O Bnaya D'ma'moditha|ܐܘܿ ܒܢܲܝ̈ܵܐ ܕܡܲܥܡܘܿܕܝܼܬ݂ܵܐ|ܐܘ ܒܢܝܐ ܕܡܥܡܘܕܝܬܐ

ܐܘܿ ܒܢܲܝܵܐ ܕܡܲܥܡܘܿܕܝܼܬ݂ܵܐ

ܐ؛

ܐܘܿ ܒܢܲܝܵܐ ܕܡܲܥܡܘܿܕܝܼܬ݂ܵܐ

ܕܐܸܬ݂ܟܲܢܲܫܘ ܠܥܹܕܬܵܐ ܓܒ݂ܝܼܬ݂ܵܐ.

ܕܲܟܵܘ ܠܸܒܵܐ ܘܬܲܪܥܝܼܬ݂ܵܐ؛

ܩܕ݂ܵܡ ܣܒܲܪܬ݂ܵܐ ܡܲܚܝܵܢܝܼܬ݂ܵܐ.܀

ܒ؛

ܒܲܫܡܹܗ ܕܐܲܠܵܗܵܐ ܕܡ̣ܢ ܡܬ݂ܘܿܡ؛

ܕܲܥܠܵܘܗܝ ܫܲܪܝܼܢܲܢ ܕܢܸܚܬ݂ܘܿܡ.

ܙܵܕܹܩ ܕܲܢܨܲܠܸܐ ܘܲܢܨܘܼܡ؛

ܕܲܟܒܲܪ ܬܸܬ݂ܚܲܣܸܐ ܚܛܝܼܬ݂ܵܐ.܀

ܓ؛

ܓܲܒ݂ܪܹ̈ܐ ܐܲܟ݂ܚܲܕ݂ ܥܲܡ ܢܸܫܹ̈ܐ؛

ܒܲܨܠܘܿܬ݂ܵܐ ܕܨܲܦܪܹ̈ܐ ܘܪ̈ܲܡܫܹܐ.

ܩܕ݂ܵܡ ܫܟ݂ܝܼܢܵܬ̣̈ܵܐ ܕܩܲܕܝܼܫܹ̈ܐ؛

ܗܘ̤ܵܘ ܩܵܝܡܝܼܢ ܒܬܹܐܪܬܵܐ ܕܟ݂ܝܼܬ݂ܵܐ.܀

ܕ؛

ܕܐܵܕ݂ܵܡ ܥܲܠ ܗܵܕܹܐ ܐܸܬ݂ܒ݁ܪܝܼ؛

ܘܨܲܠܡܹܗ ܕܐܲܠܵܗܵܐ ܐܸܬ݂ܩܪܝܼ.

ܥܲܠ ܕܲܥܒܲܪ ܦܘܼܩܕܵܢ ܐܸܫܬ݁ܪܝܼ؛

ܐܸܬ݁ܛܪܸܕ݂ ܘܲܢܦܲܩ ܡ̣ܢ ܓܲܢܬ̣ܵܐ.܀

ܗ؛

ܗܵܕܹܐ ܥܲܠ ܒܵܠܲܢ ܢܲܝܬܹܐ؛

ܕܟ݂ܠ ܒܲܪܢܵܫܵܐ ܢܲܦ̮ܫܹܗ ܢܲܪܬܹܐ.

ܘܲܢܛܸܝܸܒ݂ ܙܘܵܕܹ̈ܐ ܘܢܲܚܬܹ̈ܐ؛

ܕܢܸܬ݂ܡܲܢܲܥ ܠܲܚܫܵܡܝܼܬ݂ܵܐ.܀

ܘ؛

ܘܠܵܐ ܢܸܗܘܹܐ ܚܢܲܢ ܐܲܝܟ݂ ܐܵܕ݂ܵܡ؛

ܕܐܸܬ݁ܛܪܸܕ݂ ܒܗ̇ܘ ܝܵܘܡܵܐ ܕܒܹܗ ܩܵܡ̣.

ܘܢܸܫܒ݁ܘܿܩ ܠܣܵܢܐܵܐ ܕܲܡܠܹܐ ܚܣܵܡ؛

ܕܢܸܗܘܸܐ ܒܬܲܫܢܝܼܩܵܐ ܒܚܲܪܬ݂ܵܐ.܀

ܙ؛

ܙܵܕܹܩ ܕܢܸܗܘܹܐ ܒܲܢ ܚܘܼܒܵܐ؛

ܘܢܸܬ݂ܡܲܟܲܟ݂ ܙܥܘܿܪܵܐ ܘܪܲܒܵܐ.

ܕܡܵܐ ܕܐܵܬܹܐ ܡܵܪܹܐ ܚܵܘܒܵܐ؛

ܢܸܫܟܲܚ ܟܸܣܦܵܐ ܘܪܸܒ݁ܝܼܬ݂ܵܐ.܀

ܚ؛

ܚܲܝܠܬ݂ܵܢܵܐ ܗ݇ܘ̣ܵܐ ܘܓܲܢ݇ܒܵܪܵܐ؛

ܕܲܚ̣ܙܵܐ ܕܐܸܬ݂ܚܲܦܝܼ ܫܪܵܪܵܐ.

