Re'yan Shaqlan|ܪܸܥܝܵܢܝ ܫܲܩܠܲܢ|ܪܥܝܢܝ ܫܩܠܢ

ܥܹܐܕܵܐ ܕܕܸܢܚܹܗ ܕܡܵܪܲܢ¹
ܣܘܿܓ݂ܝܼܬܼܵܐ: ܕܥܲܠ ܡܵܪܲܢ ܘܝܘܿܚܲܢܲܢ
ܪܸܥܝܵܢܝ ܫܲܩܠܲܢܝ ܨܹܝܕ݂ ܝܘܿܪܕܢܵܢ
ܒܩܵܠ : ܐܸܝ݂ܬ݂ܠܲܢ ܣܲܒ݂ܪܵܐ
1
ܪܸܥܝܵܢܝ ܫܲܩܠܲܢܝ ܨܹܝܕ݂ ܝܘܿܪܕܢܵܢ: ܘܲܚܙܹܝܬ݂ ܬܲܗܪܵܐ ܟܲܕ݂ ܐܸܬ݂ܓܠܝ݂. ܚܲܬ݂ܢܵܐ ܫܒ݂ܝ݂ܚܵܐ ܕܲܠܟܲܠܬ݂ܵܐ: ܚܠܘ݂ܠܵܐ ܢܸܥܒܸܕ݂ ܘܲܢܩܲܕܫܝ݂ܗ̇܀
2
ܚܙܹܝܬ݂ ܝܘܿܚܲܢܵܢ ܕܬܲܗܪܵܐ ܡܠܸܐ: ܘܟܸܢܫܹ̈ܐ ܚܕ݂ܵܖ̈ܵܘܗܝ ܟܲܕ݂ ܩܵܝܡܝ݂ܢ. ܘܚܲܬ݂ܢܵܐ ܫܒ݂ܝ݂ܚܵܐ ܟܲܕ݂ ܡܸܬ݂ܪܟܸܢ: ܨܹܝܕ݂ ܒܲܪ ܥܲܩܖܹ̈ܐ ܕܗ̤ܘ ܢܲܥܡܕ݂ܝ݂ܘܗܝ܀
3
ܒܡܸܠܬ݂ܵܐ ܘܩܵܠܵܐ ܪܸܥܝܵܢܝ ܬܗܲܪ: ܒܬܲܗܪܵܐ ܕܲܗ̤ܘܵܐ ܥܲܠ ܝܘܿܪܕܢܵܢ. ܘܡܵܪܲܢ ܕܲܕܢܲܚ ܐܲܝܟ݂ ܡܸܠܬܹܗ: ܕܢܹܐܬܸܐ ܠܓܸܠܝܵܐ ܕܓ݁ܢܝ݂ܙ ܗ̣݇ܘܵܐ܀
4
ܟܲܠܬ݂ܵܐ ܡܟ݂ܝ݂ܪܵܐ ܘܠܵܐ ܝܵܕ݂ܥܵܐ: ܕܡܲܢܘ݂ ܚܲܬ݂ܢܵܐ ܕܠܸܗ ܚܵܝܪܵܐ: ܚܕ݂ܘܿܓܹ̈ܐ ܟܢܝ݂ܫܝ݂ܢ ܡܠܹܐ ܡܲܕ݂ܒܪܵܐ: ܘܲܟ݂ܣܹܐ ܡܵܪܲܢ ܒܲܝܢܵܬ݂ܗܘܿܢ܀
5
ܗܵܝܕܹܝܢ ܚܲܬ݂ܢܵܐ ܢܲܦ̮ܫܹܗܓ݁ܠܵܐ: ܘܨܹܝܕ݂ ܝܘܿܚܲܢܵܢ ܠܢܲܗܪܵܐ ܩ̣ܪܸܒ݂. ܘܙܵܥ ܟܵܪܘܿܙܵܐ ܘܐܸܡܲܪ ܥܠܵܘܗܝ: ܕܗܵܢܵܘ ܓܲܒ݂ܪܵܐ ܕܠܹܗ ܐܲܟ݂ܪܙܹܬ݂܀
6
ܩܪܸܒ݂ ܠܲܥܡܵܕ݂ܵܐ ܡܩܲܕܸܫ ܟܠ: ܘܚܵܘܝ݂ ܢܲܦ̮ܫܹܗ ܥܲܠ ܝܘܿܪܕܢܵܢ. ܚ̣ܙܵܐ ܝܘܿܚܲܢܵܢ ܘܐܝ݂ܕܹܗ ܩ̣ܦܲܣ: ܘܫܲܪܝ݂ ܡܦܝ݂ܣ ܠܹܗ ܕܗܸܘ ܢܲܥܡܕܹܗ܀ܵ
