Kahne Gwa Le|ܟܵܗܢܹ̈ܐ ܓܒ݂ܵܐ ܠܹܗ|ܟܗܢܐ ܓܒܐ ܠܗ

ܟܵܗܢܹ̈ܐ ܓܒ݂ܵܐ ܠܹܗ

ܒܗ̇ܘ ܕܢܘܼܪ̈ܵܢܹܐ. ܕܡܵܪܝ ܢܲܪܣܲܝ.

ܟܵܗܢܹ̈ܐ ܓܒ݂ܵܐ ܠܹܗ ܡܲܠܟܵܐ ܕܪܵܘܡܵܐ ܕܲܢܫܲܡܫܘܼܢ ܠܹܗ.

ܘܲܚܠܵܦ ܕܸܒ݂ܚܹ̈ܐ ܢܩܲܪܒ݂ܘܼܢ ܕܸܒ݂ܚܵܐ ܕܐ݇ܪܵܙܵܐ ܕܲܒ݂ܪܹܗ.܀

ܐ݇ܪܵܙܵܐ ܕܲܒ݂ܪܹܗ ܡܩܲܪܒ݂ܝܼܢ ܟܠ ܫܵܥ ܩܕ݂ܵܡ ܨܸܒ݂ܝܵܢܹܗ.

ܘܲܡܚܲܣܹܝܢ ܒܹܗ ܥܵܘܠܵܐ ܕܐ݇ܢܵܫܵܐ ܕܩܵܪܹܝܢ ܒܲܫܡܹܗ.܀

ܒܐܘܼܟ݂ܠܵܐ ܕܦܲܓ݁ܪܹܗ ܛܵܪܕ݂ܝܼܢ ܡܵܘܬܵܐ ܡ̣ܢ ܦܲܓ݁ܪ̈ܲܝܗܘܿܢ.

ܘܒܲܕ݂ܡܹܗ ܚܲܝܵܐ ܡܲܫܩܹܝܢ ܚܲܝܹ̈ܐ ܠܪܸ̈ܥܝܵܢܲܝܗܘܿܢ.܀

ܓܡܘܼܪܬܵܐ ܕܢܘܼܪܵܐ ܚ̣ܙܵܐ ܐܹܫܲܥܝܵܐ ܕܩܸܪܒܲܬ̤ ܨܹܐܕ݂ܵܘܗܝ.

ܕܲܠܒ݂ܝܼܟ݂ ܗ݇ܘ̣ܵܐ ܠܵܗ̇ ܣܪܵܦܵܐ ܕܢܘܼܪܵܐ ܒܐܝܼܕ݂ܵܐ ܕܢܘܼܪܵܐ.܀

ܒܘܼܕܵܩ ܐ݇ܪܵܙܵܐ ܕܲܚ̣ܙܵܐ ܢܒ݂ܝܼܵܐ ܡܦܲܫܸܩ ܟܵܗܢܵܐ.

ܘܐܲܝܟ݂ ܕܲܒ݂ܟܲܠܒ݁ܬ݂ܵܐ ܠܵܒܹܟ݂ ܒܐܝܼܕܹܗ ܢܘܼܪܵܐ ܒܠܲܚܡܵܐ.܀

ܣܪܵܦܵܐ ܕܪܘܼܚܵܐ ܠܵܐ ܠܒܲܟ݂ ܒܐܝܼܕܹܗ ܚܸܙܘܵܐ ܕܪܘܼܚܵܐ.

ܘܗܵܢܵܘ ܬܲܗܪܵܐ ܕܐܝܼܕ݂ܵܐ ܕܒܸܣܪܵܐ ܠܒ݂ܝܼܟ݂ܵܐ ܠܪܘܼܚܵܐ.܀

ܐܹܝܘ ܦܲܓ݁ܪܵܢܵܐ ܕܲܛܥܝܼܢ ܢܘܼܪܵܐ ܘܠܵܐ ܡܸܬ݂ܚܲܪܲܟ݂.

ܐܹܝܘ ܡܵܝܘܿܬ݂ܵܐ ܕܟܲܕ݂ ܡܵܝܘܿܬ݂ܵܐ ܗܘ̤ ܡܦܲܠܸܓ݁ ܚܲܝܹ̈ܐ.܀

ܡ̇ܢ ܐܲܦܸܣ ܠܵܟ݂ ܥܲܦܪܵܐ ܫܝܼܛܵܐ ܠܡܹܐܚܲܕ݂ ܢܘܼܪܵܐ.

ܘܡܲܢܘܼ ܥܲܒ݂ܕܵܟ݂ ܡܦܲܠܸܓ݁ ܚܲܝܹ̈ܐ ܒܲܪ ܡܸܣܟܹܢܹ̈ܐ.܀

ܡܲܢܘܼ ܐܲܠܦܵܟ݂ ܠܡܹܐܚܲܕ݂ ܢܘܼܪܵܐ ܒܚܘܼܦܢܲܝ̈ ܒܸܣܪܵܐ.

ܘܡ̇ܢ ܒܲܕ݂ܩ ܠܵܟ݂ ܚܹܝܠ ܚܸܟ݂ܡܵܬ݂̈ܵܐ ܘܟܲܣ̈ܝܵܢ ܡ̣ܢܵܟ݂.܀

ܬܵܘ ܡܵܝܘܿܬܹ̈ܐ ܢܸܚܙܸܐ ܠܢܝܼܫܵܐ ܕܲܟ݂ܣܸܐ ܒܐ݇ܪܵܙܵܐ.

ܕܠܵܐ ܢܸܬ݂ܪܲܦܸܐ ܡ̣ܢ ܣܘܼܟܵܝܵܐ ܕܚܲܝܹ̈ܐ ܡܠܝܼܟܹ̈ܐ.܀

ܬܵܘ ܢܸܬ݂ܚܲܦܲܛ ܘܢܸܩܪܘܿܒ݂ ܨܹܐܕ݂ܵܘܗܝ ܩܲܕܝܼܫܵܐܝܼܬ݂.

ܕܢܸܣܲܒ݂ ܡ̣ܢܹܗ ܣܲܡܵܐ ܕܥܵܗܹܢ ܠܲܚܒ݂ܵܪ̈ܵܬܲܢ.܀

ܐܲܝܟ݂ ܕܲܠܣܲܡܵܐ ܢܛܲܦܹܝܘܗܝ ܟܠܫܵܥ ܠܪܸ̈ܓ݁ܫܹܐ ܘܙܵܘܥܹ̈ܐ.

ܕܢܸܪܕ݂ܘܿܦ ܡ̣ܢܲܢ ܢܣܝܼܣܘܼܬ݂ ܦܲܓ݁ܪܵܐ ܘܪܲܦܝܘܼܬ݂ ܢܲܦ̮ܫܵܐ.܀

ܒܗܲܝܡܵܢܘܼܬ݂ܵܐ ܢܣܝܼܡܝܼܘܗܝ ܟܠܲܢ ܥܲܠ ܟܘܼܬ̣̈ܡܵܬܲܢ.

ܕܢܸܩܢܸܐ ܡ̣ܢܹܗ ܢܘܼܚܵܡ ܦܲܓ݁ܪܵܐ ܘܦܘܼܪܩܵܢ ܢܲܦ̮ܫܵܐ.܀