Etta qay leh|ܥܹܕܬܵܐ ܩܥܵܝ ܠܹܗ|ܥܕܬܐ ܩܥܝ ܠܗ

ܥܹܕܬܵܐ ܩܥܵܝ ܠܹܗ ܐܘܿܫܲܥܢܵܐ

ܣܘܿܓ݁ܝܼܬ݂ܵܐ ܕܐܘܿܫܲܥܢܹ̈ܐ.

ܥܹܕܬܵܐ ܩܥܵܝ ܠܹܗ ܐܘܿܫܲܥܢܵܐ؛ ܠܒܲܪ ܐܲܠܵܗܵܐ ܐܘܿܫܲܥܢܵܐ؛ ܒܩܵܠܹ̈ܐ ܚܠܲܝ̈ܵܐ ܐܘܿܫܲܥܢܵܐ. ܥܲܡ ܝܲܠܘܼܕܹ̈ܐ ܒܢܲܝ̈ ܐܘܿܪܸܫܠܸܡ ܕܲܡܫܲܒ݁ܚܝܼܢ ܗ݇ܘ̣ܵܘ ܐܘܿܫܲܥܢܵܐ؛ ܐܘܿܫܲܥܢܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܓܘܼܕ̈ܝܼܢ ܓܘܼܕ̈ܝܼܢ ܐܘܿܫܲܥܢܵܐ؛ ܣܸܕ݂ܪ̈ܝܼܢ ܣܸܕ݂ܪ̈ܝܼܢ ܐܘܿܫܲܥܢܵܐ؛ ܟܸܢܫ̈ܝܼܢ ܟܸܢܫ̈ܝܼܢ ܐܘܿܫܲܥܢܵܐ. ܢܦܲܩܘ ܥܸܒ݂ܪ̈ܵܝܹܐ ܒܲܚܕ݂ܵܐ ܫܵܘܝܘܼ ܘܡܲܙܥ̱ܩܝܼܢ ܗ݇ܘ̣ܵܘ. ܐܘܿܫܲܥܢܵܐ؛ ܐܘܼܫܲܥܢܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܛܠܵܝܹ̈ܐ ܡܫܲܒ݁ܚܝܼܢ ܐܘܿܫܲܥܢܵܐ؛ ܥܘܼܠܹ̈ܐ ܡܒܲܪܟ݂ܝܼܢ ܐܘܿܫܲܥܢܵܐ؛ ܫܲܒ݂ܪܹ̈ܐ ܡܝܲܒ݁ܒ݂ܝܼܢ ܐܘܿܫܲܥܢܵܐ؛ ܘܲܚܣܲܡ̣ܘ ܣܵܒܹ̈ܐ ܒܩܵܠ ܝܲܠܘܼܕܹ̈ܐ ܕܩܵܥܹ̇ܝܢ ܘܐܵܡ̇ܪܝܼܢ. ܐܘܿܫܲܥܢܵܐ؛ ܐܘܿܫܲܥܢܵܐ؛ ܐܘܿܫܲܥܢܵܐ ܠܵܟ݂ ܒܲܡܪ̈ܵܘܡܹܐ.܀

ܛܠܵܝܹ̈ܐ ܒܘܼܪܹ̈ܐ ܒܪܝܼܟ݂ ܕܐܸܬ݂ܵܐ؛ ܫܲܒ݂ܪܹ̈ܐ ܒܪܝܼܪܹ̈ܐ ܒܪܝܼܟ݂ ܕܐܸܬ݂ܵܐ؛ ܕܠܵܐ ܒܲܥܝܵܕ݂ܵܐ ܒܪܝܼܟ݂ ܕܐܸܬ݂ܵܐ. ܠܥܸܠ ܡ̣ܢ ܟܝܵܢܵܐ ܠܡܵܪܹܐ ܟܝܵܢܹ̈ܐ ܡܪܲܡܪܡܝܼܢ ܗ݇ܘ̣ܵܘ. ܒܪܝܼܟ݂ ܕܐܸܬ݂ܵܐ؛ ܒܪܝܼܟ݂ ܕܐܸܬ݂ܵܐ. ܒܪܝܼܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ.܀