7 ܝܘܿܚܲܢܵܢ
ܐ: ܐܲܝܟܲܢ ܡܵܪܝ ܡܹܢܝ ܥܵܡܹܕ݂ ܐܲܢ݇ܬ݁: ܕܐܲܢ݇ܬ݁ ܒܲܥܡܵܕ݂ܵܟ݂ ܡܚܲܣܹܝܬ݁ ܠܟ݂ܠ. ܡܲܥܡܘܿܕܝ݂ܬܵܐ ܠܵܟ݂ ܚܵܝܪܵܐ: ܪܘܿܣ ܒܵܗ̇ ܩܘ݂ܕܫܵܟ݂ ܘܡܸܫܬܲܡܠܝܵܐ܀
8 ܡܵܪܲܢ
ܐ: ܐܵܡܲܪ ܡܵܪܲܢ ܐܸܢܵܐ ܒܥܹ̇ܝܬ݂: ܩܪܘܿܒ݂ ܐܲܥܡܸܕܸ̇ܝܢܝ ܘܠܵܐ ܬܸܬ݂ܚܪܸܐ. ܕܬܸܥܨܸܐ ܠܨܸܒ݂ܝܵܢܝ ܠܵܐ ܡܸܫܟ݁ܚܲܬ݁: ܐܸܥܡܲܕ݂ ܡ̣ܢܵܟ݂ ܕܗܵܟܲܢ ܨܒܹܝܬ݂܀
9 ܝܘܿܚܲܢܵܢ
ܒ: ܒܵܥܹܢܵܐ ܡ̣ܵܪܝ ܠܵܐ ܬܸܥܨܹܝܢܝ: ܕܥܲܣܩܵܐ ܗ݇ܝ݂ ܗܵܕܹܐ ܕܠܝ݂ ܐܵܡ̇ܪܲܬ݁. ܐܸܢܵܐ ܣܢܝ݂ܩ ܐ݇ܢܵܐ ܕܐܲܢ݇ܬ݁ ܬܲܥܡܕܲܢܝ: ܕܐܲܢ݇ܬ݁ܘܼ ܒܙܘܿܦܵܟ݂ ܡܚܵܘܪܲܬ݁ ܠܟ݂ܠ܀
10 ܡܵܪܲܢ
ܒ: ܒܥܹ̇ܝܬ݂ ܘܲܫ̣ܦܲܪ ܠܝ݂ ܕܐܲܢ݇ܬ݁ ܬܲܥܡܕܲܢܝ: ܘܐܲܢ݇ܬ݁ ܝܘܿܚܲܢܵܢ ܠܡܵܢ ܡܸܬ݂ܚܪܹܝܬ݁. ܫܒ݂ܘܿܩ ܟܹܐܢܘ݂ܬ݂ܵܐ ܡܸܫܬܲܡܠܝܵܐ: ܬܵܐ ܐܲܥܡܸܕܲܝܢܝ ܠܡܵܢ ܕܵܪܫܲܬ݁܀
11 ܝܘܿܚܲܢܵܢ
ܓ: ܓܸܠܵܐ ܠܢܘ݂ܪܵܐ ܐܲܝܟܲܢ ܡܨܸܐ: ܕܢܸܠܒ݁ܘܿܟ ܒܐܝ݂ܕ̈ܗ ܟܲܕ݂ ܚܲܒ݁ܬܐ ܗ݇ܘ݂. ܐܘܿ ܢܘ݂ܪܵܢܵܐ ܪܲܚܹܡ ܥܠܲܝ: ܘܠܵܐ ܐܸܩܪܘܿܒ݂ ܠܵܟ݂ ܕܥܲܣܩܵܐ ܗ݇ܝ݂ ܠܝ݂܀
12 ܡܵܪܲܢ
ܓ: ܓܠܹܝܬ݂ ܠܵܟ݂ ܨܸܒ݂ܝܵܢܝ ܠܡܵܢ ܕܵܪܫܲܬ݁: ܩܪܘܿܒ݂ ܐܲܥܡܸܕܲܝܢܝ ܘܠܵܐ ܝܵܩ̇ܕܲܬ݁. ܓܢܘܿܢܵܐ ܡܛܲܝܲܒ݂ ܠܵܐ ܬܲܗܦܟܲܢܝ: ܡܢ ܡܸܫܬ݁ܘ݂ܬ݂ܵܐ ܕܠܝܼ ܚܵܝ̇ܪܵܐ܀
13 ܝܘܿܚܲܢܵܢ
