Malka d'malke|ܡܲܠܟܵܐ ܕܡܲܠܟܹ̈ܐ|ܡܠܟܐ ܕܡܠܟܐ

ܡܲܠܟܵܐ ܕܡܲܠܟܹ̈ܐ

ܡܲܠܟܵܐ ܕܡܲܠܟܹ̈ܐ: ܕܡܲܪܟܲܒ݂ܬܹܗ ܢܘܼܪܵܐ ܒܢܘܼܪܵܐ.

ܘܫܲܠܗܹܒ݂ܝܼܬ݂ܵܐ: ܕܥܲܠ ܥܝܼܠܵܐ ܫܝܼܛܵܐ ܪܟ݂ܝܼܒ݂ ܗ݇ܘ̣ܵܐ: ܫܘܼܒ݂ܚܵܐ ܠܲܫܡܹܗ.܀

ܐ:

ܐܝܼܬ݂ ܠܹܗ ܒܪܵܘܡܵܐ؛ ܫܲܡܵܫܹ̈ܐ ܕܠܵܐ ܡ̣ܢܝܵܢܵܐ.

ܘܩܵܥܹ̇ܝܢ ܟܠܗܘܿܢ؛ ܩܲܕܝܼܫ ܩܲܕܝܼܫ ܩܲܕܝܼܫܲܬ݁؛ ܫܘܼܒ݂ܚܵܐ ܠܲܫܡܹܗ.܀

ܒ:

ܒܲܪ̈ܩܹܐ ܕܢܘܼܪܵܐ؛ ܡܲܙܗܪܝܼܢ ܚܕܼܵܪ̈ܲܝ ܟܘܼܪܣܝܹܗ.

ܘܓ݁ܵܗܪ̈ܵܢ ܥܲܝܢܹ̈ܐ ܕܲܥܒ݂ܝܼܕܹ̈ܐ ܡ̣ܢ ܙܲܗܪܹܗ ܛܵܒ݂؛ ܫܘܼܒ݂ܚܵܐ ܠܲܫܡܹܗ.܀

ܓ:

ܓܝܼܓ݁ܠܹ̈ܐ ܕܢܘܼܪܵܐ؛ ܕܚܝܼܠܵܬ̣̈ܵܐ ܘܥܲܙܝܼܙܵܬ̣̈ܵܐ.

ܘܪܵܥܠܝܼܢ ܟܪ̈ܘܿܒܹܐ؛ ܘܲܣܪ̈ܵܦܹܐ ܕܲܢܚܘܼܪܘܼܢ ܒܹܗ؛ ܫܘܼܒ݂ܚܵܐ ܠܲܫܡܹܗ.܀

ܕ:

ܕܚܝܼܠܵܐ ܚܙܵܬܹܗ؛ ܥܲܠ ܒܪ̈ܲܝܵܐ ܛܵܒ݂ ܡ̣ܢ ܟܠܵܐ.

ܘܪܵܡܵܐ ܕܡܘܼܬܹܗ؛ ܡ̣ܢ ܕܘܼܡܝܵܐ ܘܡ̣ܢ ܡܕܲܡܝܵܢܹ̈ܐ؛ ܫܘܼܒ݂ܚܵܐ ܠܲܫܡܹܗ.܀

ܗ:

ܗܲܠܸܠܘܼܝܵܗ؛ ܩܵܥܹ̇ܝܢ ܠܹܗ ܥܝܼܪܹ̈ܐ ܒܪܵܘܡܵܐ.

ܘܲܛܠܵܝܘܿܢܹ̈ܐ؛ ܐܘܿܫܲܥܢܵܐ ܩ̣ܥܵܘ ܠܹܗ ܒܥܘܼܡܩܵܐ؛ ܫܘܼܒ݂ܚܵܐ ܠܼܲܫܡܹܗ.܀

ܘ:

ܘܲܪܕܵܐ ܘܐܵܣܵܐ؛ ܘܫܘܿܫܲܢܹ̈ܐ ܘܦܸܩ̈ܚܲܝ ܢܝܼܣܲܢ.

ܥܲܡ ܐܸܛܪ̈ܘܿܓܹܐ؛ ܛܥܝܼܢܝܼܢ ܗ݇ܘ̣ܵܘ ܘܲܡܙܲܝܚܝܼܢ ܠܹܗ؛ ܫܘܼܒ݂ܚܵܐ ܠܲܫܡܹܗ.܀

ܙ:

ܙܟܲܪܝܵܐ ܢܒ݂ܝܼܵܐ؛ ܩܕ݂ܵܡ ܕܵܪܹ̈ܐ ܚܙܵܝܗܝ ܒܓܸܠܝܵܢܵܐ.