ܒܲܦܫܝܼܛܘܼܬ݂ܗܘܿܢ ܒܪܝܼܟ݂ ܕܐܸܬ݂ܵܐ؛ ܠܣܵܦܪܹ̈ܐ ܐܲܒ݂ܗܸܬ݂ܘ ܒܪܝܼܟ݂ ܕܐܸܬ݂ܵܐ؛ ܒܣܸܦܪܹ̈ܐ ܚܲܕܬܹ̈ܐ ܒܪܝܼܟ݂ ܕܐܸܬ݂ܵܐ. ܘܟܲܕ݂ ܠܵܐ ܝܼܠܸܦܘ ܠܡܲܠܦܲܝ̈ ܥܲܡܵܐ ܡܲܬ݂ܡܗܝܼܢ ܗ݇ܘ̣ܵܘ. ܒܪܝܼܟ݂ ܕܐܸܬ݂ܵܐ؛ ܒܪܝܼܟ݂ ܕܐܸܬ݂ܵܐ. ܒܪܝܼܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ.܀

ܬܗܲܪܘ ܩܲܫܝܼܫܹ̈ܐ ܒܪܝܼܟ݂ ܕܐܸܬ݂ܵܐ؛ ܘܲܬ݂ܡܲܗܘ ܦܪ̈ܝܼܫܹܐ ܒܪܝܼܟ݂ ܕܐܸܬ݂ܵܐ؛ ܘܩܵܡ̣ܘ ܐܲܝܟ݂ ܟܬ݂ܝܼܫܹ̈ܐ ܒܪܝܼܟ݂ ܐܸܬ݂ܵܐ. ܕܲܫܡܲܥܘ ܩܵܠܹ̈ܐ ܕܡ̣ܢ ܒܢܲܝ̈ܢܵܫܵܐ ܠܵܐ ܐܸܫܬ݁ܡܲܥܘ ܗ݇ܘ̣ܵܘ. ܒܪܝܼܟ݂ ܕܐܸܬ݂ܵܐ؛ ܒܪܝܼܟ݂ ܕܐܸܬ݂ܵܐ؛ ܒܪܝܼܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ.܀

ܗܲܠܸܠܘ ܟܸܢܫܹ̈ܐ ܩܲܕܝܼܫܲܬ݁؛ ܩܲܕܸܫܘ ܥܝܼܪܹ̈ܐ ܩܲܕܝܼܫܲܬ݁؛ ܘܲܩ̣ܥܵܘ ܡܵܘܬ݁ܒܹ̈ܐ ܩܲܕܝܼܫܲܬ݁. ܬܸܓ݁ܡܹ̈ܐ ܦܫܝܼܛܹ̈ܐ ܒܩܵܠܹ̈ܐ ܚܦܝܼܛܹ̈ܐ ܡܲܙܥ̱ܩܝܼܢ ܗ݇ܘ̣ܵܘ. ܩܲܕܝܼܫܲܬ݁؛ ܩܲܕܝܼܫܲܬ݁؛ ܩܲܕܝܼܫܲܬ݁ ܒܪܵܐ ܕܐܲܠܵܗܵܐ.܀

ܟܪ̈ܘܿܒܹܐ ܩܲܠܣܘܼܗܝ ܩܲܕܝܼܫܲܬ݁؛ ܘܡܵܪ̈ܵܘܵܬ݂ܵܐ ܩܲܕܝܼܫܲܬ݁؛ ܚܲܝܠܹ̈ܐ ܐܲܙܥܸܩ̣ܘ ܩܲܕܝܼܫܲܬ݁. ܐܵܦ ܫܘܼܠܛܵܢܹ̈ܐ ܥܲܡ ܕܒܹܝܬ݂ ܐܲܪ̈ܟ݁ܘܿܣ ܡܪܲܡܪܡܝܼܢ ܗ݇ܘ̣ܵܘ. ܩܲܕܝܼܫܲܬ݁؛ ܩܲܕܝܼܫܲܬ݁؛ ܩܲܕܝܼܫܲܬ݁؛ ܒܪܵܐ ܕܐܲܠܵܗܵܐ.܀