ܕ: ܕܵܚ̇ܠܝ݂ܢ ܥܝ݂ܖܹ̈ܐ ܘܠܵܐ ܡܲܡܪܚܝ݂ܢ: ܘܕܲܢܚܘ݂ܪܘ݂ܢ ܒܵܟ݂ ܡܸܬ݂ܟܲܚܕܝ݂ܢ. ܘܐܸܢܵܐ ܡܵܪܝ ܐܲܝܟܲܢ ܐܲܥܡܕ݂ܵܟ: ܡܚܝ݂ܠܢܵܐ ܕܐܸܩܪܘܿܒ݂ ܠܵܐ ܬܸܥܨܹܝܢܝ܀
14 ܡܵܪܲܢ
ܕ: ܕܵܚܠܲܬ݁ ܡ̇ܕܹܝܢ ܠܵܐ ܬܸܬ݂݂ܚܪܸܐ: ܠܘ݂ܩܒܲܠ ܨܸܒ݂ܝܵܢܝ ܕܐܸܥܡܲܕ݂ ܒܥܹܝܬ݂. ܡܲܥܡܘܿܕ݂ܝܼܬ݂ܵܐ ܠܝܼ ܚܵܝܪܵܐ: ܫܲܠܸܡ ܥ̇ܒ݂ܵܕ݂ܵܐ ܕܠܹܗ ܐܸܬ݂ܩܪܝ݂ܬ݁܀
15 ܝܘܿܚܲܢܵܢ
ܗ: ܗܵܐ ܐܲܟ݂ܪܸܙܬܵܟ݂ ܥܲܠ ܝܘܿܪܕܢܵܢ: ܒܐܸܕ̣ܢܲܝ̈ ܥܲܡܵܐ ܕܠܵܐ ܡܸܬ݁ܛܦܝ݂ܣ. ܘܐܸܢ ܚܵܙܹ̇ܐ ܠܵܟ݂ ܕܡܹܢܝ ܥܵܡ̇ܕܲܬ݁: ܡܸܬ݂ܦܲܠܓ݁ܝܼܢ ܠܗܘܿܢ ܕܠܵܘ ܡ̇ܪܹܝܵܐ ܐܲܢ݇ܬ݁܀
16 ܡܵܪܲܢ
ܗ: ܗܵܐ ܥܵܡܹܕ݂ ܐ݇ܢܵܐ ܟܲܕ݂ ܣܵܗ̇ܕܝ݂ܢ: ܘܐܲܒ݂ܵܐ ܕܫܲܠܚܲܢܝ ܣܵܗܹ̇ܕ݂ ܥܠܲܝ. ܕܲܒ݂ܪܹܗ ܐܝ݂ܬܲܝ ܘܒ݂ܝܼ ܐܸܨܛܒ݂ܝ݂: ܕܲܢܪܲܥܸܐ ܠܐܵܕ݂ܵܡ ܕܪܲܓܝ݂ܙ ܗ݇ܘܼܵܐ܀
17 ܝܘܿܚܲܢܵܢ
ܘ: ܘܵܠܹܐ ܠܝ݂ ܡܵܪܝ ܕܐܸܕܲܥ ܟܝܵܢܝ: ܕܥܲܦܪܵܐ ܐܝ݂ܬܲܝ ܡܢ ܐܲܕ݂ܡܬ݂ܵܐ. ܘܐܲܢ݇ܬ݁ ܓܵܒ݂ܘܼܠܵܐ ܡܲܬ݂ܩܸܢ ܠܟ݂ܠ: ܘܐܸܢܵܐ ܒܡܲܝ̈ܵܐ ܠܡܵܢ ܐܲܥܡܕ݂ܵܟ݂܀
18 ܡܵܪܲܢ
ܘ: ܘܵܠܹܐ ܕܬܸܕܲܥ ܕܲܠܡܵܢ ܐ݇ܬܹܝܬ݂: ܘܡܸܛܠ ܡܵܢܵܐ ܒܥܹܝܬ݂ ܕܬܲܥܡܕܲܢܝ. ܡܸܨܥܵܝܘ݂ܬ݂ܵܐ ܕܐܸܬܹ̇ܝܬ݂ ܒܵܗ: ܡܲܥܡܘܿܕ݂ܝܼܬ݂ܵܐ ܠܵܐ ܬܸܛܠܘܿܡ܀
19 ܝܘܿܚܲܢܵܢ
ܙ: ܙܥܘܿܪܘ݂ ܢܲܗܪܵܐ ܕܐܸܬܲܝܬ ܠܹܗ: ܘܬܸܫܪܸܐ ܒܓ݁ܵܘܹܗ ܘܲܢܣܲܝܟ݂ܵܟ. ܫܡܲܝܵܐ ܠܙܝ݂ܘܵܟ ܠܵܐ ܣܵܦܩܝ݂ܢ: ܡܲܥܡܘܿܕ݂ܝܼܬ݂ܵܐ ܠܡܵܢ ܬܵܘܬ݁ܪܵܟ݂܀
