Qdam Sliwuthakh|ܩܕ݂ܵܡ ܨܠܝܼܒ݂ܘܼܬ݂ܵܟ݂|ܩܕܡ ܨܠܝܒܘܬܟ

ܕܒ݂ܵܣܵܠܝܼܩܹ̈ܐ. ܒܩܵܠܵܐ ܪܲܒܵܐ. ܐܹܪܲܡܪ̱ܡܵܟ݂ ܡܵܪܝ ܡܲܠܟܵܐ: ܕܲܒ݂ܚܸܫܘܿܟ݂ܵܐ ܡܗܲܠܟ݂ܝܼܢ ܗ݇ܘܵܘ. ܕܨܘܼܪܬܵܐ. ܙܲܒ݂ܢܵܐ ܓܹܝܪ ܕܛܵܥܝܘܼܬ݂ܵܐ ܐܲܥܒܲܪ ܐܲܠܵܗܵܐ. ܩܕ݂ܵܡ ܨܠܝܼܒ݂ܘܼܬ݂ܵܟ݂ ܦܵܪܘܿܩܲܢ. ܛܘܼܥܝܲܝ ܕܣܵܛܵܢܵܐ ܠܲܒ݂ܪܝܼܬ݂ܵܐ ܟܠܵܗ̇ ܫܵܓ݂ܫܵܐ ܗ݇ܘܵܬ݂. ܘܓܸܢܣܵܐ ܕܲܒ݂ܢܲܝ̈ܢܵܫܵܐ ܥܕܲܟܹܝܠ ܬܚܹܝܬ݂ ܢܝܼܪܹܗ ܕܡܵܘܬܵܐ ܩܵܛܘܿܠܹܗ ܕܓܸܢܣܲܢ ܡܫܲܥܒܲܕ݂ ܗ݇ܘܵܐ. ܘܩܲܝܣܵܐ ܕܲܨܠܝܼܒ݂ܵܐ ܩܲܛܠܹܗ ܠܡܵܘܬܵܐ ܘܲܫܪܵܗ̇ ܠܲܚܛܝܼܬ݂ܵܐ. ܘܢܲܚܡܹܗ ܠܲܟ݂ܝܵܢܲܢ ܡ̣ܢ ܒܹܝܬ݂ ܡܝܼܬܹ̈ܐ. ܘܲܬ݂ܗܲܪܘ ܥܸܠܵܝܹ̈ܐ ܒܓܸܢܣܲܢ ܕܐܸܬ݂ܪܲܡܪܲܡ. ܘܲܥܒܲܪ ܠܥܸܠ ܡ̣ܢ ܟܠܗܘܿܢ ܚܲܫܹ̈ܐ. ܘܥܲܠ ܗܵܕ݂ ܕܠܵܐ ܫܲܠܘܵܐ ܢܸܩܥܸܐ ܘܢܹܐܡܲܪ ܠܵܟ݂ ܬܸܫܒܘܿܚܬܵܐ ܕܪܲܡܪܸܡܬ ܠܲܟ݂ܝܵܢܲܢ: ܬܢܝܼ. ܫܲܒܲܚ. ܒܫܵܥܬ݂ܵܐ ܕܐܸܬ݂ܩܒܲܥ ܩܲܝܣܵܐ ܕܲܨܠܝܼܒ݂ܵܟ݂. ܫܲܬ݂ܐ̱ܣܵܘ̈ܗܝ ܕܡܵܘܬܵܐ ܐܲܙܝܼܥܬ ܐܸܢܹܝܢ ܡܵܪܝܵܐ. ܘܐܲܝܠܹܝܢ ܕܲܒ݂ܚܵܘܒܹ̈ܐ ܒܸܠܥܲܬ̤ ܐܸܢܘܿܢ ܫܝܘܿܠ. ܘܫܸܒ݂ܩܲܬ̤ ܐܸܢܘܿܢ ܒܪܸܥܠܵܐ. ܐܲܚܝܼ ܐܸܢܘܿܢ ܦܘܼܩܕܵܢܵܟ݂ ܡܵܪܝܵܐ. ܘܡܸܛܠ ܗܵܕܹܐ ܐܵܦ ܚܢܲܢ ܡܫܲܒܚܝܼܢܲܢ ܠܵܟ݂. ܡܲܠܟܵܐ ܡܫܝܼܚܵܐ ܪܲܚܸܡܥܠܲܝܢ. ܥܵܠܲܡ. ܒܚܲܝܠܹܗ ܪܲܒܵܐ ܕܲܨܠܝܼܒ݂ܵܐ: ܩܵܢܝܵܐ ܥܹܕܬܵܐ ܫܘܼܒ݂ܗܵܪܵܐ: ܥܲܠ ܡܵܘܬܵܐ ܘܥܲܠ ܣܵܛܵܢܵܐ: ܘܚܵܕ݂ܝܵܐ ܒܦܘܼܪܩܵܢܵܐ. ܘܲܡܙܲܝܚܵܐ ܠܹܗ ܒܬܸܫܒܘܿܚܬܵܐ: ܠܥܹܝܢ ܒܥܸܠܕܒ݂ܵܒ݂ܵܘ̈ܗܝ ܕܲܫܪܵܪܵܐ: ܕܪܲܡܪܸܡ ܫܲܦܠܘܼܬ݂ܵܗ̇ ܒܚܲܝܠܹ̈ܐ ܕܲܣܥܲܪ ܒܵܗ̇. ܘܲܒ݂ܝܘܿܡ ܫܟ݂ܵܚܬܹܗ ܗܵܐ ܡܝܲܒܒ݂ܝܼܢ ܝܲܠܕܹܝ̈ܗ̇ ܒܩܵܠܹ̈ܐ ܕܬܸܫܒܚܵܬ݂ܵܐ. ܪܲܒ ܚܲܝܠܵܐ ܕܲܗܘ̤ܵܐ ܡܢܲܨܚܵܢܵܐ ܕܬܲܟ݂ܬܘܼܫܹܝ̈ܗ̇: ܛܲܪ ܠܵܗ̇ ܫܘܼܘܕܵܝܵܟ݂ ܫܘܼܒ݂ܗܵܪܵܐ ܠܝܲܠܕܹܝ̈ܗ̇ ܫܘܼܒ݂ܚܹܗ ܕܓܸܠܝܵܢܵܟ݂. ܢܹܐܡܲܪ. ܡܲܪܝܲܡ ܒܬ݂ܘܼܠܬܵܐ ܩܲܕܝܼܫܬܵܐ: ܐܸܡܹܗ ܕܝܼܫܘܿܥ ܦܵܪܘܿܩܲܢ. ܐܸܬ݂ܟܲܫܲܦܝ ܘܲܒ݂ܥܵܝ ܪ̈ܲܚܡܹܐ: ܠܝܲܠܕܵܐ ܕܲܕ݂ܢܲܚ ܡ̣ܢ ܥܘܼܒܹܟ݂ܝ. ܕܢܲܥܒܲܪ ܡ̣ܢܲܢ ܒܛܲܝܒܘܼܬܹܗ: ܙܲܒ݂ܢܹ̈ܐ ܕܲܡܠܹܝܢ ܥܵܩ̈ܵܬ݂ܵܐ. ܘܲܢܨܲܝܸܒ݂ ܠܲܢ ܫܲܝܢܵܐ ܘܲܫܠܵܡܵܐ: ܘܲܒ݂ܝܲܕ݂ ܨ̈ܠܵܘܵܬܹܟ݂ܝ ܬܸܬ݂ܢ̱ܛܲܪ ܥܹܕܬܵܐ ܘܝܲܠܕܹܝ̈ܗ̇ ܡ̣ܢ ܒܝܼܫܵܐ. ܘܲܒ݂ܝܵܘܡܵܐ ܫܒ݂ܝܼܚܵܐ ܕܡܸܬ݂ܓܲܠܝܵܐ ܪܲܒܘܼܬܹܗ: ܢܸܫܬܘܸܐ ܕܥܲܡܹܟ݂ܝ ܢܸܬ݂ܒܲܣܲܡ ܒܲܓ݂ܢܘܿܢ ܢܘܼܗܪܵܐ.