O Lakh Athra|ܐܘܿ ܠܵܟ݂ ܐܬ݂ܪܵܐ|ܐܘ ܠܟ ܐܬܪܐ

ܐܘܿܠܝܼܬ݂ܵܐ ܕܐܲܒ݂ܘܼܢ ܐܵܕ݂ܵܡ (ܒܬܸܢܚܵܬ̣̈ܵܐ ܡܲܪܝܼܪ̈ܵܬ݂ܵܐ).

ܘܡܸܬ݂ܐܲܡܪܵܐ ܒܨܵܘܡܵܐ ܒܩܵܠ ܫܪܵܪܵܐ ܓܲܠܝܵܐ.܀

ܒܬܸܢܚܵܬ̣̈ܵܐ ܡܲܪܝܼܪ̈ܵܬ݂ܵܐ؛ ܢܦܲܩ ܗ݇ܘ̣ܵܐ ܐܲܒ݂ܘܼܢ ܐܵܕ݂ܵܡ ܡ̣ܢ ܦܲܪܕܲܝܣܵܐ؛ ܟܲܕ݂ ܒܵܥܹܐ ܗ݇ܘ̣ܵܐ ܡܲܪܝܼܪܵܐܝܼܬ݂؛ ܘܡܲܪܕܸܐ ܕܸܡܥܹ̈ܐ ܘܐܵܡܲܪ ܗ݇ܘ̣ܵܐ.܀

ܐ؛ ܐܘܿ ܠܵܟ݂ ܐܲܬ݂ܪܵܐ ܟܡܵܐ ܗܲܢܝܼ ܐܲܢ݇ܬ݁؛ ܐܘܿ ܒܹܝܬ݂ ܡܲܥܡܪܵܐ ܟܡܵܐ ܒܲܣܝܼܡ ܐܲܢ݇ܬ݁. ܘܵܝܠܹܗ ܠܐܲܝܢܵܐ ܕܢܵܦܹܩ ܡ̣ܢܵܟ݂؛ ܠܸܒܹܗ ܠܥܵܠܲܡ ܠܵܐ ܚܵܕܹܐ.܀

ܒ؛ ܒܨܲܦܪܵܐ ܥܸܠܹܬ݂ ܒܲܕ݂ܡܘܼܬ݂ ܡܲܠܟܵܐ؛ ܒܛܲܗܪܵܐ ܩܸܛܦܹܬ݂ ܦܹܐܪܵܐ ܘܐܸܟ݂ܠܹܬ݂. ܒܪܲܡܫܵܐ ܗܘܹܝܬ݂ ܠܝܼ ܢܘܼܟ݂ܪܵܝܵܐ.܀

ܓ؛ ܓܲܢܵܢܵܐ ܗܘܹܝܬ݂ ܒܥܸܕܵܢ ܨܲܦܪܵܐ؛ ܓܲܢܵܒ݂ܵܐ ܗܘܹܝܬ݂ ܒܥܸܕܵܢ ܛܲܗܪܵܐ. ܘܲܛܪܝܼܕ݂ܵܐ ܡ̣ܢܹܗ ܒܥܸܕܵܢ ܪܲܡܫܵܐ.܀

ܕ؛ ܕܸܡܥܹ̈ܐ ܒܥܲܝܢܲܝ̈ ܘܲܡܪܵܪܹ̈ܐ ܒܦܘܼܡܝ؛ ܦܹܐܪܵܐ ܕܣܸܒ݂ܪܹܬ݂ ܕܗܘ̤ ܡܣܲܒܲܥ ܠܝܼ. ܟܲܦܢܵܐ ܠܥܵܠܲܡ ܥܒ݂ܝܼܕ݂ ܐ݇ܢܵܐ ܠܝܼ.܀

ܗ؛ ܗ̇ܝ ܕܐܸܬ݂ܩܲܪܝܲܬ̤ ܡܥܲܕܪܵܢܝܼܬ݂ܵܐ؛ ܗܸܦܟܲܬ̤ ܘܲܗ̤ܘܵܬ݂ ܡܣܲܚܦܵܢܝܼܬ݂ܵܐ. ܠܵܗ̇ ܐܵܦ ܠܝܼ ܘܲܠܟ݂ܠܗܘܿܢ ܝܲܠܕܲܝ̈.܀

ܘ؛ ܘܵܝܠܝܼ ܘܵܝܠܝܼ ܡܵܢܵܐ ܓܲܕ݂ܫܲܢܝ؛ ܘܵܝ ܠܝܼ ܘܵܝ ܠܝܼ ܡܵܢܵܐ ܦܓܲܥ ܒܝܼ. ܒܹܝܬ݂ ܐܝܼܠܵܢܹ̈ܐ ܕܦܲܪܕܲܝܣܵܐ.܀

