Ha Busama|ܗܵܐ ܒܘܼܣܵܡܵܐ|ܗܐ ܒܘܣܡܐ

ܫܘܼܚܠܵܦܵܐ. ܒܗܵܐ ܦܵܬ݂ܘܿܪܵܐ. ܠܐܲܝܠܹܝܢ ܕܢܵܛܪܝܼܢ ܩܝܵܡܹܗ. ܗܵܐ ܒܘܼܣܵܡܵܐ ܡܛܲܝܲܒ݂ ܠܥܸܠ ܒܲܫܡܲܝ̈ܵܐ. ܠܐܲܝܠܹܝܢ ܕܲܥ̣ܡܲܠܘ ܘܐܸܬ݂ܟܲܫܲܪܘ ܘܲܦܠܲܚܘ ܟܹܐܢܘܼܬ݂ܵܐ. ܢܵܣܒ݁ܝܼܢ ܐܲܓ݂ܪܵܐ ܛܵܒ݂ܵܐ ܕܕ݂ܘܼܒܵܪ̈ܲܝܗܘܿܢ. ܘܡ̣ܢ ܝܲܡܝܼܢܹܗ ܕܲܡܫܝܼܚܵܐ ܒܫܘܼܒ݂ܚܵܐ ܡܸܬ݂ܒܲܣܡܝܼܢ. ܘܚܵܕܹܝܢ ܘܕ݂ܵܝܨܝܼܢ ܘܲܦܨܝܼܚܝܼܢ. ܒܲܡܠܸܟ݂ ܡܲܠܟܹ̈ܐ ܫܡܲܝܵܢ̈ܵܐ. ܘܩܵܥܹܝܢ ܠܹܗ ܩܲܕܝܼܫ ܩܲܕܝܼܫ ܩܲܕܝܼܫ ܕܲܝܵܢܵܐ. ܙܥܘܿܪܹ̈ܐ ܥܲܡ ܪܵܘ݈ܪ̈ܒܹܐ. ܗܵܐ ܡܙܲܡܢܝܼܬ݁ܘܿܢ ܠܐ݇ܪ̈ܵܙܹܐ ܣܓ݂ܝܼܕܹ̈ܐ. ܕܦܲܓ݂ܪܹܗ ܘܲܕ݂ܡܹܗ ܕܲܡܫܝܼܚܵܐ ܚܵܘܲܪܘ ܠܒ݂ܘܼܫܲܝ̈ܟ݁ܘܿܢ. ܘܲܒ݂ܣܸܦ̈ܘܵܬ݂̈ܵܐ ܕܫܘܼܒ݂ܚܵܐ ܫܲܒܲܚܘ ܘܐܵܘܕܵܘ. ܠܠܲܚܡܵܐ ܕܲܢ̣ܚܸܬ݂ ܡ̣ܢ ܫܡܲܝ̈ܵܐ ܕܢܲܚܸܐ ܠܡܝܼܬ݂ܘܼܬܲܢ. ܘܕܸܒ݂ܚܹ̈ܐ ܕܟܲܝ̈ܵܐ ܩܲܪܸܒ݂ܘ ܠܹܗ. ܪܸ̈ܥܝܵܢܹܐ ܛܥܝܼܢܲܝ̈ ܬܵܘܕܝܼܬ݂ܵܐ. ܥܲܠ ܡܵܘܗܲܒ݂ܬܹܗ ܕܲܠܘܵܬܲܢ ܕܪܲܒܵܐ ܗ݇ܝܼ ܡ̣ܢ ܡܸܠܬ݂ܵܐ. ܙܲܕܝܼܩܵܐ ܘܲܬ݂ܪܝܼܨܵܐ. ܕܵܘܝܼܕ݂ ܗܵܘ ܒܲܪ ܐܝܼܫܲܝ ܒܲܙܡܝܼܪ̈ܵܬܹܗ. ܩ̣ܪܵܢܝ ܘܐܲܥܝܼܪܲܢܝ ܡ̣ܢ ܫܸܢܬ݂ܵܐ ܕܪܲܡܝܵܐ ܒܗܲܕܵܡܲܝ̈. ܘܐܸܡܲܪ ܠܝܼ ܕܐܸܬ݁ܬ݁ܥܝܼܪ ܕܲܡܟܵܐ ܠܡܵܢ ܛܲܒ݁ܝܼܥܲܬ݁. ܕܒ݂ܦܸܠܓܹ݁ܗ ܕܠܸܠܝܵܐ ܥܵܐܹܠ ܫܘܼܚܕܵܐ ܠܕܲܝܵܢܵܐ. ܩܘܼܡ ܨܲܠܵܐ ܘܲܒ݂ܥܝܼ ܘܐܸܬ݂ܟܲܫܲܦ ܕܲܒ݂ܕܸܡܥܹ̈ܐ ܡܵܪܵܟ݂ ܡܸܬ݂ܪܲܥܸܐ. ܘܦܵܬܲܚ ܬܲܪܥܹܗ ܠܬܲܝܵܒܹ̈ܐ ܒܠܸܠܝܵܐ ܘܒ݂ܐܝܼܡܵܡܵܐ. ܒܦܸܠܓܹ݁ܗ ܕܠܸܠܝܵܐ ܩܵܡ݂ܬ݂ ܕܐܵܘܕܹܐ ܠܵܟ݂ ܥܲܠ ܕܝܼܢܲܝ̈ܟ ܙܲܕܝܼܩܵܐ. ܐܸܬ݁ܕܟܲܪܬܵܟ݂ ܥܲܠ ܬܸܫܘܝܼܬ݂ܝ ܪܵܚܹܡܢܵܫܵܐ. ܘܲܒ݂ܦܸܠܓܹ݁ܗ ܕܠܸܠܝܵܐ ܩܵܡ݂ܬ݂ ܕܐܵܘܕܹܐ ܠܛܲܝܒ݁ܘܼܬ݂ܵܟ݂. ܘܥܸܗ̇ܕܹܬ݂ ܚܵܘܒܹ̈ܐ ܘܲܚܛܵܗܹ̈ܐ ܘܡܘܼܡܹ̈ܐ ܕܣܸܥܪܹܬ݂. ܘܠܲܒ݁ܒܲܢܝ ܓܲܝܵܣܵܐ ܘܡܵܟ݂ܣܵܐ ܘܚܲܛܵܝܬܵܐ ܡܲܪܝܲܡ. ܟܢܲܥܢܵܝܬܵܐ ܘܥܲܡܵܗ̇ ܡܡܲܚܲܝܬܵܐ. ܘܫܵܡܪܵܝܬܵܐ ܥܲܠ ܒܹܪܵܐ ܕܡܲܝ̈ܵܐ. ܐܵܡܪ̈ܵܢ ܠܝܼ ܩܘܼܡ ܒܥܝܼ ܪ̈ܲܚܡܹܐ. ܠܡܵܪܵܟ݂ ܡܠܸܐ ܪ̈ܲܚܡܹܐ.