O Awla D'neshe|ܐܘܿ ܥܵܘ̣ܠܵܐ ܕܢܸܫܹ̈ܐ|ܐܘ ܥܘܠܐ ܕܢܫܐ

ܐܘܿ ܥܵܘܠܵܐ ܕܢܸܫܹ̈ܐ

ܪܹܫ ܩܵܠܵܐ

ܐܘܿ ܥܵܘܠܵܐ ܕܢܸܫܹ̈ܐ؛ ܕܒ݂ܝܼܫ ܡ̣ܢ ܟܠ ܒܝܼܫܹ̈ܐ. ܡ̣ܢ ܫܹܐܕܹ̈ܐ ܟܬ݂ܝܼܫܹ̈ܐ؛ ܣܵܗܹܕ݂ ܝܘܿܚܲܢܵܢ.܀

ܪܲܩܕܲܬ̤ ܡܲܪܩܘܼܕܬܵܐ؛ ܫܸܦܪܲܬ̤ ܓܲܝܵܪܬܵܐ ܒܲܪܬ݂ܵܗ̇ ܕܥܵܘܵܠܬܵܐ. ܒܩܸܛܠܹܗ ܕܝܘܿܚܲܢܵܢ.܀

ܣܲܒ݁ܪܹܗ ܪܹܫ ܥܝܼܪܹ̈ܐ؛ ܦܲܣܩܹܗ ܪܹܫ ܨܥܝܼܪܹ̈ܐ؛ ܠܲܓ݁ܡܝܼܪ ܒܲܓ݁ܡܝܼܪܹ̈ܐ؛ ܣܵܗܕܵܐ ܝܘܿܚܲܢܵܢ.܀

ܥܸܠܲܬ̤ ܪܸܩܕܲܬ̤ ܗ݇ܘ̣ܵܬ݂؛ ܐܲܣܓ݁ܝܲܬ̤ ܐܲܚܨܦܲܬ̤ ܗ݇ܘ̣ܵܬ݂. ܐܲܪܫܥܲܬ̤ ܘܐܲܣܟ݁ܠܲܬ̤ ܗ݇ܘ̣ܵܬ݂؛ ܒܩܸܛܠܹܗ ܕܝܘܿܚܲܢܵܢ.܀

ܡܲܫܬ݁ܝܵܐ ܡܲܪܝܼܪܵܐ؛ ܥܒܲܕ݂ ܡܲܠܟܵܐ ܦܲܩܪܵܐ. ܕܸܡܥܹ̈ܐ ܥܲܡ ܚܲܡܪܵܐ؛ ܒܩܸܛܠܹܗ ܕܝܘܿܚܲܢܵܢ.܀

ܝܼܡܵܐ ܒܡܵܘܡܵܬ̣̈ܵܐ؛ ܗ̇ܘ ܡܠܸܐ ܢܟ݂ܝܼܠܘܼܬ݂ܵܐ. ܠܲܛܠܝܼܬ݂ܵܐ ܣܟܲܠܬ݂ܵܐ؛ ܒܩܸܛܠܹܗ ܕܝܘܿܚܲܢܵܢ.܀

ܫܐܲܠܝ ܡܵܐ ܕܨܵܒ݂ܝܵܐ ܐܲܢ݇ܬ݁ܝ؛ ܒܥܵܝ ܡܵܐ ܕܒ݂ܵܥܝܵܐ ܐܲܢ݇ܬ݁ܝ. ܘܠܵܐ ܡܸܬ݂ܟܲܠܝܵܐ ܐܲܢ݇ܬ݁ܝ؛ ܒܩܸܛܠܹܗ ܕܝܘܿܚܲܢܵܢ.܀

ܪܸܗܛܲܬ̤ ܗ݇ܘ̣ܵܬ݂ ܘܐܸܙܲܠ݇ܬ̤؛ ܠܘܵܬ݂ ܐܸܡܵܗ̇ ܘܐܸܡܪܲܬ̤. ܕܡܘܿܢ ܬܸܗܘܸܐ ܫܹܐܠܲܬ݂ܝ؛ ܒܩܸܛܠܹܗ ܕܝܘܿܚܲܢܵܢ.܀

ܘܗܸܦܟܲܬ̤ ܒܵܗ̇ ܒܫܵܥܬ݂ܵܐ؛ ܗ̇ܝ ܛܠܝܼܬ݂ܵܐ ܠܝܼܛܬܵܐ. ܒܲܪܬ݂ܵܐ ܕܡܲܪܲܚܬܵܐ. ܘܫܹܐܠܲܬ̤ ܠܝܘܿܚܲܢܵܢ.܀