ܙ؛ ܙܡܵܪܵܐ ܚܲܠܝܵܐ ܕܪ̈ܘܼܚܵܢܵܝܹܐ؛ ܩܵܠ ܩܘܼܕܵܫܵܐ ܕܢܘܼܗܪ̈ܵܢܵܝܹܐ. ܢܸܥܡܵܬ̣̈ܗܘܿܢ ܒܲܣ̈ܝܼܡܵܢ ܗ̣ܘܲܝ̈.܀

ܚ؛ ܚܵܝܪ̈ܵܢ ܥܲܝܢܲܝ̈ ܒܹܗ ܡ̣ܢ ܪܘܼܚܩܵܐ؛ ܘܫܵܡ̈ܥܵܢ ܐܸܕ݂ܢܲܝ̈ ܩܵܠܵܐ ܕܫܹܐܕܹ̈ܐ. ܕܢܵܩܫܝܼܢ ܟܲܦܵܐ ܘܩܵܥܹܝܢ ܘܐܵܡ̇ܪܝܼܢ؛ ܐܹܗܹܐ ܐܹܗܹܐ ܚܙܵܬ̤ ܒܹܗ ܥܲܝܢܲܢ.܀

ܛ؛ ܛܲܪ̈ܦܹܐ ܕܬܹܐܢܹ̈ܐ ܗܘ̤ܵܘ ܠܝܼ ܠܒ݂ܘܼܫܵܐ؛ ܚܠܵܦ ܗ̇ܘ ܠܒ݂ܘܼܫܵܐ ܕܢܲܚܬܹ̈ܐ ܕܢܘܼܗܪܵܐ. ܘܝܼܒܸܫܘ ܛܲܪ̈ܦܹܐ ܘܲܢܦܲܠ ܠܒ݂ܘܼܫܵܐ؛ ܘܲܗܘܹܝܬ݂ ܥܲܪܛܸܠ ܒܐܲܪܥܵܐ ܕܡܲܠܝܵܐ ܠܵܘܛܵܬ̣̈ܵܐ.܀

ܝ؛ ܝܼܚܝܼܕ݂ܵܝܵܐ ܡܲܠܸܠ ܥܲܡܹܗ؛ ܐܲܝܟ݂ ܒܲܪܢܵܫܵܐ ܘܲܡ̣ܠܵܐ ܒܠܸܒܹܗ. ܕܠܵܐ ܬܸܦܣܘܿܩ ܣܲܒ݂ܪܵܟ݂ܸ ܐܵܕ݂ܵܡ.܀

ܟ؛ ܟܠܝܼܠܵܐ ܕܟ݂ܘܼܒܹ̈ܐ ܕܒܲܓ݁ܙܵܪ ܕܝܼܢܵܐ؛ ܕܐܲܠܒ݁ܫܵܟ݂ ܡܵܪܵܟ݂ ܡܸܛܠ ܕܲܚܛܲܝܬ݁. ܡܲܫܠܲܚ ܐ݇ܢܵܐ ܠܵܟ݂ ܒܫܘܼܠܵܡ ܙܲܒ݂ܢܹ̈ܐ.܀

ܠ؛ ܠܐܲܪܥܵܐ ܐܸܚܘܿܬ݂ ܡܸܛܠܵܬ݂ܵܟ݂؛ ܘܐ݇ܢܵܫܵܐ ܐܸܗܘܸܐ ܡܸܛܠܵܬ݂ܵܟ݂. ܘܡܲܦܢܸܐ ܐ݇ܢܵܐ ܠܵܟ݂ ܠܓ݁ܵܘ ܐܲܬ݂ܪܵܟ݂.܀

ܡ؛ ܡܸܛܠܵܬ݂ܵܟ݂ ܡܩܲܒܸ݁ܠ ܐ݇ܢܵܐ ܠܹܗ؛ ܠܲܟ݂ܠܝܼܠ ܟܘܼܒܹ̈ܐ ܗ̇ܘ ܕܝܸܗ̇ܒܹܬ݂ ܠܵܟ݂. ܘܐܹܣܝܼܡ ܠܵܟ݂ ܢܘܼܗܪܵܐ ܚܠܵܦܵܘܗܝ.܀

ܢܢ؛ ܢܘܼܗܪܵܐ ܕܐܝܼܬ݂ܘܼܬ݂ܝ ܡܟܲܣܸܐ ܐ݇ܢܵܐ ܠܹܗ؛ ܒܨܲܠܡܵܐ ܕܡ̣ܢܵܟ݂ ܒܫܘܼܠܵܡ ܙܲܒ݂ܢܹ̈ܐ. ܘܦܵܪܲܥ ܐ݇ܢܵܐ ܠܵܗ̇ ܠܚܵܘܒ݁ܬ݂ܵܟ݂.܀

