El Alaha - Burktha|ܐܹܝܠ ܐܲܠܵܗܵܐ|ܐܝܠ ܐܠܗܐ

ܒܘܪ̈ܟܬ݂ܐ.

ܐܹܝܠ ܐܲܠܵܗܵܐ: ܕܐܲܫ̣ܪܝܼ ܫܟ݂ܝܼܢܬܹ݁ܗ ܥܲܠ ܛܘܼܪ ܣܝܼܢܲܝ: ܐܲܫܪܵܐ ܫܲܝܢܵܐ: ܕܐܲܠܗܘܼܬ݂ܵܟ݂ ܒܥܵܠܡܵܐ ܫܓ݂ܝܼܫܵܐ܀ ܐܹܝܠ ܐܲܠܵܗܵܐ: ܕܐܲܚܝܼܕ݂ ܪܸܡܙܹܗ ܪܵܘܡܵܐ ܘܥܘܼܡܩܵܐ: ܣܡܘܿܟ݂ ܠܲܒ݂ܪܝܼܬ݂ܵܐ: ܕܕܲܠܡܵܐ ܬܸܦܸܠ ܡܸܛܠ ܥܵܘ݂ܠܲܢ܀ ܐܹܝܠ ܐܲܠܵܗܵܐ: ܕܐܲܬ݂ܩܸܢ ܬܹܒܹܝܠ ܒܪܸܡܙܵܐ ܙܥܘܿܪܵܐ: ܐܲܬ݂ܩܸܢ ܥܵܠܡܵܟ݂: ܒܣܵܥܘܿܪܘܼܬ݂ܵܐ ܡܲܠܝܲܬ݂ ܫܲܝܢܵܐ܀ ܐܹܝܠ ܐܲܠܵܗܵܐ: ܕܲܒ݂ܪܵܐ ܢܘܼܗܪܵܐ ܘܝܵܗܹ̇ܒ݂ ܢܘܼܗܪܵܐ: ܐܲܕ݂ܢܲܚ ܒܐܲܦܲܝ̈ܢ: ܢܘܼܗܪܹܗ ܕܫܸܡܫܵܟ݂ ܡܲܦܨܲܚ ܟܠܵܐ܀ (ܬܲܪ̈ܥܹܐ ܕܡܸܛܪܵܐ) ܐܹܝܠ ܐܲܠܵܗܵܐ: ܫܲܚܠܸܦ ܠܐܵܐܲܪ ܠܲܦܨܝܼܚܘܼܬ݂ܵܐ: ܘܲܢܪܘܼܣ ܛܲܠܵܟ݂: ܡܸܛܪܵܐ ܢܝܼܚܵܐ ܥܲܠ ܚܲܩ̈ܠܵܬܲܢ܀ ܐܹܝܠ ܐܲܠܵܗܵܐ: ܢܸܦܩܘܿܕ݂ ܪܸܡܙܵܟ݂ ܠܐܵܐܲܪ ܕܲܟ݂ܡܝܼܪ: ܘܲܢܪܘܼܣ ܛܲܠܵܐ: ܥܲܠ ܚܲܩ̈ܠܵܬܲܢ ܒܪ̈ܲܚܡܹܐ ܕܡ̣ܢܵܟ݂. ܩܪܝܼ. ܐܹܝܠ ܐܲܠܵܗܵܐ: ܒܲܪܸܟ݂ ܟܠܝܼܠܵܐ ܕܫܲܢ݇ܬܵܐ ܒܪ̈ܲܚܡܲܝܟ: ܒܫܘܼܪܬܵܚ ܦܹܐܪܹ̈ܐ: ܘܲܒ݂ܥܲܠ̈ܠܵܬ݂ܵܐ ܥܕܲܡܵܐ ܠܥܵܠܲܡ܀ ܐܹܝܠ ܐܲܠܵܗܵܐ: ܠܡܲܠܟܹ̈ܐ ܕܐܲܪܥܵܐ ܫܲܝܸܢ ܐܸܢܘܿܢ: ܕܥܘܼܡܪܵܐ ܫܲܠܝܵܐ: ܘܢܝܼܚܵܐ ܢܸܥܡܲܪ ܒܫܲܝܢܵܐ ܕܡ̣ܢܵܟ݂܀ ܐܹܝܠ ܐܲܠܵܗܵܐ: ܐܲܟ݂ܪܸܟ݂ ܫܘܼܪܵܐ ܕܲܒ݂ܛܝܼܠܘܼܬ݂ܵܟ݂: ܠܥܘܼܡܪܵܐ ܗܵܢܵܐ: ܕܬ݂ܵܘܬܵܒ݂ܘܼܬܲܢ ܥܕܲܡܵܐ ܠܥܵܠܲܡ܀ ܐܹܝܠ ܐܲܠܵܗܵܐ: ܪܲܡܪܸܡ ܫܘܼܪ̈ܵܘܗܝ ܘܢܲܛܲܪ ܠܲܒ݂ܢܵܘ̈ܗܝ: ܗܲܕܲܪ ܬܸܓ݂ܡܵܘ̈ܗܝ: ܕܲܢܫܲܒ݁ܚܘܼܢܵܟ݂ ܐܲܡܝܼܢܵܐܝܼܬ݂܀ ܐܹܝܠ ܐܲܠܵܗܵܐ: ܒܲܪܸܟ݂ ܠܪܵܥܝܵܐ ܦܵܛܲܪܝܵܪܟ݁ܝܼܣ: ܕܲܢܩܘܼܡ ܒܪܹܫܲܢ: ܒܲܕ݂ܡܘܼܬ݂ ܡܘܼܫܹܐ ܥܲܠ ܝܼܣܪܵܝܹܠ܀ ܐܹܝܠ ܐܲܠܵܗܵܐ: ܚܲܝܸܠ ܙܵܘܥܵܘ̈ܗܝ ܘܗܲܕܲܪ ܢܲܦ̮ܫܹܗ: ܒܚܘܼܛܪܵܐ ܕܥܘܼܫܢܵܟ݂: ܕܠܵܐ ܢܸܬ݂ܪܲܦܸܐ ܩܕ݂ܵܡ ܡܲܟ݂ܫ̈ܘܼܠܹܐ܀ ܐܹܝܠ ܐܲܠܵܗܵܐ: ܢܲܛܲܪ ܒܪ̈ܲܚܡܲܝܟ ܠܪ̈ܵܥܵܘܵܬ݂ܵܐ: ܘܚܲܝܸܠ ܐܸܢܘܿܢ: ܠܡܸܣܥܲܪ ܥܵܢ̈ܗܘܿܢ ܒܲܙܗܝܼܪܘܼܬ݂ܵܐ܀ ܐܹܝܠ ܐܲܠܵܗܵܐ: ܘܠܲܡܫܲܒ݁ܠܵܢܲܢ ܘܠܲܡܗܲܕܝܵܢܲܢ: ܐܲܢܗܲܪ ܙܵܘܥܵܘ̈ܗܝ: ܘܚܲܟܸ݁ܡ ܢܲܦ̮ܫܹܗ ܒܟ݂ܠ ܝܲܕ݂̈ܥܵܬ݂ܵܐ܀ ܐܹܝܠ ܐܲܠܵܗܵܐ: ܠܣܵܒܹ̈ܐ ܗܕ݂ܝܼܪܹ̈ܐ ܘܲܠܩܲܝܘܼܡܹ̈ܐ: ܐܲܢܗܲܪ ܥܲܝܢܹ̈ܐ: ܕܠܸܒܵܘܵܬ݂̈ܗܘܿܢ ܠܡܸܚܟܲܡ ܩܘܼܫܬܵܐ܀ ܐܹܝܠ ܐܲܠܵܗܵܐ: ܘܲܠܩܲܫܝܼܫܹ̈ܐ ܡܟܲܗ̈ܢܲܝ ܠܲܫܡܵܟ݂: ܗܲܒ݂ ܠܗܘܿܢ ܐܲܓ݂ܪܵܐ: ܕܦܘܼܪܥܵܢ ܐܲܓ݂ܪ̱ܗܘܿܢ ܕܹܝܢܵܪ ܛܘܼܒܹ̈ܐ܀ ܐܹܝܠ ܐܲܠܵܗܵܐ: ܘܠܲܡܫܲܡܫܵܢܹ̈ܐ ܡܫܲܡ̈ܫܲܝ ܡܲܕ݂ܒ݁ܚܵܟ݂: ܙܵܘܸܕ݂ ܐܸܢܘܿܢ: ܒܟ݂ܠ ܒܘܼܪ̈ܟܵܬ݂ܵܐ ܠܦܘܼܬ݂ ܥܲܡܠܲܝ̈ܗܘܿܢ܀ ܐܹܝܠ ܐܲܠܵܗܵܐ: ܘܠܲܚܒ݂ܝܼܫܵܝܹ̈ܐ ܣܲܝܲܥ ܐܸܢܘܿܢ: ܕܠܵܐ ܢܸܬ݂ܓܲܪܕܸܐ: ܙܲܪܥܵܐ ܕܪܘܼܚܵܐ ܡ̣ܢ ܗܵܢ ܒܲܝܬܵܐ܀ ܐܹܝܠ ܐܲܠܵܗܵܐ: ܣܲܬܲܪ ܐܸܢܘܿܢ ܬܚܹܝܬ݂ ܛܸܠܵܠܵܟ݂: ܘܫܵܘܙܸܒ݂ ܐܸܢܘܿܢ: ܒܢܝܼܫܵܟ݂ ܚܲܝܵܐ ܡ̣ܢ ܬܘܼܩ̈ܠܵܬ݂ܵܐ܀ ܐܹܝܠ ܐܲܠܵܗܵܐ: ܗܲܕܵܐ ܐܸܢܘܿܢ ܒܐܘܼܪܚܵܐ ܕܩܘܼܫܬܵܐ: ܠܲܡܡܲܢܵܥܘܼ: ܒܝܲܕ݂ ܥܘܼܕ݂ܪܵܢܵܟ݂ ܠܐܲܬ݂ܪܵܐ ܕܲܠܥܸܠ܀ ܐܹܝܠ ܐܲܠܵܗܵܐ: ܢܸܛܲܪ ܪܸܡܙܵܟ݂ ܘܲܠܫܲܪ̈ܘܵܝܹܐ: ܡ̣ܢ ܢܸܟ݂ܝܵܢܹ̈ܐ: ܘܡ̣ܢ ܣܲܩܘܼܒ݂̈ܠܹܐ ܕܲܒ݂ܢܲܝ̈ܢܵܫܵܐ܀ ܐܹܝܠ ܐܲܠܵܗܵܐ: ܩܒ݂ܘܿܥ ܒܐܲܦܲܝ̈ܗܘܿܢ ܨܠܝܼܒ݂ܵܟ݂ ܚܲܝܵܐ: ܕܠܵܐ ܢܸܬ݁ܕܵܘܕ݂ܘܼܢ: ܠܡܸܦܗܵܐ ܒܐܘܼܪܚܵܐ ܕܲܪ̈ܓ݂ܝܼܓ݂ܵܬ݂ܵܐ܀ ܐܹܝܠ ܐܲܠܵܗܵܐ: ܣܥܘܿܪ ܠܲܟ݂ܪ̈ܝܼܗܹܐ ܥܨܘܿܒ݂ ܠܲܬ݂ܒ݂ܝܼܪܹ̈ܐ: ܒܲܝܲܐ ܡܥܵܩܹ̈ܐ: ܐܵܦ ܐܲܠܝܼܨܹ̈ܐ ܒܟ݂ܠ ܥܸܕܵܢܝܼ̈ܢ܀ ܐܹܝܠ ܐܲܠܵܗܵܐ: ܠܪ̈ܵܕ݂ܝܲܝ ܒܝܲܡܡܹ̈ܐ ܐܵܦ ܒܐܘܼܪ̈ܚܵܬ݂ܵܐ: ܐܲܦܢܵܐ ܐܸܢܘܿܢ: ܠܓ݂ܵܘ ܒܵܬܲܝ̈ܗܘܿܢ ܒܫܲܝܢܵܐ ܕܡ̣ܢܵܟ݂܀ ܐܹܝܠ ܐܲܠܵܗܵܐ: ܒܲܪܸܟ݂ ܠܣܵܒܹ̈ܐ ܕܲܥ̣ܬܸܩܘ ܒܥܹܕܬܵܐ: ܩܒ݂ܘܿܥ ܕܘܼܒܵܪܹ̈ܐ: ܕܙܲܕܝܼܩܘܼܬ݂ܵܐ ܒܪܸ̈ܥܝܵܢܲܝܗܘܿܢ܀ ܐܹܝܠ ܐܲܠܵܗܵܐ: ܐܵܦ ܠܲܡܗܲܝܡܢܹ̈ܐ ܘܠܲܡܗܲܝܡ̈ܢܵܬ݂ܵܐ: ܐܲܓܸ݁ܢ ܐܝܼܕ݂ܵܟ݂: ܕܡܲܠܝܵܐ ܪ̈ܲܚܡܹܐ ܥܲܠ ܢܲܦ̮ܫܵܬ݂̈ܗܘܿܢ܀ ܐܹܝܠ ܐܲܠܵܗܵܐ: ܒܲܪܸܟ݂ ܛܠܵܝܹ̈ܐ ܘܚܲܕܵܐ ܐܸܢܘܿܢ: ܘܛܲܪ ܠܲܥܠܲܝܡܹ̈ܐ: ܘܠܲܥܠܲܝ̈ܡܵܬ݂ܵܐ ܒܥܘܼܕ݂ܪܵܢ ܪ̈ܲܚܡܲܝܟ܀ ܐܹܝܠ ܐܲܠܵܗܵܐ: ܒܲܪܸܟ݂ ܠܐܲܬ݂ܪܵܐ ܕܬ݂ܵܘܬܵܒ݂ܘܼܬܲܢ: ܘܐܲܥܒܲܪ ܡ̣ܢܹܗ: ܚܲܪܒܵܐ ܘܟܲܦܢܵܐ ܘܫܲܒ݂ܛܵܐ ܕܪܘܼܓ݂ܙܵܐ܀ ܐܹܝܠ ܐܲܠܵܗܵܐ: ܩܲܒܸ݁ܠ ܨܠܘܿܬܲܢ ܐܵܦ ܒܵܥܘܼܬܲܢ: ܘܦܲܢܵܐ ܒܪ̈ܲܚܡܲܝܟ: ܟܠ ܫܸ̈ܐܠܵܬܲܢ ܡ̣ܢ ܒܹܝܬ݂ ܓܲܙܵܟ݂܀ ܐܹܝܠ ܐܲܠܵܗܵܐ: ܩܲܒܸ݁ܠ ܨܵܘܡܲܢ ܐܲܝܟ݂ ܕܐܹܠܝܼܵܐ: ܘܲܨ̈ܠܵܘܵܬܲܢ: ܐܲܝܟ݂ ܕܕ݂ܵܢܝܼܐܹܝܠ ܢܸܥ̈ܠܵܢ ܩܕ݂ܵܡܲܝܟ܀ ܐܹܝܠ ܐܲܠܵܗܵܐ: ܐܲܫܦܲܥ ܪ̈ܲܚܡܲܝܟ ܥܲܠ ܗܵܢ ܟܸܢܫܵܐ: ܘܲܛܪܘܿܕ݂ ܡ̣ܢܹܗ: ܩܪ̈ܵܒ݂ܵܘܗܝ ܕܒ݂ܝܼܫܵܐ ܒܟ݂ܠܥܸܕܵܢܝܼ̈ܢ܀ ܐܹܝܠ ܐܲܠܵܗܵܐ: ܐܵܦ ܠܐܲܒ݂ܵܗܲܝ̈ܢ ܘܲܠܪ̈ܲܒܵܢܲܝܢ: ܚܲܠܸܛ ܐܸܢܘܿܢ: ܥܲܡ ܣܝܼ̈ܥܵܬ݂ܵܐ ܕܟܸܢܫܲܝ̈ ܪܵܘܡܵܐ܀ ܐܹܝܠ ܐܲܠܵܗܵܐ: ܘܠܝܼ ܐܲܟ݂ܣܢܵܝܵܐ ܕܠܲܓ݂ܠ̱ܓܹ̇ܬ݂ ܩܕ݂ܵܡܲܝܟ: ܚܲܣܵܐ ܚܵܘܒܝ̈: ܘܲܥܛܝܼ ܚܛܵܗܲܝ̈ ܘܪܲܚܸܡ ܥܠܲܝ܀ ܐܹܝܠ ܐܲܠܵܗܵܐ: ܘܲܠܡܲܠܦܵܢܵܐ ܕܲܥ̣ܡܲܠ ܘܐܲܠ̣ܦܲܢܝ: ܡܢܝܼܘܗܝ ܒܡ̣ܢܝܵܢܵܐ: ܕܡܲܠܦܲܝ̈ ܫܲܦܝܼܪ ܒܛܲܝܒ݁ܘܼ ܕܡ̣ܢܵܟ݂܀ ܐܹܝܠ ܐܲܠܵܗܵܐ: ܠܵܟ݂ ܬܸܫܒ݁ܘܿܚܬܵܐ ܡ̣ܢ ܟܠ ܦܘܼܡ̈ܝܼܢ: ܐܲܒ݂ܵܐ ܘܲܒ݂ܪܵܐ: ܘܪܘܼܚܵܐ ܕܩܘܼܕ݂ܫܵܐ ܥܕܲܡܵܐ ܠܥܵܠܲܡ.