20 ܡܵܪܲܢ
ܙ: ܙܥܘܿܪܵܐ ܟܲܪܣܵܐ ܡܢ ܝܘܿܪܕܢܵܢ: ܘܲܨܒܹ̇ܝܬ݂ ܘܲܫܪܹܝܬ݂ ܒܲܒ݂ܬ݂ܘ݂ܠܬܵܐ. ܘܐܲܝܟ݂ ܕܐܸܬ݂ܝܲܠܕܲܬ݂ ܡܢ ܡܲܪܒ݁ܥܵܐ: ܗܵܐ ܥܵܡܹܕ݂ ܐ݇ܢܵܐ ܒܓ݁ܵܘ ܝܘܿܪܕܢܵܢ܀
21 ܝܘܿܚܲܢܵܢ
ܚ: ܚܲܝ̈ܠܵܘܵܬ̣ܵܐ ܗܵܐ ܩܵܝܡܝܼܢ: ܘܣܸܕ̣ܖܹ̈ܐ ܕܥܝܼܖܹ̈ܐ ܗܵܐ ܣܵܓ݁ܕ̣ܝܼܢ. ܘܐܸܢ ܩܲܪܸܒ݂ ܐ݇ܢܵܐ ܡܵܪܝ ܕܐܲܥܡܸܕܵܟ݂: ܪܐܲܬ݁ ܐ݇ܢܵܐ ܠܝܼ ܡ̣ܢ ܙܵܘܥܬ̣ܵܐ܀
22 ܡܵܪܲܢ
ܚ: ܚܲܝܠܲܝ̈ ܪܵܘܡܵܐ ܠܵܟ݂ ܝܵܗ̇ܒ݁ܝܼܢ: ܛܘ݂ܒ݂ܵܐ ܟܠܗܘܿܢ ܕܠܝܼ ܡܲܥܡܕܲܬ݁ ܐܲܢ݇ܬ݁. ܠܗܵܕܸܐ ܩܪܹܝܬ݂ܵܟ݂ ܡ̣ܢ ܡܲܪܒ݁ܥܵܐ: ܫܲܡܠܵܐ ܥ̇ܒ̣ܵܕܼܵܐ ܕܠܹܗ ܐܸܬ݂ܩܪܝ݂ܬ݁܀
23 ܝܘܿܚܲܢܵܢ
ܛ: ܛܲܝܒܹ̇ܬ݂ ܐܘ݂ܪܚܵܐ ܕܐܸܫܬܲܕ̣ܪܹܬ݂: ܡܸܟܲܪܹܬ݂ ܟܲܠܬ̣ܵܐ ܕܐܸܬ݂ܦܲܩܕܹܬ݂. ܢܹܐܪܲܒ݂ ܕܸܢܚܵܟ݂ ܥܲܠ ܥܵܠܡܹ̈ܐ: ܗܵܫܵܐ ܕܐܸܬܲܝܬ݁ ܠܵܐ ܐܲܥܡܕܼܵܟ݂܀
24 ܡܵܪܲܢ
ܛ: ܛܘ݂ܝܵܒ݂ܝ ܗܵܢܵܘ̇ ܕܗܵܟܲܢ ܨܒܹ̇ܝܬ݂: ܕܐܸܚܘܿܬ݂ ܐܸܥܡܲܕ݂ ܒܓ̣ܵܘ ܝܘܿܪܕܢܵܢ. ܘܐܸܚܫܘܿܠ ܙܲܝܢܵܐ ܠܲܕ݂ܥܵܡܕܝ݂ܢ: ܕܟܲܕ݂ ܠܵܒ݂ܫܝ݂ܢ ܠܹܗ ܠܵܐ ܡܹܙܕ̇ܟܹܝܢ܀
25 ܝܘܿܚܲܢܵܢ
ܝ: ܝܲܠܕܹܗ ܕܐܲܒ̣ܵܐ ܠܡܵܢ ܐܲܥܡܕܼܵܟ݂: ܕܐܲܢ݇ܬ݁ ܩܲܕ݂ܝ݂ܫܲܬ݁ ܘܩܘ݂ܕܫܵܐ ܡܠܹܝܬ݁. ܒܵܟ݂ ܗ̣݇ܘ ܛܲܡ̈ܐܹܐ ܡܸܬ݂ܩܲܕ̇ܫܝ݂ܢ: ܘܲܠܡܵܢܵܐ ܒܝܘܿܪܕܢܵܢ ܥܵܡ̇ܕ݂ܬ݁܀
