Mshiha Shlama D'ellaye|ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ|ܡܫܝܚܐ ܫܠܡܐ ܕܥܠܝܐ

ܩܠܐ ܕܫܬܬܥܣܪ 

ܒܪܘܼܟܵܒ݂ ܗܵܘ̇ ܕܒ݂ܐܝܼܬ݂ܘܼܬܹܗ. 

ܢܸܫܩ̄ܠܘܼܢ ܛܘܼܪܹ̈ܐ ܫܠܵܡܵܐ ܠܥܲܡܵܟ݂. ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ. ܘܫܲܝܢܵܐ ܪܲܒܵܐ ܕܬܲܚܬܵܝܹ̈ܐ. ܕܲܫ̣ܪܵܐ ܣܝܵܓ݂ܵܐ ܕܒܲܡܨܲܥܬܼܵܐ. ܘܣܲܒܲܪ ܫܠܵܡܵܐ ܠܪ̈ܲܚܝܼܩܹܐ ܘܲܠܩܲܪ̈ܝܼܒܹܐ܀ ܐܲܫܪܵܐ ܫܲܝܢܵܟ݂ ܒܓ݂ܵܘ ܥܹܕܬܵܟ݂. ܘܒܲܛܸܠ ܡ̣ܢܵܗ̇ ܚܸܪ̈ܝܵܢܹܐ. ܘܟ݂ܠ ܣܸܕ݂ܩ̈ܝܼܢ ܘܟ݂ܠ ܦܘܼ̈ܠܵܓ݂ܝܼܢ. ܕܐܲܒܲܥ ܒܵܗ̇ ܐܵܟܹܠܩܲܪܨܵܐ. ܘܩܲܝܸܡ ܟܵܗܢܹ̈ܝܗ̇ ܒܲܚܢܵܢܵܟ݂. ܘܢܲܛܲܪ ܝܲܠܕܹܝ̈ܗ̇ ܒܛܲܝܒ݁ܘܼܬ݂ܵܟ݂. ܘܐܲܒ݂ܗܸܬ݂ ܠܒ݂ܝܼܫܵܐ ܒܥܸܠܕܲܪܵܗ̇. ܘܲܣܚܘܿܦ ܠܟ݂ܠܗܘܿܢ ܣܵܩܘܿܪܹ̈ܝܗ̇܀ ܫܘܼܪܵܐ ܪܵܡܵܐ ܐܲܟ݂ܪܸܟ݂ ܠܵܗ̇. ܨܠܝܼܒ݂ܵܟ݂ ܚܲܝܵܐ ܘܲܣܓܝܼܕܵܐ. ܘܩܘܼܫܬܵܟ݂ ܙܲܝܢܵܐ ܚܲܣܝܼܢܵܐ. ܠܘܼܩܒܲܠ ܣܸܕ݂ܪܵܘܗܝ ܕܲܢܟ݂ܝܼܠܵܐ. ܘܐܲܫܘܵܐ ܠܟ݂ܠܲܢ ܒܲܚܢܵܢܵܟ݂. ܕܢܸܫܦܲܪ ܠܨܸܒ݂ܝܵܢ ܡܵܪܘܼܬܼܵܟ݂. ܒܗܲܝܡܵܢܘܼܬܵܐ ܕܲܫܪܵܪܵܐ. ܘܕܘܼܒܵܪܹ̈ܐ ܕܲܡܪܲܥܹܝܢ ܠܵܟ݂܀ ܘܲܒ݂ܗܵܘ ܝܵܘܡܵܐ ܕܡܸܬ݂ܓ݁ܠܹܝܬ݁ ܒܫܘܼܒ݂ܚܵܟ݂ ܪܲܒܵܐ. ܐܲܫܘܵܢ ܕܢܸܥܘܿܠ ܠܲܓ݂ܢܘܿܢܵܟ݂. ܥܲܡ ܟܹܐܢܹ̈ܐ ܕܲܫܦܲܪܘ ܩܘܕ݂ܡܲܝܟ. ܘܗܲܝܡ̣ܢܘ ܘܐܵܘܕܝܼܘ ܒܡܵܪܘܼܬ݂ܵܟ݂؛ ܕܥܲܡܗܘܿܢ ܢܵܘܕܸܐ ܠܛܲܝܒ݁ܘܼܬ݂ܟ݂. ܒܛܘܼ̈ܒܹܐ ܕܣܵܟ݂ܵܐ ܠܵܐ ܢܵܣ̇ܒ݁ܝܼܢ.