Ith lan Sawra |ܐܝܼܬ ܠܲܢ ܣܲܒ݂ܪܵܐ|ܐܝܬ ܠܢ ܣܒܪܐ

ܐܝܼܬ ܠܲܢ ܣܲܒ݂ܪܵܐ

ܐܝܼܬ ܠܲܢ ܣܲܒ݂ܪܵܐ ܘܬܘܼܟ݂ܠܵܢܵܐ؛ ܒܝܼܫܘܿܥ ܡܫܝܼܚܵܐ ܡܲܚܝܵܢܵܐ؛

ܕܢܲܫܦܲܥ ܪ̈ܲܚܡܹܐ ܘܲܚܢܵܢܵܐ؛ ܡ̣ܢ ܓܲܙܹܗ ܡܠܹܐ ܚܵܘܣܵܢܵܐ܀ 

ܟܠ ܡ̇ܢ ܕܐܵܟ݂ܹܠ ܡ̣ܢ ܦܲܓ݂ܪܹܗ؛ ܘܫܵܬܹܐ ܡ̣ܢ ܟܵܣܵܐ ܕܲܕ݂ܡܹܗ؛

ܘܟ݂ܠ ܒܲܪܢܵܫ ܕܲܡܗܲܝܡ̣ܢ ܒܹܗ؛ ܐܝܼܬܠܹܗ ܚܲܝܹ̈ܐ ܒܲܩܢܘܿܡܹܗ܀ 

ܐܵܟ݂ܘܿܠܵܘ̈ܗܝ ܕܗܵܢܵܐ ܠܲܚܡܵܐ؛ ܢܲܦ̮ܫܗܘܿܢ ܡܵܘܬܵܐ ܠܵܐ ܛܵܥܡܵܐ؛

ܘܦܲܓ݂ܪ̈ܲܝܗܘܿܢ ܒܗܵܢܵܐ ܥܵܠܡܵܐ؛ ܘܲܒ݂ܕܲܥܬ݂ܝܼܕ ܩܢܹܝܢ ܒܘܼܣܵܡܵܐ܀ 

ܟܠ ܕܐܵܟܹܠ ܒܗܲܝܡܵܢܘܼܬܵܐ؛ ܠܗܵܢ ܦܲܓ݂ܪܵܐ ܡܠܹܐ ܙܲܗܝܘܼܬ݂ܵܐ؛

ܠܦܲܓ݂ܪܹܗ ܠܵܐ ܩܵܪܒ݂ܵܐ ܚܛܝܼܬ݂ܵܐ؛ ܘܢܲܦ̮ܫܹܗ ܢܵܗܪܵܐ ܒܡܲܠܟܘܼܬ݂ܵܐ܀ 

ܗܵܢܵܘ ܠܲܚܡܵܐ ܫܡܲܝܵܢܵܐ؛ ܕܐܸܡܲܪ ܦܘܼܡܵܐ ܡܲܚܝܵܢܵܐ؛

ܗ̇ܘ ܕܠܐܹܫܲܥܝܵܐ ܪܘܼܚܵܢܵܐ؛ ܝܲܗ݇ܒܹܗ ܒܐ݇ܪܵܙܵܐ ܢܘܼܪܵܢܵܐ܀ 

ܣܵܡܹـܟ݂ ܠܸܒܵܐ ܗܵܢ ܠܲܚܡܵܐ؛ ܐܲܝܟ݂ ܕܐܸܡܲܪ ܕܵܘܝܼܕ݂ ܡܚܲܟ݁ܡܵܐ؛

ܘܟ݂ܠ ܢܦܸܫ ܕܡܹܐܟ݂ܠܵܗ̇ ܗܵܢ ܠܲܚܡܵܐ؛ ܚܵܝܵܐ ܒܹܗ ܐܵܦ ܡܸܬ݂ܢܲܚܡܵܐ܀ 

ܗܵܢ ܠܲܚܡܵܐ ܠܗܵܘܢܵܐ ܡܲܚܸܐ؛ ܘܡܲܦܪܲܓ݂ ܘܡܲܥܬܲܪ ܠܹܗ ܒܨܸܡܚܹ̈ܐ؛

ܘܲܠܦܲܓ݂ܪܵܐ ܡܲܓ݂ܙܲܪ ܢܝܵܚܹ̈ܐ؛ ܘܲܠܢܲܦ̮ܫܵܐ ܡܲܣܓܹܐ ܦܨܵܚܹ̈ܐ܀ 