26 ܡܵܪܲܢ
ܝ: ܝܲܠܕ̣ܵܘ̈ܗܝ ܕܐܵܕ݂ܵܡ ܠܝܼ ܚܵܝܪܝܼܢ: ܕܝܲܠܕܵܐ ܚܲܕ݂ܬ݂ܵܐ ܐܸܥܡܲܕ݂ ܠܗܘܿܢ. ܘܐܘ݂ܪܚܵܐ ܒܡܲܝ̈ܵܐ ܐܸܕ݂ܪܘܿܫ ܠܗܘ݇ܢ: ܕܲܠܡܲܠܟ݁ܘ݂ܬ̣ܵܐ ܒܗܘܿܢ ܢܸܥܠܘܼܢ܀
27 ܝܘܿܚܲܢܵܢ
ܟ: ܟܘ݂ܡܖܹ̈ܐ ܡ̣ܢܵܟ݂ ܡܸܬ݂ܩܲܕܫܝ݂ܢ: ܟܵܗܢܹ̈ܐ ܒܙܘܿܦܵܟ݂ ܡܸܬ݂ܚܵܘܪܝ݂ܢ. ܢܒ݂ܝܹ̈ܐ ܘܡܲܠ̈ܟܹ̇ܐ ܐܲܢ݇ܬ݁ܘ݂ ܥܒܲܕܬ݁: ܘܡܲܥܡܘܿܕ݂ܝܼܬ݂ܵܐ ܡ̣ܢ ܬܵܘܬ݁ܪܵܟ܀
28 ܡܵܪܲܢ
ܟ: ܟܲܠܬ̣ܵܐ ܕܲܡ̣ܟܲܪܬ݁ ܠܝ݂ ܚܵܝܪܵܐ: ܕܐܸܚܘܿܬ݂ ܐܸܥܡܲܕ݂ ܘܐܹܩܲܕ݂ܫܝܼܗ̇. ܪܵܚ̇ܡܹܗ ܕܚܲܬ݂ܢܵܐ ܠܵܐ ܬܸܫܬ݁̇ܐܸܠ: ܡ̣ܢ ܡܲܣܚܘ݂ܬ̣ܵܐ ܕܲܡܛܲܝܒ݂ܵܐ܀
29 ܝܘܿܚܲܢܵܢ
ܠ: ܠܵܐ ܡܲܡܪܲܚ ܐ݇ܢܵܐ ܕܐܸܩܪܘܿܒ݂ ܠܵܟ݂: ܕܐܸܢܵܐ ܣܢܝ݂ܩ ܐ݇ܢܵܐ ܕܐܲܢ݇ܬ݁ ܬܲܥܡܕܲܢܝ. ܗܵܐ ܠܸܓ݁ܝܼܘ̇ܢܲܝ̈ܟ ܡܸܫܬܲܠܗܒ݂ܝ݂ܢ: ܠܚܲܕ݂ ܡ̣ܢ ܥܝ݂ܖܹ̈ܐ ܦܩܘܿܕ݂ ܢܲܥܡܕܼܵܟ݂܀
30 ܡܵܪܲܢ
ܠ: ܠܵܘ ܡ̣ܢ ܥܝ݂ܖܹ̈̈ܐ ܐܝܼܬ݂ܵܘܗܝ ܟܝܵܢܝ: ܕܐܸܦܩܘܿܕ݂ ܠܥܝ݂ܖܹ̈ܐ ܕܠܝ݂ ܢܲܥܡܕ݂ܘܼܢ. ܦܲܓ݁ܪܹܗ ܕܐܵܕܼܵܡ ܗܵܐ ܠܒ݂ܝ݂ܫ ܐ݇ܢܵܐ: ܘܐܲܢ݇ܬ݁ ܒܲܪ ܐܵܕ݂ܵܡ ܠܝ݂ ܡܲܥܡܕܲܬ݁܀
31 ܝܘܿܚܲܢܵܢ
ܡ: ܡܲܝ̈ܵܐ ܚ̣ܙܵܐܘܼܟ݂ ܘܐܲܣܓ݁ܝܼܘ ܕܚܸܠܘ: ܚ̣ܙܵܐܘܼܟ݂ ܡܲܝ̈ܵܐ ܘܗܵܐ ܕܵܚܠܝܼܢ. ܪܵܬ ܠܹܗ ܢܲܗܪܵܐ ܡ̣ܢ ܙܵܘܥܬ݂ܹܗ: ܘܐܸܢܵܐ ܡܚܝܼܠܵܐ ܠܡ̇ܢ ܐܵܥܡܵܕ̣ܵܟ݂܀
32 ܡܵܪܲܢ
