܘܫܲܠܝܼܛܵܢܹ̈ܐ: ܘܐ݇ܢܵܫ̈ܵܐ ܒܝܼܫܹ̈ܐ ܘܫܹܐ̈ܕܹܐ ܛܪ̈ܘܼܢܹܐ: ܕܒܲܕ݂ܡܘܼܬ݂ ܐܲܪ̈ܝܵܘܵܬ݂ܵܐ ܠܚܝܼܡܝܼܢ ܥܠܲܝܢ ܕܢܵܘܒ݁ܕ݂ܘܼܢܵܢ: ܒܚܲܝܠܵܟ݂ ܬܲܩܝܼܦܵܐ: ܫܲܝܸܢ ܫܓ݂ܝܼܫܘܼܬ݂ܗܘܿܢ: ܘܦܲܨܵܢ ܡ̣ܢ ܒܝܼܫܘܼܬ݂ܗܘܿܢ: ܘܒܲܛܸܠ ܫܘܼܠܛܵܢܗܘܿܢ: ܘܚܲܕܵܢ ܒܦܘܼܪܩܵܢܵܟ݂ ܡܲܠܟܵܐ ܡܫܲܒ݁ܚܵܐ.

ܢܹܐܡܲܪ. ܡܲܪܝܲܡ ܒܬ݂ܘܼܠܬܵܐ ܩܲܕ݁ܝܼܫܬܵܐ: ܐܸܡܹܗ ܕܝܼܫܘܿܥ ܦܵܪܘܿܩܲܢ. ܐܸܬ݂ܟܲܫܲܦܝ ܘܲܒ݂ܥܵܝ ܪ̈ܲܚܡܹܐ: ܠܝܲܠܕܵܐ ܕܲܕ݂ܢܲܚ ܡ̣ܢ ܥܘܼܒܹ݁ܟ݂ܝ. ܕܢܲܥܒܲܪ ܡ̣ܢܲܢ ܒܛܲܝܒ݁ܘܼܬܹܗ: ܙܲܒ݂ܢܹ̈ܐ ܕܲܡܠܹܝܢ ܥܵܩ̈ܵܬ݂ܵܐ. ܘܲܢܨܲܝܸܒ݂ ܠܲܢ ܫܲܝܢܵܐ ܘܲܫܠܵܡܵܐ: ܘܲܒ݂ܝܲܕ݂ ܨ̈ܠܵܘܵܬܹܟ݂ܝ ܬܸܬ݂ܢ̱ܛܲܪ ܥܹܕ݇ܬܵܐ ܘܝܲܠܕܹܝ̈ܗ̇ ܡ̣ܢ ܒܝܼܫܵܐ. ܘܲܒ݂ܝܵܘܡܵܐ ܫܒ݂ܝܼܚܵܐ ܕܡܸܬ݂ܓܲܠܝܵܐ ܪܲܒ݁ܘܼܬܹܗ: ܢܸܫܬ݁ܘܸܐ ܕܥܲܡܹܟ݂ܝ ܢܸܬ݂ܒܲܣܲܡ ܒܲܓ݂ܢܘܿܢ ܢܘܼܗܪܵܐ.