Hawli Mar|ܗܲܒ݂ܠܝܼ ܡܵܪܝ|ܗܒܠܝ ܡܪܝ

܀ܬܸܫܒ݁ܘܿܚܬܵܐ܀

ܕܣܝܼܡ ܠܩܲܕܝܼܫܵܐ ܡܵܪܝ ܐܲܦܪܹܝܡ.

ܗܲܒ݂ ܠܝܼ ܡܵܪܝ ܕܐܸܢ ܫܵܗܲܪ ܐ݇ܢܵܐ: ܥܝܼܪܵܐܝܼܬ݂ ܐܹܩܘܼܡ ܩܕ݂ܵܡܲܝ̈ܟ. ܘܐܸܢܗ݀ܘܼ ܬܘܼܒ݂ ܕܕ݂ܵܡܹـܟ݂ ܐ݇ܢܵܐ ܠܝܼ: ܕܠܵܐ ܚܛܵܗܹ̈ܐ ܬܸܗܘܸܐ ܫܸܢܲܬ݂ܝ܀ ܘܲܒ݂ܥܝܼܪܘܼܬ݂ܝ ܐܸܢ ܡܲܣܟܸ݁ܠ ܐ݇ܢܵܐ: ܡ̣ܢ ܛܲܝܒ݁ܘܼܬ݂ܵܟ݂ ܐܸܬ݂ܚܲܣܸܐ. ܘܲܒ݂ܕܲܡܟ݁ܘܼܬ݂ܝ ܐܸܢ ܚܵܛܹܝܐ ܐ݇ܢܵܐ: ܚܢܵܢܵܟ݂ ܢܸܗܘܸܐ ܫܵܒ݂ܘܿܩܵܐ܀ ܘܲܒ݂ܝܲܕ݂ ܙܩܝܼܦܹܗ ܕܡܘܼܟܵܟ݂ܵـܟ݂ ܫܸܢܬ݂ܵܐ ܕܲܢܝܵܚܵܐ ܗܲܒ݂ܠܝܼ. ܘܦܲܨܵܢܝ ܡ̣ܢ ܚܸܠܡܹ̈ܐ ܒܝܼܫܹ̈ܐ: ܘܡ̣ܢ ܕܸܡ̈ܘܵܬ݂ܵܐ ܫܟ݂ܝܼܪ̈ܵܬ݂ܵܐ܀ ܘܲܒ݂ܫܸܢܬ݂ܵܐ ܕܡܲܠܝܵܐ ܫܲܝܢܵܐ: ܟܠܹܗ ܠܸܠܝܵܐ ܕܲܒܲܪܲܝܢܝ. ܘܠܵܐ ܢܸܫܬܲܠܛܘܼܢ ܒܝܼ ܒܝܼܫܹ̈ܐ: ܘܚܘܼܫܵܒܹ̈ܐ ܕܲܡܠܹܝܢ ܥܵܘ̣ܠܵܐ܀ ܘܡ̣ܢ ܪ̈ܓ݂ܝܼܓ݂ܵܬ݂ܵܐ ܣܲܢ̈ܝܵܬ݂ܵܐ: ܢܦܲܨܹܝܢܝ ܦܲܓ݂ܪܵܟ݂ ܕܐܵܘܟܸ݁ܠܬܵܢܝ. ܘܐܸܫܟܲܒ݂ ܘܐܸܕ݂ܡܲـܟ݂ ܒܲܢܝܵܚܵܐ: ܘܢܵܛܘܿܪܵܐ ܕܡܵܟ݂ ܢܸܗܘܸܐ ܠܝܼ܀ ܘܲܠܢܲܦ̮ܫܵܐ ܕܐܝܼܬܹܝܗ̇ ܨܲܠܡܵܟ݂: ܫܘܼܪܵܐ ܕܪ̈ܲܚܡܲܝܟ ܠܵܗ̇ ܐܲܟ݂ܪܸܟ݂، ܘܲܠܦܲܓ݂ܪܵܐ ܕܲܓ݂ܒܲܠ ܐܝܼܕܲܝ̈ܟ: ܝܲܡܝܼܢܵܟ݂ ܬܲܓܸ݁ܢ ܥܠܵܘܗܝ܀ ܘܐܲܟ݂ܪܸܟ݂ ܠܝܼ ܫܘܼܪܵܐ ܕܪ̈ܲܚܡܲܝܟ : ܐܲܝܟ݂ ܣܲܟ݁ܪܵܐ ܚܲܝܠ̱ܬ݂ܵܢܝܼܬ݂ܵܐ. ܕܡܵܐ ܕܫܵܠܹܐ ܦܲܓ݂ܪܵܐ ܘܫܵܟܹܬ݂: ܢܸܗܘܸܐ ܚܲܝܠܵܟ݂ ܢܵܛܘܿܪܹܗ܀ ܘܐܲܝܟ݂ ܥܸܛܪܵܐ ܕܒܸܣܡܹ̈ܐ ܬܸܗܘܸܐ: ܫܸܢܲܬ݂ܝ ܩܘܼܕ݂ܡܲܬ݂ ܪܲܒܘܼܬ݂ܵܟ݂. ܘܠܵܐ ܢܸܩܪܘܿܒ݂ ܒܝܼܫܵܐ ܠܬܸܫܘܝܼܬ݂ܝ: ܒܲܦܝܵܣܵܐ ܕܗ̇ܝ ܕܝܼܠܸܕ݂ܬܵܟ݂܀ ܘܲܒ݂ܝܲܕ݂ ܕܸܒ݂ܚܵܟ݂ ܕܲܚܠܵܦܲܝܢ: ܟܠܝܼ ܠܣܵܛܵܢܵܐ ܕܠܵܐ ܢܲܟܹ݁ܝܢܝ. ܘܫܲܡܠܵܐ ܨܹܐܕܲܝ ܫܘܼܕܵܝܵܟ݂: ܘܒܲܨܠܝܼܒ݂ܵܟ݂ ܢܲܛܲܪ ܚܲܝܲܝ̈܀ ܕܡܵܐ ܕܐܸܬ݁ܬ݁ܥܝܼܪܹܬ݂ ܐܵܘܕܸܐ ܠܵܟ݂: ܕܚܘܼܒܵܟ݂ ܚܵܘܝܼܬ݁ ܨܹܝܕ ܫܲܦܠܘܼܬ݂ܝ. ܘܐܲܣܸܩ ܫܘܼܒ݂ܚܵܐ ܠܵܟ݂ ܘܠܲܐܒ݂ܘܼܟ݂: ܘܲܠܪܘܼܚܩܘܼܕ݂ܫܵܐ ܡܩܲܕܫܵܢܵܐ܀ ܘܐܲܣܸܩ ܫܘܼܒ݂ܚܵܐ ܠܵܟ݂ ܘܠܲܐܒ݂ܘܼܟ݂: ܘܲܠܪܘܼܚܩܘܼܕ݂ܫܵܐ ܡܩܲܕܫܵܢܵܐ. ܘܗܵܫܵܐ ܬܘܼܒ݂ ܘܐܲܡܝܼܢܵܐܝܼܬ݂: ܠܥܵܠܲܡ ܘܲܠܥܵܠܲܡ ܥܵܠܡܝܼܢ܀