ܡ: ܡܲܝ̈ܵܐ ܒܲܥܡܵܕ̣ܝ ܡܸܬ݂ܩܲܕ̇ܫܝ݂ܢ: ܘܢܘ݂ܪܵܐ ܘܪܘ݂ܚܵܐ ܡܹܢܝ ܢܵܣܒ݁ܝ݂ܢ. ܘܐܸܢ ܠܵܐ ܐܲܥܡܲܕ݂ ܠܵܐ ܡܲܦܪܹܝܢ: ܥܘܸܠܹ̈ܐ ܚܲܝܹ̈ܐ ܕܠܵܐ ܡܝܬ݁ܝ݂ܢ܀
33 ܝܘܿܚܲܢܵܢ
ܢ: ܢܘ݂ܪܵܐ ܠܢܘ݂ܪܵܐ ܐܸܢ ܩܵܪܒܵܐ: ܚܵܒܵܐ ܡ̣ܢܵܗ̇ ܐܲܝܟ݂ ܚܲܒ݁ܬ݂ܵܐ. ܐܘܿ ܢܘ݂ܪܵܢܵܐ ܪܲܚܸܡ ܥܠܲܝ: ܘܠܵܐ ܐܸܩܪܘܿܒ݂ ܠܵܟ݂ ܕܥܲܣܩܵܐ ܗ݇ܝ݂ ܠܝ݂܀
34 ܡܵܪܲܢ
ܢ: ܢܘ݂ܪܵܐ ܘܪܘ݂ܚܵܐ ܡܹܢܝ ܢܵܣ̇ܒ݁ܝ݂ܢ: ܟܝܵܢܹ̈ܐ ܕܡܲܝ̈ܵܐ ܘܡܸܬ݂ܩܲܕܫܝ݂ܢ. ܕܲܒ݂ܗܘܿܢ ܚܲܛܵܝܹ̈ܐ ܥܵܡ̇ܕܝ݂ܢ: ܘܲܒ݂ܗܘܿܢ ܡ̇ܪܩܝ݂ܢ ܚܵܘܒܲܬ݂ܗܘܿܢ܀
35 ܝܘܿܚܲܢܵܢ
ܣ: ܣܲܓ݁ܝ݂ ܦܲܐܝܵܐ ܕܐܲܢ݇ܬ݁ ܬܲܥܡܕܲܢܝ: ܕܐܲܢ݇ܬ݁ ܩܲܕܝ݂ܫܵܐ ܡܩܲܕܸ̇ܫ ܠܟ݂ܠ. ܒܵܟ݂ ܗ݇ܘܼ ܛܲܡ̈ܐܹܐ ܡܸܬ݂ܩܲܕ̇ܫܝ݂ܢ: ܘܐܲܢ݇ܬ݁ ܩܲܕܝ݂ܫܵܐ ܡܹܢܝ ܥܵܡ̇ܕܲܬ݁܀
36 ܡܵܪܲܢ
ܣ: ܣܲܓܝ ܦܲܐܝܵܐ ܕܠܵܐ ܬܸܬ݂ܚܪܸܐ: ܕܗܵܟܲܢ ܝܵܐܹ̇ܐ ܕܬܸܫܠܲܡ ܥܠܲܝ. ܐ݇ܢܵܐ ܐܲܥܡܸܕ̇ܬܵܟ݂ ܒܓ݁ܵܘ ܡܲܕ̣ܪܵܐ: ܐܲܥܡܸܕܝܢܝ ܐܲܢ݇ܬ݁ ܒܓ̣ܵܘ ܝܘܿܪܕܢܵܢ܀
37 ܝܘܿܚܲܢܵܢ
ܥ: ܥܲܒ݂ܕܵܐ ܐܝܼܬܲܝ ܘܲܡܚܝ݂ܠ ܐ݇ܢܵܐ: ܡܚܵܘܲܪ ܛܡ̈ܐܹܐ ܪܲܚܸܡ ܥܠܲܝ. ܥܲܖ̈ܩܲܝܟ ܕܐܸܫܪܸܐ ܩܲܢܝ݂ܛ ܐ݇ܢܵܐ: ܠܪܹܫܵܟ݂ ܪܵܡܵܐ ܡܲܢ ܐܲܫܘܝܲܢܝ܀
38 ܡܵܪܲܢ
ܥ: ܥܲܒ̣̈ܕܹܐ ܒܲܥܡܵܕ̣ܝ ܡܸܬ݂ܚܲܪܪܝ݂ܢ: ܫܛܵܖܹ̈ܐ ܒܲܣܚܵܬ݂ܝ ܡܸܬ݁ܬܲܠܚܝ݂ܢ. ܚܪܘ݂ܖܹ̈ܐ ܒܡܲܝ̈ܵܐ ܡܸܬ݂ܚܲܬ݁̇ܡܝ݂ܢ: ܘܐܸܢ ܠܵܐ ܐܸܥܡܲܕ݂ ܒܛܸܠ ܟܠܗܹܝܢ܀