ܐܲܟ݂ܘܿܠܘ ܘܲܣܒܲܥܘ ܐܘܿ ܟܵܦܢܹ̈ܐ؛ ܕܠܵܐ ܬܸܟ݂ܦܢܘܿܢ ܠܥܵܠܲܡ ܙܲܒ݂ܢܹ̈ܐ؛

ܘܲܗ̤ܘܵܘ ܡ̣ܢܹܗ ܡܩܲܕ݂ܝܵܢܹ̈ܐ؛ ܛܘܼܒܹ̈ܐ ܠܵܐ ܡܸܫܬܲܪ̈ܝܵܢܹܐ܀ 

ܗܵܢܵܐ ܡܦܲܨܹܐ ܡ̣ܢ ܢܘܼܪܵܐ؛ ܗܵܢܵܘ ܕܲܡܚܵܘܹܐ ܢܘܼܗܪܵܐ؛

ܗܵܢܵܘ ܕܒܹܗ ܩܵܢܹܝܢ ܗܸܕ݂ܪܵܐ؛ ܢܲܦ̮ܫܵܐ ܐܲܟ݂ܚܲܕ݂ ܥܲܡ ܦܲܓ݂ܪܵܐ܀ 

ܗܵܢ ܚܲܡܪܵܐ ܟܠ ܕܠܹܗ ܫܵܬܹܐ؛ ܠܕ݂ܝܼܢܵܐ ܠܥܵܠܲܡ ܠܵܐ ܐܵܬܹܐ؛

ܘܡܸܬ݂ܒܲܣܲܡ ܒܚܲܝܹ̈ܐ ܚܲܕܬܹ̈ܐ؛ ܒܝܵܘܡܵܐ ܕܡܸܬ݂ܚܲܕ݂ܬ݂ܝܼܢ ܡܝܼܬܹ̈ܐ܀ 

ܟܠ ܕܪܵܘܹܐ ܒܗܵܢܵܐ ܚܲܡܪܵܐ؛ ܦܘܼܝܵܓ݂ܵܐ ܚܫܝܼܒ݂ ܠܹܗ ܢܘܼܪܵܐ؛

ܘܲܕ݂ܛܵܥܹܡ ܡ̣ܢܹܗ ܒܸܨܪܵܐ؛ ܠܵܐ ܚܵܙܹܐ ܚܸܫܟܵܐ ܕܩܲܒ݂ܪܵܐ܀ 

ܒܹܗ ܡܸܬ݁ܛܲܥܝܵܢ ܥܵܩܵـ̈ܬ݂ܵܐ؛ ܒܹܗ ܡܸܬ݂ܚܲܕ݂̈ܬ݂ܵܢ ܚܲܕ݂̈ܘܵܬ݂ܵܐ؛

ܒܹܗ̤ܘ ܪ̈ܵܘܙܵܢ ܥܹـ̈ܕܵܬ݂ܵܐ؛ ܘܲܡ̈ܩܲܕܫܵܢ ܠܹܗ ܒܬܸܫܒ̈ܚܵܬ݂ܵܐ܀ 

ܛܘܼܒ݂ ܠܥܲܡܵܐ ܕܲܟ݂ܪܸ̈ܣܛܝܵܢܹܐ؛ ܕܐܝܼܬ݂ ܠܗ݇ܘܿܢ ܐ݇ܪ̈ܵܙܹܐ ܡܲܚܝܵܢܹ̈ܐ؛

ܕܡ̣ܢܗܘܿܢ ܢܗܘܿܢ ܡܸܣܬܲܝܒܪ̈ܵܢܹܐ؛ ܘܠܵܐ ܟܵܦܢܝܼܢ ܠܥܵܠܲܡ ܙܲܒ݂ܢܹ̈ܐ܀ 

ܟܠ ܕܲܡܗܲܝܡ̣ܢ ܒܗܵܢ ܦܲܓ݂ܪܵܐ؛ ܘܫܵܬܹܐ ܡ̣ܢ ܗܵܢܵܐ ܚܲܡܪܵܐ؛

ܒܹܗ̤ܘ ܚܵܙܹܐ ܠܗ̇ܘ ܢܘܼܗܪܵܐ؛ ܕܡܲܠܟܘܼܬ݂ܵܐ ܗ̇‍ܝ ܕܠܵܐ ܥܵܒ݂ܪܵܐ܀