ܩܥ̣ܵܘ ܡܲܠܲܐܟܹ̈ܐ ܩܲܕܝܼܫܲܬ݁؛ ܘܪܵܘܪ̈ܒ݂ܵܢܲܝܗܘܿܢ ܩܲܕܝܼܫܲܬ݁؛ ܒܲܟ݂ܢܝܼܫܘܼܬ݂ܗܘܿܢ ܩܲܕܝܼܫܲܬ݁؛ ܣܸܕܪܹ̈ܐ ܕܪܵܘܡܵܐ ܠܬܸܓ݁ܡܹ̈ܐ ܕܥܘܼܡܩܵܐ ܒܚܘܼܒܵܐ ܫܠܸܡܘ ܗ݇ܘ̣ܵܘ؛ ܩܲܕܝܼܫܲܬ݁؛ ܩܲܕܝܼܫܲܬ݁؛ ܩܲܕܝܼܫܲܬ݁؛ ܒܪܵܐ ܕܐܲܠܵܗܵܐ.܀

ܩܘܼܡܘ ܒܢܲܝ̈ ܥܹܕܬܵܐ ܫܲܒ݁ܚܘܼܢܵܝܗܝ؛ ܘܲܒ݂ܩܵܠܲܝ̈ܟ݁ܘܿܢ ܫܲܒ݁ܚܘܼܢܵܝܗܝ؛ ܘܲܒ݂ܦܘܼܡܲܝ̈ܟ݁ܘܿܢ ܫܲܒ݁ܚܘܼܢܵܝܗܝ. ܩ̣ܥܵܘ ܫܵܘܝܵܐܝܼܬ݂ ܥܲܡ ܝܲܠܘܼܕܹ̈ܐ ܕܲܡܫܲܒ݁ܚܝܼܢ ܗ݇ܘ̣ܵܘ. ܫܲܒ݁ܚܘܼܢܵܝܗܝ؛ ܫܲܒ݁ܚܘܼܢܵܝܗܝ؛ ܫܲܒ݁ܚܘܼܢܵܝܗܝ؛ ܕܐܲܠܵܗܟ݂ܘܿܢ ܗܘ̤.܀

ܚܠܵܦ ܣܵܘܟܵܬ̣̈ܵܐ ܫܲܒ݁ܚܘܼܢܵܝܗܝ؛ ܛܥܲܢܘ ܬܸܫܒ݁ܚܵܬ̣̈ܵܐ ܫܲܒ݁ܚܘܼܢܵܝܗܝ؛ ܥܲܡ ܬܵܘܕܝܵܬ̣̈ܵܐ ܫܲܒ݁ܚܘܼܢܵܝܗܝ؛؛ ܘܲܚܠܵܦ ܢܲܚܬܹ̈ܐ ܫܵܘܵܘ ܩܕ݂ܵܡܵܘܗܝ ܠܸܒܵܘܵܬ̣̈ܵܐ ܫܲܒ݁ܚܘܼܢܵܝܗܝ؛ ܫܲܒ݁ܚܘܼܢܵܝܗܝ؛ ܫܲܒ݁ܚܘܼܢܵܝܗܝ؛ ܕܐܲܠܵܗܟ݂ܘܿܢ ܗܘ̤.܀

ܫܵܘܹܐ ܠܫܘܼܒ݂ܚܵܐ ܫܲܒ݁ܚܘܼܢܵܝܗܝ. ܟܝܵܢܹܗ ܡܫܲܒ݁ܚܵܐ ܫܲܒ݁ܚܘܼܢܵܝܗܝ؛ ܘܲܙܥܘܿܪܝܼܢ ܠܹܗ ܫܲܒ݁ܚܘܼܢܵܝܗܝ؛ ܟܠ ܡܫܲܒ݁ܚܵܢܹ̈ܐ ܕܲܡܫܲܒ݁ܚܝܼܢ ܠܹܗ ܐܲܝܟ݂ ܕܲܦܐܹܐ ܠܹܗ؛ ܫܲܒ݁ܚܘܼܢܵܝܗܝ. ܫܲܒ݁ܚܘܼܢܵܝܗܝ؛ ܫܲܒ݁ܚܘܼܢܵܝܗܝ؛ ܕܐܲܠܵܗܟ݂ܘܿܢ ܗܘ̤.܀

