Marya Qrethakh (ܡܵܪܝܵܐ ܩܪܹܝܬ݂ܵܟ݂)

Context

Marya Qrethakh - Evening Psalms (140, 141, 118 : 105‑112, and 116) from the Ramsha

Text

Syriac Text

ܡܵܪܝܵܐ ܩܪܹܝܬ݂ܵܟ݂

ܡܵܪܝܵܐ ܩܪܹܝܬ݂ܵܟ݂ ܐܲܢ݇ܬ݁ ܥܢܝܼܢܝ. ܨܘܼܬ݂ ܡܸܠܲܝ̈ ܘܩܲܒܸ݁ܠ ܨܠܘܿܬ݂ܝ. ܡܵܪܝܵܐ ܩܪܹܝܬ݂ܵܟ ܐܲܢ݇ܬ݁ ܥܢܝܼܢܝ܀ ܨܘܼܬ݂ ܡܸܠܲܝ̈ ܘܩܲܒܸ݁ܠ܀ ܨܠܘܿܬ݂ܝ ܐܲܝܟ݂ ܥܸܛܪܵܐ ܩܕ݂ܵܡܲܝܟ܀ ܩܘܼܪܒܵܢܵܐ ܕܐܝܼܕܲܝ̈ ܐܲܝܟ݂ ܩܘܼܪܒܵܢܹܗ ܕܪܲܡܫܵܐ܀ ܐܲܩܝܼܡ ܡܵܪܝܵܐ ܢܵܛܘܿܪܵܐ ܠܦܘܼܡܝ ܘܢܵܛܘܿܪܵܐ ܠܣܸܦܘ̈ܵܬ݂ܝ܀ ܕܠܵܐ ܢܸܣܛܸܐ ܠܹܒ݁ܝ ܠܡܸܠܬ݂ܵܐ ܒܝܼܫܬܵܐ܀ ܘܐܸܥܒܸ݁ܕ ܥܒ݂ܵܕܹ̈ܐ ܕܥܵܘܠܵܐ܀ ܥܲܡ ܓܲܒ݂ܪܹ̈ܐ ܪ̈ܲܫܝܼܥܹܐ ܠܵܐ ܐܸܬ݂ܡܲܠܲܚ ܥܲܡܗܘܿܢ܀ ܢܲܠܦܲܢܝ ܙܲܕ݁ܝܼܩܵܐ ܘܢܲܟ݁ܣܲܢܝ܀ ܡܸܫܚܵܐ ܕܪ̈ܲܫܝܼܥܹܐ ܠܪܹܫܝ ܠܵܐ ܢܲܕ݂ܗܸܢ܀ ܡܸܛܠ ܕܲܨܠܘܿܬ݂ܝ ܥܲܠ ܒܝܼܫܘܼܬ݂ܗܘܿܢ܀ ܘܐܸܬ݂ܟ݁ܠܝܼܘ ܒܐܝܼܕ݂ܵܐ ܕܟܹܐܦܵܐ ܕܲܝܵـܢܲܝ̈ܗܘܿܢ܀ ܘܲܫܡܲܥ ܡܸܠܲܝ̈ ܕܒܲܣ̈ܝܼܡܵܢ܀ ܐܲܝܟ݂ ܣܸܟ݁ܬ݂ܵܐ ܕܨܵܪܝܵܐ ܐܲܪܥܵܐ܀ ܐܸܬ݂ܒܲܕܲܪܘ ܓܲܪ̈ܡܲܝܗܘܿܢ ܥܲܠ ܦܘܼܡܵܗ̇ ܕܲܫܝܘܿܠ܀ ܘܐܸܢܵܐ ܠܘܵܬ݂ܵܟ݂ ܡܵܪܝܵܐ ܐܲܪܝܼܡܹܬ݂ ܥܲܝܢܲܝ̈܀ ܘܲܥܠܲܝܟ ܐܸܬ݁ܬܲܟ݂ܠܹܬ݂ ܠܵܐ ܬܸܫܕܹܝܗ̇ ܠܢܲܦ̮ܫܝ܀ ܢܲܛܲܪܲܝܢܝ ܡ̣ܢ ܐܝܼܕܵܐ ܕܫܲܒ݂ܗ̱ܪ̈ܵܢܹܐ܀ ܕܲܛܡܲܪܘ ܠܝܼ ܦܲܚܹ̈ܐ܀ ܢܸܦܠܘܼܢ ܥܵܘ̈ܵܠܹܐ ܐܲܟ݂ܚ݇ܕ݂ܵܐ ܒܲܡܨܝܼܕ݂ܵܬ݂ܗܘܿܢ܀ ܥܕܲܡܵܐ ܕܐܸܥܒܲܪ ܐܸܢܵܐ܀

