Sawma D'kholyom|ܨܵܘܡܵܐ ܕܟ݂ܠܝܘܿܡ|ܨܘܡܐ ܕܟܠܝܘܡ

ܚܲܕܒܫܲܒܵܐ ܕܡܲܥܵܠܲܝ ܨܵܘܡܵܐ (ܨܵܘܡܵܐ ܕܟ݂ܠܝܘܿܡ)

ܣܘܿܓ݁ܝܼܬ݂ܵܐ ܒܩܵܠ ܐܲܒ݂ܵܐ ܕܩܘܼܫܬܵܐ. ܕܡܵܪܝ ܢܲܪܣܲܝ.

ܨܵܘܡܵܐ ܕܟ݂ܠܝܘܿܡ؛ ܗܵܕܹܐ ܗܝ̤ ܥܸܠܬܹܗ؛ ܠܘܵܬ݂ ܦܪ̈ܘܿܫܹܐ.
ܕܐܲܝܟ݂ ܕܡ̣ܢ ܠܲܚܡܵܐ؛ ܙܵܕܹܩ ܕܲܢܨܘܼܡ؛ ܐܵܦ ܡ̣ܢ ܥܵܘܠܵܐ.܀
ܘܬ݂ܘܼܒ݂ ܐܵܦ ܐ݇ܪܵܙܵܐ ܗܘ̤؛ ܕܗ̇ܘ ܬܘܼܩܵܢܵܐ ܕܠܵܐ ܡܸܬ݂ܚܲܒܲܠ.
ܕܲܕ݂ܠܵܐ ܐܘܼܟ݂ܠܵܐ؛ ܚܵܐܹ̇ܝܢ ܦܲܓ݁ܪܹ̈ܐ. ܐܲܝܟ݂ ܪ̈ܘܼܚܵܢܹܐ.܀
ܐܝܼܬ݂ ܒܹܗ ܥܸܠܬ݂ܵܐ؛ ܐܵܦ ܚܘܼܡܣܵܢܵܐ؛ ܕܡ̣ܢ ܒܝܼܫܵܬ̣̈ܵܐ.
ܕܡܵܐ ܕܡܸܬ݂ܩܲܦܲܚ؛ ܦܲܓ݁ܪܵܐ ܒܨܵܘܡܵܐ؛ ܢܛܲܟܸܣ ܪܲܗܛܹܗ.܀
ܥܸܠܬ݂ܵܐ ܕܨܵܘܡܵܐ؛ ܕܐܲܪܒ݁ܥܝܼܢ ܝܵܘ̈ܡܝܼܢ. ܦܘܼܪܣܵܐ ܗܘ̤ ܕܐܸܫܟܲܚܘ.
ܐܲܣܵܘܵܬ̣̈ܵܐ ܪ̈ܘܼܚܵܢܵܝܹܐ؛ ܠܚܘܼܠܡܵܢ ܐ݇ܢܵܫܵܐ.܀
ܚܙܵܘ ܓܹܝܪ ܕܲܡܚܝܼܠ؛ ܟܝܵܢܵܐ ܕܐ݇ܢܵܫܵܐ؛ ܠܪܲܗܛܵܐ ܕܟ݂ܠܝܘܿܡ.
ܘܡܲܕܸܟ݂ܘ ܘܝܲܗ݇ܒ݂ܘ ܠܹܗ؛ ܙܲܒ݂ܢܵܐ ܙܥܘܿܪܵܐ ܒܲܕ݂ܡܘܼܬ݂ ܣܲܡܵܐ.܀
ܒܙܲܒ݂ܢܵܐ ܕܲܦܐܹܐ؛ ܬܲܚܸܡܘ ܨܵܘܡܵܐ؛ ܠܫܲܒ݂ܪܘܼܬ݂ ܐ݇ܢܵܫܵܐ.
ܘܐܲܣܲܪܘ ܐܸܢܘܿܢ؛ ܠܘܵܬ݂ ܚܘܼܡܣܵܢܵܐ؛ ܒܪܸܓܲܬ݂ ܥܹܐܕ݂ܵܐ.܀