ܡܵܪܝܵܐ ܡܵܪܲܢ ܫܘܼܒ݂ܚܵܐ ܠܵܟ݂؛ ܡ̇ܢ ܐܲܟ݂ܘܵܬ݂ܵܟ݂ ܫܘܼܒ݂ܚܵܠܵܟ݂؛ ܕܠܲܝܬ݁ ܕܕ݂ܵܡܹܐ ܠܵܟ݂̣؛ ܫܘܼܒ݂ܚܵܐ ܠܵܟ݂؛ ܐܸܠܵܐ ܐܲܒ݂ܘܼܟ݂ ܕܐܲܢ݇ܬ݁ ܐܲܟ݂ܘܵܬܹܗ ܘܗܘ̤ ܐܲܟ݂ܘܵܬ݂ܵܟ݂؛ ܫܘܼܒ݂ܚܵܐ ܠܵܟ݂ ܫܘܼܒ݂ܚܵܐ ܠܵܟ݂ ܫܘܼܒ݂ܚܵܐ ܠܵܟ݂؛ ܕܠܲܝܬ݁ ܐܲܟ݂ܘܵܬ݂ܵܟ݂.܀

ܒܟ݂ܠ ܢܸܫܡܵܬ̣̈ܵܐ ܫܘܼܒ݂ܚܵܠܵܟ݂؛ ܘܲܒ݂ܟ݂ܠ ܣܵܘܩܹ̈ܐ ܫܘܼܒ݂ܚܵܐ ܠܵܟ݂؛ ܘܲܒ݂ܟ݂ܠ ܪ̈ܦܵܦܹܐ ܫܘܼܒ݂ܚܵܐ ܠܵܟ݂. ܥܲܡ ܟܠ ܙܵܘܥܹ̈ܐ ܕܟ݂ܠ ܚܘܼܫܵܒܹ̈ܐ ܕܟ݂ܠܗܘܿܢ ܡܠܝܼܠܹ̈ܐ. ܫܘܼܒ݂ܚܵܐ ܠܵܟ݂؛ ܫܘܼܒ݂ܚܵܐ ܠܵܟ݂؛ ܫܘܼܒ݂ܚܵܐ ܠܵܟ݂؛ ܕܠܲܝܬ݁ ܐܲܟ݂ܘܵܬ݂ܵܟ݂.܀

ܒܪܝܼܬ݂ܵܐ ܟܠܵܗ̇ ܫܘܼܒ݂ܚܵܐ ܠܵܟ݂؛ ܥܲܡ ܥܵܡܘܿܪܹ̈ܝܗ̇ ܫܘܼܒ݂ܚܵܐ ܠܵܟ݂؛ ܙܥܘܿܪܝܼܢ ܠܫܘܼܒ݂ܚܵܟ݂ ܫܘܼܒ݂ܚܵܐ ܠܵܟ؛ ܕܲܡܫܲܒܲܚܲܬ݁ ܘܪܵܡܘܼ ܫܘܼܒ݂ܚܵܟ݂ ܡ̣ܢ ܡܫܲܒ݁ܚܵܢܹ̈ܐ؛ ܫܘܼܒ݂ܚܵܐ ܠܵܟ݂؛ ܫܘܼܒ݂ܚܵܐ ܠܵܟ݂؛ ܫܘܼܒ݂ܚܵܠܵܐ ܠܵܟ݂؛ ܕܠܲܝܬ݁ ܐܲܟ݂ܘܵܬܵܟ݂.܀

ܚܵܘܵܐ ܐܲܦܲܝ̈ܟ ܒܡܲܠܟ݁ܘܼܬ݂ܵܟ݂؛ ܠܲܡܪܲܟ݁ܒ݂ܵܢܵܐ ܒܡܲܠܟ݁ܘܼܬ݂ܵܟ݂؛ ܐܵܦ ܠܐܵܡܘܿܪܹ̈ܐ ܒܡܲܠܟ݁ܘܼܬ݂ܵܟ݂. ܘܲܠܫܵܡܘܿܥܹ̈ܐ ܘܐܵܦ ܠܲܢ ܥܲܡܗܘܿܢ ܘܲܠܥܲܢ̈ܝܼܕܲܝܢ ܘܪܲܚܸܡ ܥܠܲܝܢ. ܒܡܲܠܟ݁ܘܼܬ݂ܵܟ݂؛ ܒܡܲܠܟ݁ܘܼܬ݂ܵܟ݂؛ ܒܡܲܠܟ݁ܘܼܬ݂ܵܟ݂؛ ܫܒ݂ܝܼܚܲܬ݁ ܡ̣ܢ ܟܠ.܀