ܒܩܵܠܝ ܠܡܵܪܝܵܐ ܩܪܹܝܬ݂ ܒܩܵܠܝ ܠܡܵܪܝܵܐ ܐܸܬ݂ܟܲܫܦܹـܬ݂܀ ܘܐܲܪܡܝܬ݂ ܩܕ݂ܵܡܵܘܗܝ ܬܲܟ݂ܫܲܦ̮ܬ݁ܝ܀ ܘܐܘܼܠܨܵܢܝ ܩܕ݂ܵܡܵܘܗܝ ܚܵܘܝܲܬ݂܀ ܟܲܕ ܐܸܬ݁ܛܲܪܦܲܬ݀ ܪܘܼܚܝ ܐܲܢ݇ܬ݁ ܝܵܕܲܥ ܐܲܢ݇ܬ݁ ܫܒ݂ܝܼܠܲܝ̈܀ ܒܐܘܼܪܚܵܐ ܕܗܲܠܟ݂ܵܬ݂̈ܝ ܛܡܲܪܘ ܠܝܼ ܦܲܚܹ̈ܐ܀ ܚܵܪܹܬ݂ ܠܝܲܡܝܼܢܵܐ ܘܲܚܙܹܝܬ݂ ܘܠܲܝܬ݁ ܕܚܵܟܹ݁ـܡ ܠܝܼ܀ ܐܸܒܲܕ݂ ܡܹܢܝ ܒܹܝܬ݂ ܡܲܥ̱ܪܩܵܐ ܘܠܲܝܬ݁ ܬ݁ܒ݂ܘܿܥܵܐ ܠܢܲܦ̮ܫܝ܀ ܘܲܓ݂ܥܹܝܬ݂ ܠܘܵܬ݂ܵܟ݂ ܡܵܪܝܵܐ ܘܐܸܡܵܪܹܬ݂܀ ܕܐܲܢ݇ܬ݁ܘܼ ܣܲܒ݂ܪܝ ܘܲܡܢܵܬ݂ܝ ܒܐܲܪܥܵܐ ܕܚܲܝܹ̈ـܐ܀ ܨܘܼܬ݂ ܠܒ݂ܵܥܘܼܬ݂ܝ ܡܸܛܠ ܕܐܸܬ݂ܡܲܟ݁ܟܹܬ݂ ܛܵܒ݂܀ ܦܲܨܵܢܝ ܡ̣ܢ ܪ̈ܵܕܘܿܦܲܝ ܡܸܛܠ ܕܲܥܫܸܢܘ ܡܹܢܝ܀ ܐܲܦܸـܩ ܢܲܦ̮ܫܝ ܡ̣ܢ ܒܹܝܬ݂ ܚܒ݂ܘܼܫܝܵܐ ܕܐܵܘܕܹ݁ܐ ܠܲܫܡܵܟ݂܀ ܠܝܼ ܢܣܲܟ݁ܘܿܢ ܙܲܕ݁ܝܼܩܲܝ̈ـܟ݂ ܟܲܕ ܬܸܦܪܥܲܢܝ܀ ܫܪܵܓ݂ܵܐ ܗ݇ܝܼ ܡܸܠܬ݂ܵܟ݂ ܠܪܸ̈ܓ݂ܠܲܝ ܘܢܘܼܗܪܵܐ ܠܲܫܒ݂ܝܼܠܲܝ̈܀ ܝܼܡܝܼܬ݂ ܘܐܲܫܪܹܬ݂ ܕܐܸܛܲܪ ܕܝܼܢܹ̈ܐ ܕܙܲܕ݁ܝܼܩܘܼܬ݂ܵܟ݂܀ ܐܸܬ݂ܡܲܟ݁ܟܹܝܬ݂ ܪܵܘܪܒ݂ܵܐܝܼܬ݂ ܡܵܪܝܵܐ ܐܲܚܵܢܝ ܐܲܝܟ݂ ܡܸܠܬ݂ܵܟ݂܀ ܒܡܸܠܵܘ̈ܗܝ ܕܦܘܼܡܝ ܨܒ݂ܝܼ ܡܵܪܝܵܐ ܘܡ̣ܢ ܕܝܼܢܲܝ̈ـܟ ܐܲܠܸܦܲܝܢܝ܀ ܢܲܦ̮ܫܝ ܒܐܝܼܕܲܝ̈ـܟ ܗ݇ܝܼ ܒܟ݂ܠܙܒܲܢ ܘܢܿܡܘܿܣܵـܟ݂ ܠܵܐ ܛܥܹܝܬ܀ ܣܵܡ݂ܘ ܠܝܼ ܚܲܛܵܝܹ̈ـܐ ܦܲܚܹ̈ܐ ܘܡ̣ܢ ܦܘܼܩܕܵܢܲܝ̈ـܟ ܠܵܐ ܣܛܹܝܬ݂܀ ܝܸܪܬܹ݁ܬ݂ ܣܵܗ̇ܕܘܼܬ݂ܵܟ݂ ܠܥܵܠܲܡ ܡܸܛܠ ܕܒ݂ܘܼܣܵܡܵܐ ܗ݇ܝܼ ܕܠܹܒ݁ܝ܀ ܐܲܦܢܝܼܬ݂ ܠܹܒ݁ܝ ܕܐܸܥܒܸ݁ܕ ܦܘܼܩܕܵܢܲܝ̈ـܟ ܠܥܵܠܲܡ ܒܲܫܪܵܪܵܐ܀