Marya Amlekh|ܡܵܪܝܵܐ ܐܲܡܠܸـܟ|ܡܪܝܐ ܐܡܠـܟ
Fourth Psalm of Sapra
Syriac Text
ܡܵܪܝܵܐ ܐܲܡܠܸـܟ݂ ܘܓܲܐܝܘܼܬ݂ܵܐ ܠܒܸܫ. ܣܵܓ݂ܕܝܼܢܲܢ ܠܵـܟ݂ ܐܝܼܬ݂ܝܵܐ ܕܡ̣ܢ ܡܬ݂ܘܿܡ. ܡܵܪܝܵܐ ܐܲܡܠܸـܟ݂ ܘܓܲܐܝܘܼܬ݂ܵܐ ܠܒܸܫ܀ ܠܒܸܫ ܡܵܪܝܵܐ ܥܘܼܫܢܵܐ ܘܐܸܬ݂ܥܲܫܲܢ܀ ܘܐܲܬ݂ܩܢܵܗ̇ ܠܬܹܒܹܝܠ ܕܠܵܐ ܬܙܘܼܥ܀ ܡܲܬ݂ܩܲܢܘܼ ܟܘܼܪܣܝܵـܟ݂ ܡ̣ܢ ܩܕ݂ܝܼܡ܀ ܘܡ̣ܢ ܥܵܠܲܡ ܐܲܢ݇ܬ݁ܘܼ܀ ܐܸܬ݁ܬ݁ܪܝܼܡܘ ܢܲܗܪ̈ܵܘܵܬ݂ܵܐ ܡܵܪܝܵܐ܀ ܘܐܲܪܝܼܡܘ ܢܲܗܪ̈ܵܘܵܬ݂ܵܐ ܩܵܠܗܘܿܢ܀ ܐܸܬ݁ܬ݁ܪܝܼܡܘ ܢܲܗܪ̈ܵܘܵܬ݂ܵܐ ܒܕܲܟ݂ܝܘܼܬ݂ܵܐ܀ ܡ̣ܢ ܩܵܠܵܐ ܕܡܲـ̈ـܝܵܐ ܣܲܓ݁ܝܼـܐܹ̈ܐ܀ ܥܲܫܝܼܢܝܼܢ ܡܲܚܫܘܼ̈ܠܵܘܗܝ ܕܝܲܡܵܐ܀ ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ܀ ܘܣܵܗ̈ܕܘܵܬ݂ܵܟ݂ ܛܵܒ݂ ܡܗܲܝ̈ܡܢܵܢ܀ ܘܲܠܒܲܝܬܵܟ݂ ܝܵܐܝܵܐ ܩܲܕܝܼܫܘܼܬ݂ܵܐ܀ ܡܵܪܝܵܐ ܠܢܘܼܓ݂ܪܵܐ ܕܝܵܘܡܵܬ݂ܵܐ܀ ܣܵܓ݂ܕܝܼܢܲܢ ܠܵـܟ݂ ܐܝܼܬ݂ܝܵܐ ܕܡ̣ܢ ܡܬ݂ܘܿܡ܀
ܐܲܩܸܦ: ܫܲܒܲܚܘ ܠܡܵܪܝܵܐ ܡ̣ܢ ܫܡܲܝܵܐ܀ ܫܲܒ݁ܚܘܼܗܝ ܒܲܡܪ̈ܵܘܡܹܐ܀ ܫܲܒ݁ܚܘܼܗܝ ܟܠܗܘܿܢ ܡܲܠܲܐܟ݂ܵـܘ̈ܗܝ܀ ܫܲܒ݁ܚܘܼܗܝ ܟܠܗܘܿܢ ܚܲܝܠܵܘܵܬܹ̈ܗ܀ ܫܲܒ݁ܚܘܼܗܝ ܫܸܡܫܵܐ ܘܣܲܗܪܵܐ܀ ܫܲܒ݁ܚܘܼܗܝ ܟܠ ܟܵܘܟ݁ܒܹ̈ܐ ܘܢܘܼܗܪܵܐ܀ ܫܲܒ݁ܚܘܼܗܝ ܫܡܲܝ̈ ܫܡܲܝܵܐ܀ ܡܲܝ̈ܵـܐ ܕܲܠܥܸܠ ܡ̣ܢ ܫܡܲܝܵܐ ܢܫܲܒ݁ܚܘܼܢ ܠܲܫܡܹܗ ܕܡܵܪܝܵܐ܀ ܡܸܛܠ ܕܗ̤ܘ ܐܸܡܲܪ ܘܲܗܘ̤ܵܘ ܘܗ̤ܘ ܦܩܲܕ݂ ܘܐܸܬ݂ܒ݁ܪܝܼܘ܀ ܘܐܲܩܝܼܡ ܐܸܢܘܿܢ ܠܥܵܠܲܡ ܥܵܠܡܝܼܢ܀ ܢܵܡܘܿܣܵܐ ܝܲܗ݇ܒ݂ ܘܠܵܐ ܥܵܒܲܪ܀ ܫܲܒܲܚܘ ܠܡܵܪܝܵܐ ܡ̣ܢ ܐܲܪܥܵܐ܀ ܬܲܢܝܼܢܹ̈ܐ ܘܟ݂ܠܗܘܿܢ ܬܗܘܿܡܹ̈ܐ܀ ܢܘܼܪܵܐ ܘܒܲܪܕܵܐ ܘܬܲܠܓܵܐ ܘܲܓ݂ܠܝܼܕ݂ܵܐ܀ ܪ̈ܘܼܚܹܐ ܘܥܲܠܥܵـܠܹ̈ܐ ܥܒ݂ܵܕ݂ܵܐ ܕܡܸܠܬܹܗ܀ ܛܘܼܪܹ̈ܐ ܘܟ݂ܠܗܹܝܢ ܪܵܡܵܬ݂ܵܐ܀ ܐܝܼܠܵܢܹ̈ܐ ܕܦܹܐܪܹ̈ܐ ܘܟ݂ܠܗܘܿܢ ܐܲܪ̈ܙܹܐ܀ ܚܲܝ̱ܘܬ݂ܵܐ ܘܟ݂ܠܵܗ̇ ܒܥܝܼܪܵܐ܀ ܪ̈ܲܚܫܵܐ ܘܛܲܝܪܵܐ ܘܦܵܪܲܚܬ݂ܵܐ܀ ܡܲܠܟܹ̈ܐ ܕܐܲܪܥܵܐ ܘܟ݂ܠܗܹܝܢ ܐܸܡܘܵܬ݂ܵܐ܀ ܪܵܘܪ̈ܒ݂ܵܢܹܐ ܘܟ݂ܠܗܘܿܢ ܕܲܝܵـܢܹ̈ܐ ܕܐܲܪܥܵܐ܀ ܓܲܕ݁ܘܼܕܹ̈ܐ ܘܲܒ݂ܬ݂ܘܼܠܵܬ݂ܵܐ܀ ܣܵܒܹ̈ܐ ܘܲܥܠܲܝܡܹ̈ܐ ܢܫܲܒ݁ܚܘܼܢ ܠܲܫܡܹܗ ܕܡܵܪܝܵܐ܀ ܡܸܛܠ ܕܪܲܒ݁ܘܼ ܫܡܹܗ ܒܲܠܚܘܿܕ݂ܵܘܗܝ܀ ܘܫܘܼܒ݂ܚܹܗ ܒܐܲܪܥܵܐ ܘܒܲܫܡܲܝܵܐ܀ ܡܪܝܼܡ ܩܲܪܢܵܐ ܕܥܲܡܹܗ ܘܬܸܫܒ݁ܘܿܚܬܵܐ ܕܟ݂ܠܗܘܿܢ ܙܲܕ݁ܝܼܩܵܘ̈ܗܝ܀ ܠܲܒ݂ܢܲܝ̈ ܝܼܣܪܵܝܹܠ ܥܲܡܵܐ ܕܩܲܪܝܼܒ݂ ܠܹܗ܀
ܫܲܒܲܚܘ ܠܡܵܪܝܵܐ ܒܩܘܼܕ݂ܫܹܗ܀ ܫܲܒ݁ܚܘܼܗܝ ܒܲܪܩܝܼܥܵܐ ܕܥܘܼܫܢܹܗ܀ ܫܲܒ݁ܚܘܼܗܝ ܒܚܲܝ̱ܠܬ݂ܵܢܘܼܬܹܗ܀ ܫܲܒ݁ܚܘܼܗܝ ܒܣܘܿܓ݂ܵܐܐ ܕܪܲܒ݁ܘܼܬܹܗ܀ ܫܲܒ݁ܚܘܼܗܝ ܒܩܵܠܵܐ ܕܩܲܪܢܵܐ܀ ܫܲܒ݁ܚܘܼܗܝ ܒܩܝܼܬ݂ܵܪܹ̈ܐ ܘܲܒ݂ܟܸܢܵܪܹ̈ܐ܀ ܫܲܒ݁ܚܘܼܗܝ ܒܲܦܠܲܓܹ̈ܐ ܘܒܲܪ̈ܒ݂ܝܼܥܹܐ܀ ܫܲܒ݁ܚܘܼܗܝ ܒܡ̣ܢܹ̈ܐ ܚܲܠܝܵܬ݂ܵܐ܀ ܫܲܒ݁ܚܘܼܗܝ ܒܨܸܨܠܲܝ̈ ܫܸܡܥܵܐ ܫܲܒ݁ܚܘܼܗܝ ܒܩܵܠܵܐ ܘܒܲܩܥܵܬ݂ܵܐ܀ ܒܟ݂ܠ ܢܸܫܡܵܐ ܢܫܲܒܲܚ ܠܡܵܪܝܵܐ܀
ܫܲܒܲܚܘ ܠܡܵܪܝܵܐ ܟܠܟ݂ܘܿܢ ܥܲܡܡܹ̈ܐ܀ ܫܲܒ݁ܚܵܘ̈ܗܝ ܟܠܗܹܝܢ ܐܸܡܘܵܬ݂ܵܐ܀ ܡܸܛܠ ܕܥܸܫܢܲܬ̤ ܥܠܲܝܢ ܛܲܝܒ݁ܘܼܬܹܗ܀ ܫܲܪܝܼܪܵܐܝܼܬ݂ ܡܵܪܝܵܐ ܗ݇ܘ̣ ܠܥܵܠܲܡ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ܀ ܡ̣ܢ ܥܵܠܲܡ ܘܲܥܕ݂ܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀
ܘܡܲܩܦܝܼܢ: ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ. ܝܵܗܹܒ݂ ܢܘܼܗܪܵܐ ܡܵܪܝܵܐ ܠܵـܟ݂ ܫܘܼܒ݂ܚܵܐ ܡܲܣܩܝܼܢܲܢ܀
ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ.
Assyrian Church of the East
Source: Hudra of the ACOE, Darmo 1961, Vol I
Page ܩܓ
Chaldean Catholic Church
Assyrian Church of the East
To submit a recording for this hymn, please create an account
Comments
Add a comment
Your email address will not be published. Required fields are marked *