39 ܝܘܿܚܲܢܵܢ
ܦ: ܦܘܩܕܵܢܵܟ݂ ܡܵܪܝ ܡܲܪܗܸܒ݂ ܠܝ݂: ܘܕܸܐܬ݂ܚܪܸܐ ܠܩܘ݂ܒ݂ܠܵܟ݂ ܕܵܚܹ̇ܠ ܐ݇ܢܵܐ. ܘܕܸܐܩܪܘܿܒ݂ ܐܲܥܡܕ݂ܵܟ ܩܲܢܝ݂ܛ ܐ݇ܢܵܐ: ܐܲܥܡܸܕ݂ ܐܲܢ݇ܬ݁ ܠܝ݂ ܘܫܲܡܠܵܐ ܠܟ݂ܠ܀
40 ܡܵܪܲܢ
ܦ: ܦܲܐܝܵܐ ܗܵܕܹܐ ܕܐܲܢ݇ܬ݁ ܬܲܥܡܕܲܢܝ: ܕܠܵܐ ܐ݇ܢܵܫ ܢܸܛܥܸܐ ܘܢܸܣܒܲܪ ܥܠܲܝ. ܕܐܸܢ ܠܵܐ ܢܘܼܟ݂ܪܵܝ ܡ̣ܢ ܐܲܒ݂ܘ݂ܗܝ: ܠܡܵܢ ܠܹܘܵܝܵܐ ܕܚܸܠ̣ ܕܢܲܥܡܕܹܗ܀
41 ܝܘܿܚܲܢܵܢ
ܨ: ܨܠܘܿܬ̣ܵܐ ܡܵܕܹܝܢ ܡܵܐ ܕܥܵܡ̇ܕܲܬ݁: ܡܵܢܵܐ ܐܸܚܬ݁ܘܿܡ ܥܲܠ ܝܘܿܪܕܢܵܢ. ܕܐܲܒ݂ܵܐ ܘܪܘ݂ܚܵܐ ܒܵܟ݂ ܡܸܬ݂ܚܙܹܝܢ: ܘܲܠܡܵܢ ܐܸܩܪܸܐ ܐܲܝܟ݂ ܟܵܗ̇ܢܵܐ܀
42 ܡܵܪܲܢ
ܨ: ܨܠܘܿܬ݂ܵܐ ܒܫܸܬ݂ܩܵܐ ܡܸܬ݂ܚܲܬ݁ܡܵܐ: ܐܝ݂ܕ݂ܵܟ݂ ܒܲܠܚܘܿܕ݂ ܬܵܐ ܣܝ݂ܡ ܥܠܲܝ. ܘܐܲܒ݂ܵܐ ܩܵܥܹ̇ܐ ܐܲܝܟ݂ ܟܵܗܢܵܐ: ܐܲܝܕܵܐ ܕܦܲܐܝܵܐ ܡܸܛܠ ܒܪܹܗ܀
43 ܝܘܿܚܲܢܵܢ
ܩ: ܩܕ݂ܵܡܲܝܟ ܐܲܒ݂ܵܐ ܣܵܗ̇ܕܝ݂ܢ ܠܝ݂: ܟܸܢܫܹ̈ܐ ܟܠܗܘܿܢ ܕܲܡܙܲܡܢܝ݂ܢ. ܕܟ݂ܠܝܘܿܡ ܐܸܡܪܹܬ݂ ܒܲܝܢܵܬ݂ܗܘܿܢ: ܕܲܫܠܝ݂ܚܵܐ ܐ݇ܢܵܐ ܘܠܵܘ ܡܵܪܝܵܐ܀
44 ܡܵܪܲܢ
ܩ: ܩܵܠܵܐ ܕܩܵܪܹܐ ܒܓ݁ܵܘ ܡܲܕ݂ܒ݁ܪܵܐ: ܫܲܡܠܵܐ ܥ̇ܒ݂ܵܕܼܵܐ ܕܐܸܬܲܝܬ݁ ܠܹܗ. ܘܢܸܪܥܲܡ ܚܘ݂ܪܒܵܐ ܕܲܢܦܩ̣ܬ݁ ܠܹܗ: ܒܫܲܝܢܵܐ ܪܲܒܵܐ ܕܠܹܗ ܐܲܦܢܹܝܟ݂܀
45 ܝܘܿܚܲܢܵܢ