ܕܡܲܟ݁ܝܼܟ݂ ܘܲܪܟ݂ܝܼܒ݂؛ ܥܲܠ ܥܝܼܠܵܐ ܘܥܲܠ̣ ܠܐܘܿܪܸܫܠܸܡ؛ ܫܘܼܒ݂ܚܵܐ ܠܲܫܡܹܗ.܀

ܚ:

ܚܕ݂ܵܝ ܒܲܪ݇ܬ݂ ܨܸܗܝܘܿܢ؛ ܕܗܵܐ ܡܲܠܟܹܟ݂ܝ ܐܵܬܹ̇ܐ ܠܘܵܬܹܟ݂ܝ.

ܘܲܓ݁ܒܸܐ ܘܡܲܟ݁ܝܼܟ݂؛ ܐ݇ܢܵܫܵܐܝܼܬ݂ ܘܙܲܕܝܼܩ ܡ̣ܢ ܟܠ؛ ܫܘܼܒ݂ܚܵܐ ܠܲܫܡܹܗ.܀

ܛ:

ܛܘܼܪܹ̈ܐ ܦܵܫܪܝܼܢ؛ ܐܲܝܟ݂ ܫܥܘܿܬ݂ܵܐ ܡ̣ܢ ܩܕ݂ܵܡ ܙܝܼܘܹܗ.

ܘܝܲܡܹ̈ܐ ܦܵܝܫܝܼܢ ܐܲܝܟ݂ ܡܲܕ݂ܒ݁ܪܵܐ ܐܸܢ ܚܵܐܲܪ ܒܗܘܿܢ؛ ܫܘܼܒ݂ܚܵܐ ܠܲܫܡܹܗ.܀

ܝ:

ܝܵܗ ܐܲܗܝܼܵܗ؛ ܕܲܠܡܘܼܫܹܐ ܐܲܙܠܸܓ݁ ܒܣܲܢܝܵܐ.

ܒܗܵܢܵܐ ܝܵܘܡܵܐ؛ ܐ݇ܢܵܫܵܐܝܼܬ݂ ܪܟܸܒ݂ ܥܲܠ ܚܡܵܪܵܐ؛ ܫܘܼܒ݂ܚܵܐ ܠܲܫܡܹܗ.܀

ܟܟ:

ܟܸܢܫ̈ܝܼܢ ܟܸܢܫ̈ܝܼܢ؛ ܢܵܦܩ̇ܝܼܢ ܗ݇ܘ̣ܵܘ ܝܼܣܲܪ̈ܠܵܝܹܐ.

ܠܡܸܚܙܵܐ ܬܲܗܪܵܐ؛ ܪܟ݂ܝܼܒ݂ ܟܪ̈ܘܼܒܹܐ ܪܟ݂ܝܼܒ݂ ܥܲܠ ܚܡܵܪܵܐ؛ ܫܘܼܒ݂ܚܵܐ ܠܲܫܡܹܗ.܀

ܠ:

ܠܵܐ ܐ݇ܢܵܫ ܪܲܟ݂ܒܹ݁ܗ؛ ܘܠܵܐ ܪܸܓ݁ܠܵܐ ܣܸܠܩܲܬ̤ ܠܚܲܨܹܗ.

ܘܠܵܐ ܐܲܦܣܵܪܵܐ؛ ܘܠܵܐ ܦܓ݁ܘܼܕܬ݂ܵܐ ܐܲܪܡܝܼ ܒܦܘܼܡܹܗ؛ ܫܘܼܒ݂ܚܵܐ ܠܲܫܡܹܗ.܀

ܡ:

ܡܲܠܟܹ̈ܐ ܥܲܒ݂ܕܵܘ̈ܗܝ؛ ܘܡܲܠܲܐܟܹ̈ܐ ܡܫܲܡܫܝܼܢ ܠܪܸܡܙܹܗ.

ܘܝܲܠܘܼܕ݂ܘܼܢܹ̈ܐ؛ ܒܣܵܘܟܵܬ̣̈ܵܐ ܡܙܲܝܚܝܼܢ ܗ݇ܘ̣ܵܘ ܠܹܗ؛ ܫܘܼܒ݂ܚܵܐ ܠܲܫܡܹܗ.܀

ܢܢ:

ܢܝܼܪܵܐ ܣܵܡ̣ ܠܹܗ. ܥܲܠ ܨܵܘܪܹܗ ܡܵܪܹܐ ܪ̈ܲܟ݂ܫܵܐ.

ܘܠܲܝܬ݁ ܠܲܚܡܵܪܹܗ؛ ܠܵܐ ܣܲܪܓܵܐ ܘܠܵܐ ܒܘܼܪܕܲܥܬ݂ܵܐ؛ ܫܘܼܒ݂ܚܵܐ ܠܲܫܡܹܗ.܀

ܣ:

ܣܲܝܦܹ̈ܐ ܪ̈ܘܼܡܚܹܐ ܘܩܸܫܬܵܬ̣̈ܵܐ ܘܓܹܐܪܹ̈ܐ ܫܢܝܼܢܹ̈ܐ.

ܒܲܕ݂ܡܘܼܬ݂ ܛܲܪ̈ܦܹܐ؛ ܠܵܐ ܚܫܝܼܒ݂ܝܼܢ ܠܹܗ ܟܲܕ݂ ܐܵܡܪܝܼܢ؛ ܫܘܼܒ݂ܚܵܐ ܠܲܫܡܹܗ.܀

ܥ:

ܥܲܠ ܩܵܪ̈ܘܿܟܹܐ؛ ܒܢܲܝ̈ ܡܲܠܟܹ̈ܐ ܡܸܬ݁ܕܲܡܪܝܼܢ ܗ݇ܘ̣ܵܘ.

ܡܵܐ ܕܚܵܙܹܝܢ ܠܹܗ؛ ܩܕ݂ܵܡ ܥܝܼܠܹܗ ܥܲܦܪܵܐ ܠܵܚܟ݁ܝܼܢ؛ ܫܘܼܒ݂ܚܵܐ ܠܲܫܡܹܗ.܀

ܦ:

ܦܵܪܚ̇ܝܼܢ ܘܛܵܝܣ̇ܝܼܢ؛ ܦܲܪ̈ܵܫܵܘܗܝ ܛܵܒ݂ ܡ̣ܢ ܒܲܪ̈ܩܹܐ.

ܘܲܚܕ݂ܝܼܪܝܼܢ ܠܹܗ؛ ܛܠܵܝܘܿܢܹ̈ܐ ܘܲܛܠܵܝܵܬ̣̈ܵܐ ܫܘܼܒ݂ܚܵܐ ܠܲܫܡܹܗ.܀

ܨ:

ܨܵܝܬ݁ܝܼܢ ܘܙܵܥܩܝܼܢ؛ ܡܫܲܒ݁ܚܵܢܹ̈ܐ ܕܐܲܠܵܗܘܼܬܹܗ.

ܘܲܕܐ݇ܢܵܫܘܼܬܹܗ؛ ܠܥܸܠ ܘܲܠܬܲܚܬ݁ ܒܪܵܘܡܵܐ ܘܥܘܼܡܩܵܐ؛ ܫܘܼܒ݂ܚܵܐ ܠܲܫܡܹܗ.܀

ܩ:

ܩܵܠܹ̈ܐ ܒܩܵܠܹ̈ܐ؛ ܘܲܙܥܵܩܵܬ̣̈ܵܐ ܡܲܙܥܩܝܼܢ.

ܘܡܲܫܡܥܝܼܢ ܗ݇ܘ̣ܵܘ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂؛ ܫܘܼܒ݂ܚܵܐ ܠܲܫܡܹܗ.܀

ܪ:

ܪܵܘܡܵܐ ܪܵܥܹܡ؛ ܒܗܘܼܠܵܠܹ̈ܐ ܕܲܫܡܲܝܵܢܹ̈ܐ.

ܘܥܘܼܡܩܵܐ ܡܲܪܗܸܒ݂؛ ܒܪܝܼܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ؛ ܫܘܼܒ݂ܚܵܐ ܠܲܫܡܹܗ.܀

ܫ:

ܫܝܼܛܝܼܢ ܦܝܼܠܹ̈ܐ؛ ܘܲܒ݂ܨܝܼܪܝܼܢ ܐܲܪ̈ܝܵܘܵܬ݂ܵܐ

ܡܵܪܵܐ ܕܥܵܠܡܹ̈ܐ؛ ܩܕ݂ܵܡ ܥܝܼܠܹܗ ܥܲܦܪܵܐ ܠܵܚܟ݁ܝܼܢ؛ ܫܘܼܒ݂ܚܵܐ ܠܲܫܡܹܗ.܀

ܬ:

ܬܲܗܪܵܐ ܒܬܲܗܪܵܐ؛ ܘܕܘܼܡܵܪܵܐ ܡܠܸܐ ܕܘܼܡܵܪܵܐ.

ܕܗܵܘ ܕܲܪܟ݂ܝܼܒ݂ ܗܘ̣ܵܐ ܥܲܠ ܟܪ̈ܘܼܒܹܐ ܪܟ݂ܝܼܒ݂ ܥܲܠ ܚܡܵܪܵܐ؛ ܫܘܼܒ݂ܚܵܐ ܠܲܫܡܹܗ.܀