ܗܲܒ݂ܠܝܼ ܕܫܵܐܠܵܐ ܐ݇ܢܵܐ؛ ܡܸܕܸܡ ܕܨܵܒ݂ܝܵܐ ܐ݇ܢܵܐ. ܪܹܫ ܡܲܥܡ̱ܕ݂ܵܢܵܐ؛ ܣܵܗܕܵܐ ܝܘܿܚܲܢܵܢ.܀

ܢ̣ܦܲܩ ܐܸܣܦܘܼܩܠܲܛܪܵܐ؛ ܘܐܲܝܬ݁ܝܹܗ ܐܲܝܟ݂ ܠܝܼܛܪܵܐ. ܠܗ̇ܘ ܪܹܫܵܐ ܡܝܲܩܪܵܐ؛ ܕܣܵܗܕܵܐ ܝܘܿܚܲܢܵܢ.܀

ܣܵܡܬܹܗ ܥܲܠ ܦܝܼܢܟ݂ܵܐ؛ ܘܐܵܙܵܠ݇ܐ ܘܲܡܗܲܠܟ݂ܵܐ. ܠܗ̇ܘ ܪܹܫܵܐ ܡܒܲܪܟ݂ܵܐ ܕܣܵܗܕܵܐ ܝܘܿܚܲܢܵܢ.܀

ܘܲܠܝܵܘܡܵܐ ܕܥܸܣܪܵܐ؛ ܒܥܹܕܵܢܵܐ ܕܛܲܗܪܵܐ. ܪܕ݂ܵܬ̤ ܕܬܸܣܚܸܐ ܒܢܲܗܪܵܐ؛ ܩܵܛܠܲܬ݂ ܝܘܿܚܲܢܵܢ.܀

ܒܠܲܥܬ݂ܵܗ̇ ܒܵܠܲܥܬ݂ܼܵܐ؛ ܘܛܸܒ݂ܥܲܬ̤ ܒܓ݁ܵܘ ܗܵܘܬ݂ܵܐ. ܐܲܝܟ݂ ܟܹܐܦܵܐ ܒܝܲܡܬ݂ܵܐ؛ ܒܩܸܛܠܹܗ ܕܝܘܿܚܲܢܵܢ.܀

ܘܐܸܡܵܗ̇ ܐܸܣܬܲܡܝܲܬ̤؛ ܘܡ̣ܢ ܟܠ ܐܸܣܬܲܢܝܲܬ̤. ܒܩܲܫܝܘܼ ܐܸܬ݂ܡܲܚܝܲܬ̤؛ ܒܩܸܛܠܹܗ ܕܝܘܿܚܲܢܵܢ.܀

ܗ̇ܘ ܡܠܸܐ ܢܟ݂ܝܼܠܘܼܬ݂ܵܐ؛ ܒܠܲܥ ܫܒܲܥ ܡܲܚܘܵܬ̣̈ܵܐ. ܚܕ݂ܵܐ ܒܵܬܲܪ ܐ݇ܚܪܹܬ̣ܵܐ؛ ܒܩܸܛܠܹܗ ܕܝܘܿܚܲܢܵܢ.܀

ܐܘܿ ܟܵܗܢܵܐ ܢܒ݂ܝܼܵܐ؛ ܘܡܲܠܲܐܟܹܗ ܕܡܵܪܝܵܐ. ܫܠܝܼܚܵܐ ܩܲܕ݂ܡܵܝܵܐ؛ ܣܵܗܕܵܐ ܝܘܿܚܲܢܵܢ.܀

ܐܲܦܝܼܣ ܠܚܲܢܵܢܵܐ؛ ܕܢܲܫܘܹܝܗܝ ܠܲܚܢܵܢܵܐ. ܠܟܸܢܫܲܢ ܡܙܲܡܪܵܢܵܐ ܒܥܹܐܕ݂ܵܟ݂ ܝܘܿܚܲܢܵܢ.܀

ܬܸܫܪܸܐ ܛܲܝܒ݁ܘܼܬ݂ܵܐ؛ ܥܲܠ ܗܵܢܵܐ ܒܲܝܬܵܐ. ܘܫܘܼܒ݂ܚܵܐ ܘܬ݂ܵܘܕܝܼܬ݂ܵܐ؛ ܠܡܵܪܹܗ ܕܝܘܿܚܲܢܵܢ.܀