ܣܵܡܘܼܗܝ ܠܨܵܘܡܵܐ؛ ܐܲܝܟ݂ ܫܲܬ݂ܐܸܣܬ݂ܵܐ؛ ܠܒܸܢܝܵܢ ܚܘܼܒܵܐ.
ܕܢܸܒ݂ܢܸܐ ܟܠ ܐ݇ܢܵܫ ܗܲܝܟܲܠ ܢܲܦ̮ܫܹܗ؛ ܒܕ݂ܘܼܒܵܪ ܚܲܝܹ̈ܐ.܀
ܐܲܝܟ݂ ܬܲܛܠܝܼܠܵܐ؛ ܒܪܹܫ ܒܸܢܝܵܢܵܐ؛ ܫܲܟ݂ܠܸܠܘ ܥܹܐܕ݂ܵܐ.
ܕܢܸܒ݂ܣܲܡ ܟܠ ܐ݇ܢܵܫ؛ ܒܗܲܝܟܲܠ ܪܘܼܚܵܐ؛ ܕܐ݇ܪܵܙ ܢܘܼܚܵܡܵܐ.܀
ܥܸܠܬܹܗ ܕܥܹܐܕ݂ܵܐ؛ ܢܘܼܚܵܡ ܦܲܓ݁ܪܵܐ ܗܘ̤؛ ܘܦܘܼܪܩܵܢ ܢܲܦ̮ܫܵܐ.
ܘܫܲܦܝܼܪ ܐܲܠܸܦܘ؛ ܕܦܲܓ݁ܪܵܐ ܘܢܲܦ̮ܫܵܐ؛ ܢܨܘܼܡܘܼܢ ܐܲܟ݂ܚܲܕ݂.܀
ܪܫܝܼܡܵܐ ܒܹܗ ܬܘܼܒ݂؛ ܐܵܦ ܙܵܟ݂ܘܼܬܹܗ؛ ܕܡܲܠܟܵܐ ܕܪܵܘܡܵܐ.
ܕܲܙܟ݂ܵܐ ܘܙܲܟ݁ܝܼ ܘܩܵܡ̣ ܘܐܸܬ݂ܢܲܚܲܡ؛ ܘܐܲܚܝܼ ܠܟ݂ܠܵܐ.܀
ܒܫܘܼܠܵܡ ܨܵܘܡܵܐ؛ ܕܐܲܪܒ݁ܥܝܼܢ ܝܵܘܡ̈ܝܼܢ؛ ܪܫܲܡ̣ ܙܵܟ݂ܘܼܬܹܗ.
ܘܐܲܠܸܦ ܥܲܒ݂ܕܵܘܗܝ؛ ܕܢܸܬ݁ܕܲܟ݂ܪܘܼܢܵܝܗܝ؛ ܒܝܘܿܡ ܙܵܟ݂ܘܼܬܹܗ.܀
ܒܨܵܘܡܹܗ ܓܠ̣ܵܐ ܠܗܘܿܢ؛ ܥܲܠ ܙܵܟ݂ܘܼܬܹܗ؛ ܕܢܸܬ݁ܕܲܡܘܿܢ ܒܹܗ.
ܘܲܒ݂ܙܵܟ݂ܘܼܬܹܗ؛ ܐܲܠܸܦܘ ܐܸܢܘܿܢ؛ ܠܡܸܚܣܲܢ ܚܲܫܹ̈ܐ.܀
ܒܐܲܪܒ݁ܥܝܼܢ ܝܵܘܡ̈ܝܼܢ؛ ܬܲܚܡܹܗ ܠܪܲܗܛܵܐ؛ ܕܲܓ݁ܡܝܼܪܘܼܬ݂ܵܐ.
ܕܢܸܗܘܸܐ ܩܲܠܝܼܠ؛ ܠܐܲܝܢܵܐ ܕܪܵܕܹܐ ܠܘܲܥܕܵܐ ܕܲܠܗܵܠ.܀