Haw d'nurane|ܗܵܘ ܕܢܘܼܪ̈ܵܢܹܐ|ܗܘ ܕܢܘܪܢܐ

ܗ̇ܘ ܕܢܘܼܪ̈ܵܢܹܐ

ܗ̇ܘ ܕܢܘܼܪ̈ܵܢܹܐ؛ ܙܵܝܥܝܼܢ ܡ̣ܢܹܗ؛ ܕܲܢܚܘܿܪܘܼܢ ܒܹܗ؛

ܒܠܲܚܡܵܐ ܘܚܲܡܪܵܐ؛ ܠܹܗ̤ܘ ܚܵܙܹܬ݁؛ ܥܲܠ ܦܵܬ݂ܘܿܪܵܐ܀

ܥܛܝܼܦܲܝ̈ ܒܲܪ̈ܩܹܐ ܐܸܢ ܚܵܙܹܝܢ ܠܹܗ ܝܵܩܕܝܼܢ ܡ̣ܢܹܗ؛

ܘܥܲܦܪܵܐ ܫܝܼܛܵܐ؛ ܓܲܠ̈ܝܵܢ ܐܲܦܵܘ̈ܗܝ؛ ܟܲܕ ܐܵܟܹܠ ܠܹܗ܀

ܐ݇ܪ̈ܵܙܵܘܗܝ ܕܲܒ݂ܪܵܐ؛ ܢܘܼܪܵܐ ܐܸܢܘܿܢ؛ ܒܹܝܬ݂ ܥܸܠܵܝܹ̈ܐ؛

ܘܣܵܗܹܕ݂ ܥܲܡܲܢ؛ ܐܵܦ ܐܹܫܲܥܝܵܐ؛ ܕܲܚܙܵܐ ܐܸܢܘܿܢ܀

ܗܵܠܹܝܢ ܐ݇ܪ̈ܵܙܹܐ؛ ܕܐܝܼܬ ܗ̣݇ܘܵܘ ܒܥܘܼܒܵܐ؛ ܕܐܲܠܵܗܘܼܬ݂ܵܐ؛

ܥܲܠ ܦܵܬ݂ܘܿܪܵܐ؛ ܗܵܐ ܡܸܬ݂ܦܲܠܓ݂ܝܼܢ؛ ܠܝܲܠܕ݂ܵܘ̈ܗܝ ܕܐܵܕ݂ܵܡ܀

ܡܲܬܩܲܢ ܡܲܕ݂ܒ݁ܚܵܐ؛ ܐܲܝܟ݂ ܡܲܪܟܲܒ݂ܬ݂ܵܐ؛ ܗ̇ܝ ܕܲܟ݂ܪ̈ܘܿܒܹܐ؛

ܘܲܟ݂ܪܝܼܟ݂ܝܼܢ ܠܹܗ؛ ܚܲܝ̈ܠܵܘܵܬ݂ܵܐ؛ ܕܲܫܡܲܝܵܢܹ̈ܐ܀

ܥܲܠ ܦܵܬܘܿܪܵܐ؛ ܗܵܐ ܣܝܼܡ ܦܲܓ݂ܪܹܗ؛ ܕܒܲܪ ܐܲܠܵܗܵܐ؛

ܘܲܡܙܲܝܚܝܼܢ ܠܹܗ؛ ܝܲܠܕܵܘ̈ܗܝ ܕܐܵܕܵܡ؛ ܥܲܠ ܐܝܼܕܲܝ̈ܗܘܿܢ܀

ܘܲܚܠܵܦ ܓܲܒ݂ܪܵܐ؛ ܕܲܠܒ݂ܝܼܫ ܒܘܼܨܵܐ؛ ܟܵܗܢܵܐ ܩܵܐܹܡ؛

ܢܵܦܸܩ ܢܸܕ݂ܪܹܐ؛ ܡܲܪ̈ܓܵܢܝܵܬ݂ܵܐ؛ ܥܲܠ ܚܲܣܝܼܪܹ̈ܐ܀

ܐܸܠܘܼ ܐܝܼܬ݂ ܗ̣݇ܘܵܐ ܚܣܵܡܵܐ ܬܲܡܵܢ؛ ܒܹܝܬ݂ ܥܸܠܵܝܹ̈ܐ؛

ܟܪ̈ܘܿܒܹܐ ܠܡܸܚܣܲܡ؛ ܒܲܒ݂ܢܲܝ̈ܢܵܫܵܐ؛ ܩܲܪܝܼܒ݂ܝܼܢ ܗ̣݇ܘܵܘ܀

ܐܲܝܟܵܐ ܕܨܸܗܝܘܿܢ؛ ܩܸܒ݂ܥܲܬ̤ ܩܲܝܣܵܐ؛ ܕܬܸܨܠܘܼܒ݂ ܠܲܒ݂ܪܵܐ؛

ܬܲܡܵܢ ܝܼܥܵܐ ܗ̇ܘ ܐܝܼܠܵܢܵܐ؛ ܕܐܵܘܠܸܕ ܐܸܡܪܵܐ܀

ܐܲܝܟܵܐ ܕܨܸܨܹ̈ܐ؛ ܒܐܝܼܕ݂ܵܘ̈ܗܝ ܕܲܒ݂ܪܵܐ؛ ܐܸܬ݂ܩܲܒܲܥܘ ܗ̣݇ܘܵܘ؛

ܐܵܦ ܬܲܡܵܢ ܬܘܼܒ݂؛ ܦܟ݂ܵܪ̈ܵܘܗܝ ܕܐܝܼܣܚܵܩ؛ ܐܸܬ݂ܩܲܪܲܒ݂ܘ ܗ̣݇ܘܵܐ܀

ܬܵܐ ܒܲܫܠܵܡܵܐ؛ ܟܵܗܢܵܐ ܕܲܛܥܝܼܢ؛ ܦܝܼܪܡܵܐ ܕܲܟ݂ܝܵܐ؛

ܡܲܥܛܲܪ ܪܹܝܚܹܗ؛ ܘܲܡܒܲܣܸܡ ܠܹܗ؛ ܠܥܵܠܡܵܐ ܡ̣ܢܹܗ܀

ܬܵܐ ܒܲܫܠܵܡܵܐ؛ ܟܵܗܢܵܐ ܕܪܲܒ݁ܝܲܬ̤؛ ܪܘܼܚܵܐ ܕܩܘܼܕ݂ܫܵܐ؛

ܕܲܒ݂ܝܲܡܝܼܢܹܗ؛ ܛܥܝܼܢ ܠܲܩ̈ܠܝܼܕܹܐ؛ ܕܒܹܝܬ݂ ܐܲܠܵܗܵܐ܀

ܬܵܐ ܒܲܫܠܵܡܵܐ؛ ܟܵܗܢܵܐ ܕܫܵܪܹܐ؛ ܐ݇ܢܵܫܵܐ ܒܥܘܼܡܩܵܐ؛

ܡܵܪܝܵܐ ܒܪܵܘܡܵܐ؛ ܗ̤ܘ ܫܵܪܹܐ ܠܹܗ؛ ܗܲܠܹܠܘܿܝܵܗ܀