ܓܒ݂ܵܐ ܠܢܘܿܚ ܟܹܐܢܵܐ ܢܲܓܵܪܵܐ؛

ܕܩܹܒ݂ܘܿܬ݂ܵܐ ܡܫܵܘܙܒ݂ܵܢܝܼܬ݂ܵܐ.܀

ܛ؛

ܛܵܘܦܵܢܵܐ ܗܘ̤ܵܐ ܥܲܠ ܐܲܪܥܵܐ؛

ܐܸܫܬܵܐ ܝܲܪ̈ܚܹܐ ܥܲܡ ܫܲܒ݂ܥܵܐ.

ܘܠܵܐ ܦܵܫ̣ ܒܵܗ̇ ܛܘܿܗܡܵܐ ܘܙܲܪܥܵܐ؛

ܐܸܠܵܐ ܐܸܢ ܒܓ݁ܵܘ ܩܹܒ݂ܘܿܬ݂ܵܐ.܀

ܝ؛

ܝܼܡܵܐ ܦܘܼܡܹܗ ܕܡܲܚܝܵܢܵܐ؛

ܕܠܵܐ ܥܵܒܸܕ݂ ܐ݇ܢܵܐ ܛܵܘܦܵܢܵܐ.

ܩܸܫܬ݁ܝ ܝܵܗܹܒ݂ ܐ݇ܢܵܐ ܒܲܥܢܵܢܵܐ؛

ܕܬܸܗܘܸܐ ܠܝܼ ܘܲܠܟ݂ܘܿܢ ܐܵܬ݂ܵܐ.܀

ܟ؛

ܟܲܕ݂ ܐܸܬ݂ܦܲܬ݂ܚܲܬ̤ ܩܹܒ݂ܘܿܬ݂ܵܐ؛

ܒܫܲܢ݇ܬܵܐ ܗ̇ܝ ܬܪܲܝܵܢܝܼܬ݂ܵܐ.

ܐܸܫܬ݁ܟܲܚ̈ ܬܡܵܢܹܐ ܢܲܦ̮ܫܵܬ̣̈ܵܐ؛

ܕܢܸܗܘ̈ܝܵܢ ܚܠܵܦܬ݂ܵܐ ܠܲܒ݂ܪܝܼܬ݂ܵܐ.܀

ܠ؛

ܠܵܐ ܦܵܫ̣ ܥܲܠ ܐܲܪܥܵܐ ܒܣܵܘܩܵܐ؛

ܘܠܵܐ ܕܲܢܫܲܡܬ݂ܵܐ ܒܹܗ ܣܵܠܩܵܐ.

ܠܵܐ ܒܪܵܘܡܵܐ ܐܵܦܠܵܐ ܒܥܘܼܡܩܵܐ؛

ܐܸܠܵܐ ܐܸܢ ܫܠܲܕܵܐ ܡܝܼܬ݂ܵܐ.܀

ܡ؛

ܡ̣ܢ ܬܡܵܢܹܐ ܢܲܦ̮ܫܵܬ̣̈ܵܐ ܩܵܡ̈؛

ܡܕ݂ܝܼܢܵܬ̣̈ܵܐ ܘܩܘܼܪ̈ܝܵܐ ܘܟ݂ܠ ܥܲܡ.

ܘܡ̣ܢܗܹܝܢ ܐܸܬ݂ܚܙܝܼ ܐܲܒ݂ܪܵܗܵܡ؛

ܡܗܲܝܡܢܵܐ ܟܹܐܢܵܐ ܕܠܵܐ ܥܸܠܬ݂ܵܐ.܀

ܢܢ؛

ܢܒ݂ܝܼܹ̈ܐ ܕܡ̣ܢ ܐܝܼܣܚܲܩ ܐܸܬ݂ܚܙܝܼܘ؛

ܠܓܸܠܝܵܢܹܗ ܕܡܵܪܝܵܐ ܐܸܬ݂ܓ݁ܠܝܼܘ.

ܘܟ݂ܠܗܘܿܢ ܐܲܟ݂ܚܲܕ݂ ܐܸܬ݂ܢܲܒ݁ܝܼܘ؛

ܡܫܝܼܚܵܐ ܕܝܼܠܝܼܕ݂ ܒܐܵܦܲܪܬ݂ܵܐ.܀

ܣ؛

ܣܘܼܒܵܪܵܐ ܕܡ̣ܢ ܓܲܒ݂ܪܝܼܹܠ؛

ܠܲܒ݂ܬ݂ܘܼܠܬܵܐ ܒܥܲܡܵܢܘܼܐܹܝܠ.