ܪ: ܖܸ̈ܒ݁ܘܵܢ ܕܥܝ݂ܖܹ̈ܐ ܐܸܕ݂ܢܲܝ̈ ܫ̣ܡܲܥ: ܟܸܢܫܲܝ̈ ܪܵܘܡܵܐ ܕܲܡܩܲܕ̇ܫܝ݂ܢ. ܘܟ݂ܠܗܘܿܢ ܩܵܥܹ̇ܝܢ ܟܲܕ݂ ܐܵܡ̇ܪܝ݂ܢ: ܒܪܝ݂ܟ݂ܘ݂ ܕܸܢܚܵܟ݂ ܡܲܦܨܲܚ ܠܟ݂ܠ܀
46 ܡܵܪܲܢ
ܪ: ܪܗܝܼܒ݂ ܥܸܕܵܢܵܐ ܘܠܝ݂ ܚܵܝܪܝ݂̇ܢ: ܚܕ݂ܘܿܓܹ̈ܐ ܟܠܗܘܿܢ ܕܲܡܙܲܡܢܝ݂ܢ. ܩܪܘܿܒ݂ ܐܲܥܡܸܕܲܝܢܝ ܕܲܢܩܲܠܣܵܟ: ܩܵܠܹܗ ܕܐܲܒ݂ܵܐ ܡܵܐ ܕܡܸܫܬ݁ܡܲܥ܀
47 ܝܘܿܚܲܢܵܢ
ܫ: ܫܵܡܲܥ̇ ܐ݇ܢܵܐ ܡܵܪܝ ܐܲܝܟ݂ ܡܸܠܬ݂ܵܟ݂: ܬܵܐ ܠܲܥܡܵܕ݂ܵܐ ܕܚܘ݂ܒܵܟ݂ ܥ̣ܨܵܢܝ. ܣܓܸ݁ܕ݂ ܥܲܦܪܵܢܵܐ ܕܠܲܐܝܟܵܐ ܡܛܵܐ: ܕܥܲܠ ܒܲܪ ܡܵܪܹܗ ܐܝ݂ܕܹܗ ܢܣܝ݂ܡ܀
48
ܫ: ܫ̣ܡܲܥ ܝܘܿܚܲܢܵܢ ܐܲܝܟ ܕܐܸܬ݂ܦܩܸܕ݂: ܘܐܲܥܡܸܕ݂ ܡܵܪܹܗ ܘܠܵܐ ܐܸܬ݂ܥܨܝ. ܥܡܲܕ̣ ܩܲܕ̇ܝ݂ܫܵܐ ܘܡܸܚܕ݂ܵܐ ܣܠܸܩ: ܘܐܲܙܠܸܓ݁ ܢܘ݂ܗܪܹܗ ܥܲܠ ܡܲܕ݂ܢ̱ܚܵܐ܀
49
ܬ: ܬܲܖ̈ܥܲܝ ܪܵܘܡܵܐ ܡܸܬ݂ܦܲܬ݂ܚܝ݂ܢ: ܘܩܵܠܹܗ ܕܐܲܒ݂ܵܐ ܟܲܕ݂ ܡܸܫܬ݁ܡܲܥ. ܕܗܵܢܵܘ̇ ܚܲܒ݁ܝ݂ܒ݂ܝ ܕܒܹܗ ܐܸܨܛܒ݂ܝ݂ܬ݂: ܟܠܟ݂ܘܿܢ ܥܲܡܡܹ̈ܐ ܠܹܗ ܦܸܠܘ ܣܓ݁ܘܿܕ݂ܘ܀
50
ܬ: ܬܗܲܪܘ ܚܲܙܵܝܹ̈ܐ ܟܲܕ݂ ܩܵܝܡܝ݂ܢ: ܒܩܵܠܹܗ ܕܐܲܒ݂ܵܐ ܟܲܕ݂ ܡܸܫܬܲܡܲܥ. ܘܲܩ̣ܥܵܘ ܫܘ݂ܒ݂ܚܵܐ ܠܗܵܘ̇ ܕܐܸܬ݂ܓܠܝ݂: ܘܲܒ݂ܝܲܕ݂ ܕܸܢܚܹܗ ܢܗܲܪܘ ܥܵܠܡܹ̈ܐ܀

1. Text from Assyrian - Syriac chants from the liturgy of the Church of the East by Dr. Eve G. Sada, https://doi.org/10.13140/RG.2.2.26008.47360