ܣ؛ ܣܵܒܹܠ ܚܲܫܹ̈ܐ ܡܣܲܝܒܲܪ ܨܠܝܼܒ݂ܵܐ؛ ܘܛܵܥܹܡ ܡܵܘܬܵܐ ܘܢܵܚܹܬ݂ ܠܩܲܒ݂ܪܵܐ. ܡܸܛܠܵܬ݂ܵܟ݂ ܘܡܸܛܠ ܝܲܠܕܲܝ̈ܟ.܀

ܥ؛ ܥܠܲܝ ܡܩܲܒܸ݁ܠ ܐ݇ܢܵܐ ܚܛܵܗܲܝ̈ܟ ܟܠܗܘܿܢ؛ ܘܐܲܫܝܼܓ݁ ܐܸܢܘܿܢ ܒܲܕ݂ܡܵܐ ܕܲܩܢܘܿܡܝ. ܘܐܹܡܘܼܬ݂ ܥܲܡܵܟ݂ ܕܬܸܚܸܐ ܥܲܡܝ؛ ܒܚܲܝܹ̈ܐ ܕܡܵܘܬܵܐ ܠܵܐ ܩܵܪܹܒ݂ ܠܗܘܿܢ.܀

ܦ؛ ܦܛܲܪ ܠܹܗ ܐܵܕ̣ܵܡ ܘܲܗܘ̤ܵܐ ܥܲܦܪܵܐ؛ ܘܟ݂ܠܗܘܿܢ ܝܲܠܕܵܘ̈ܗܝ ܦܲܣܩܘܼܗܝ ܠܣܲܒ݂ܪܵܐ. ܥܕܲܡܵܐ ܕܡܸܠܬ݂ܵܐ ܠܒܸܫ ܦܲܓ݁ܪܵܐ.܀

ܨ؛ ܨܠܝܼܒ݂ܵܐ ܣܲܝܒܲܪ ܚܠܵܦܵܘܗܝ ܒܲܒ݂ܣܲܪ؛ ܘܲܒ݂ܝܲܕ݂ ܡܵܘܬܹܗ ܩܲܛܠܹܗ ܠܡܵܘܬܵܐ. ܘܐܲܚܝܼ ܠܐܵܕ݂ܵܡ ܘܲܠܝܲܠܕܵܘ̈ܗܝ.܀

ܩ؛ ܩ̣ܥܵܐ ܒܲܙܩܝܼܦܵܐ ܐܲܝܟ݂ ܒܲܪܢܵܫܵܐ؛ ܘܐܲܙܝܼܥ ܠܐܲܪܥܵܐ ܐܲܝܟ݂ ܐܲܠܵܗܵܐ. ܘܲܫܡܲܥ̣ ܐܵܕ݂ܵܡ ܩܵܠܹܗ ܘܐܸܬ݁ܬ݁ܥܝܼܪ؛ ܘܲܥ̣ܢܵܐ ܘܐܸܡܲܪ ܗܵܟܲܢܵܐ.܀

ܪ؛ ܪܹܝܚܵܟ݂ ܣܵܩܹܬ݂ ܚܲܝܹ̈ܐ ܢܦܲܠܘ ܒܝܼ؛ ܩܵܠܵܟ݂ ܫܸܡܥܹܬ݂ ܩܵܡܹܬ݂ ܘܢܸܦܩܹܬ݂. ܠܵܘ ܐܸܢܵܐ ܒܲܠܚܘܿܕ݂؛ ܐܸܠܵܐ ܐܵܦ ܣܲܓ݁ܝܼ̈ܐܸܐ.܀

ܫ؛ ܫܘܼܒ݂ܚܵܐ ܠܲܫܡܵܟ݂ ܡܸܠܬ݂ܵܐ ܝܼܚܝܼܕ݂ܵܐ؛ ܕܲܠܒܸܫܬ݁ ܦܲܓ݁ܪܵܐ ܡ̣ܢ ܐ݇ܢܵܫܘܼܬܲܢ. ܡܸܛܠ ܐܵܕ݂ܵܡ ܒܝܲܕ݂ ܒܲܪ݇ܬ݂ ܐܵܕ݂ܵܡ ܟܲܕ݂ ܠܵܐ ܫܲܚܠܸܦܬ݁ ܠܲܟ݂ܝܵܢܵܟ݂.܀

ܬ؛ ܬܵܘܕܝܼܬ݂ܵܐ ܠܵܟ݂ ܡܵܪܵܐ ܕܥܵܠܡܹ̈ܐ؛ ܐܲܒ݂ܵܐ ܘܲܒ݂ܪܵܐ ܘܪܘܼܚܵܐ ܕܩܘܼܕ݂ܫܵܐ. ܒܟ݂ܠ ܥܸܕܵܢ̈ܝܼܢ ܘܡ̣ܢ ܟܠ ܦܘܼܡ̈ܝܼܢ؛ ܠܥܵܠܲܡ ܥܵܠܡܝܼܢ ܐܵܡܹܝܢ ܘܐܵܡܹܝܢ.܀