ܗ̇ܘ ܕܥܲܡܹܗ ܒܩܘܼܫܬܵܐ ܢܚܲܠܸܠ؛

ܬܹܐܠܕ݂ܝܢܵܝܗܝ ܒܲܒ݂ܬ݂ܘܼܠܘܼܬ݂ܵܐ.܀

ܥ؛

ܥ̣ܡܲܕ݂ ܗ݇ܘ̣ܵܐ ܒܝܵܘܪܕܢܵܢ ܡ̣ܢ ܥܲܒ݂ܕܹܗ؛

ܝܘܿܚܲܢܵܢ ܘܕ݂ܵܫ ܒܲܥܡܵܕܹܗ.

ܠܐܵܟܹܠ ܩܲܪܨܵܐ ܗ̇ܘ ܕܫܲܥܒ݁ܕܹܗ؛

ܠܐܵܕ݂ܵܡ ܒܪܸܓܲܬ݂ ܡܹܐܟ݂ܘܼܠܬܵܐ.܀

ܦ؛

ܦܪܲܫ ܬܲܠܡܝܼܕܹ̈ܐ ܠܒܹܝܬ݂ ܥܲܡܡܹ̈ܐ؛

ܕܲܢܥܲܩܪܘܼܢ ܦܬܲܟ݂ܪܹ̈ܐ ܘܨܲܠܡܹ̈ܐ.

ܘܲܢܣܲܒ݁ܪܘܼܢ ܬܠܵܬ݂ܵܐ ܩܢܘܿܡܹ̈ܐ.

ܚܲܕ݂ ܟܝܵܢܵܐ ܚܕ݂ܵܐ ܐܝܼܬ݂ܘܼܬ݂ܵܐ.܀

ܨ؛

ܨܸܒ݂ܝܵܢܹܗ ܡ̣ܛܵܐ ܒܫܘܼܠܵܡܵܐ؛

ܐܲܝܟ݂ ܕܲܢܒ݂ܝܼܵܐ ܒܦܸܬ݂ܓ݁ܵܡܵܐ.

ܘܐܸܬ݂ܢܲܒ݁ܝܼ ܒܩܵܠܵܐ ܪܵܡܵܐ؛

ܩܕ݂ܵܡ ܣܒܲܪܬܵܐ ܡܲܚܝܵܢܝܼܬ݂ܵܐ.܀

ܩ؛

ܩܵܡ̣ ܒܲܬܲܪ ܐܲܪܒ݁ܥܝܼܢ ܝܵܘܡ̈ܝܼܢ؛

ܘܲܣܠܸܩ ܥܲܡܗܘܿܢ ܠܛܘܼܪ ܙܲܝܬ̈ܝܼܢ.

ܘܒܲܪܸܟ݂ ܐܸܢܘܿܢ ܟܲܕ݂ ܚܵܝܪܝܼܢ؛

ܟܲܕ݂ ܣܠܸܩ ܘܦܵܫ̣ܘ ܠܗܘܿܢ ܒܥܸܠܝܼܬ݂ܵܐ.܀

ܪ؛

ܪܘܼܚܵܐ ܕܩܘܼܕ݂ܫܵܐ ܠܗܘܿܢ ܫܲܕܲܪ؛

ܒܵܬܲܪ ܝܵܘܡܵܬ̣̈ܵܐ ܚܕܲܥܣܲܪ.

ܘܐܸܬ݂ܢܲܒ݁ܝܼܘ ܐܲܝܟ݂ ܡܵܐ ܕܐܸܡܲܪ؛

ܒܝܲܕ݂ ܣܲܟ݁ܪܵܐ ܚܲܝܠܬ݂ܵܢܝܼܬ݂ܵܐ.܀

ܫ؛

ܫܵܛ̣ܘ ܠܲܓ݁ܙܵܡܹ̈ܐ ܕܫܲܠܝܼܛܹ̈ܐ؛

ܬܪܸܥܣܲܪ ܗܸܕ݂ܝܘܿܛܹ̈ܐ ܦܫܝܼܛܹ̈ܐ.

ܘܥܲܠ ܟܠ ܐܸܡ̈ܘܵܢ ܗܘ̤ܵܘ ܡܫܲܠܛܹ̈ܐ؛

ܘܫܲܬ݂ܐܸܣܘ ܘܩܲܝܸܡܘ ܥܹܕܵܬ̣̈ܵܐ.܀

ܬ؛

ܬܵܘܕܝܼܬ݂ܵܐ ܠܐܲܒ݂ܵܐ ܕܫܲܠܚܹܗ؛

ܣܓ݁ܝܼܕ݂ ܪܘܼܡܪܵܡܹܗ ܥܲܡ ܕܸܢܚܹܗ.

ܫܒ݂ܝܼܚ ܚܲܫܹܗ ܘܡܵܘܬܹܗ ܘܦܸܨܚܹܗ؛

ܒܪܝܼܟ݂ ܕܩܵܡ̣ ܘܲܣ̣ܠܸܩ ܒܚܲܕ݂ܘܼܬ݂ܵܐ.܀