Sliwakh Amlekh|ܨܠܝܼܒ݂ܵܟ݂ ܐܲܡܠܸܟ݂|ܨܠܝܒܟ ܐܡܠܟ

ܕܒ݂ܵܣܵܠܝܼܩܹ̈ܐ. ܪܹܫ ܩܵܠܵܐ. ܐܲܡ̣ܠܸܟ݂ ܐܲܠܵܗܵܐ ܥܲܠ ܥܲܡܡܹ̈ܐ: ܐܲܡ̣ܠܸܟ݂ ܡܵܪܝܵܐ ܠܥܵܠܲܡ. ܕܨܘܼܪܬܵܐ. ܡܲܠܟ݁ܘܼܬܹܗ ܡܲܠܟ݁ܘܼܬ݂ ܥܵܠܲܡ. ܘܫܘܼܠܛܵܢܹܗ ܠܕ݂ܵܪܕܵܪ̈ܝܼܢ. ܨܠܝܼܒ݂ܵܟ݂ ܐܲܡ̣ܠܸܟ݂ ܒܲܫܡܲܝܵܐ. ܘܲܨܠܝܼܒ݂ܵܟ݂ ܐܲܡܠܸܟ݂ ܒܐܲܪܥܵܐ. ܘܲܨܠܝܼܒ݂ܵܟ݂ ܟܲܠܸܠ̣ ܐܸܢܘܿܢ. ܠܟܸܢܫܹ̈ܐ ܕܐܵܘܕ݁ܝܼܘ ܒܲܨܠܝܼܒ݂ܵܟ݂: ܬܢܝܼ. ܒܲܫܡܲܝܵܐ ܘܒܲܐܪܥܵܐ. ܕܨܘܼܪܬܵܐ. ܗܵܘ݁ ܕܒܹܗ ܐܝܼܬ݂ ܠܲܢ ܦܘܼܪܩܵܢܵܐ ܘܫܘܼܒ݂ܩܵܢܵܐ ܕܲܚܛܵܗܹ̈ܐ. ܨܠܝܼܒ݂ܵܐ ܕܐܸܬ݂ܚ݇ܙܝܼ ܒܲܫܡܲܝܵܐ. ܘܐܸܬ݂ܓ݁ܠܝܼ ܒܪ̈ܲܚܡܹܐ ܠܐܲܪ̈ܥܵܢܹܐ. ܗ̤ܘ ܪܲܡ̣ܪܸܡ ܠܓܸܢܣܲܢ ܫܝܼܛܵܐ. ܘܥܲܠ̣ܝܼ ܣ̣ܵܡܹܗ ܒܲܫܡܲܝܵܐ. ܗܸܕ݂ܪܵܟ݂ ܘܫܘܼܒ݂ܚܵܟ݂ ܘܫܘܼܒ݂ܚܵܟ݂ ܙܵܟܹ݁ܐ. ܕܨܘܼܪܬܵܐ. ܥ̣ܒܲܕ݂ ܙܵܟ݂ܘܼܬ݂ܵܐ ܒܲܕ݂ܪܵܥܹܗ. ܨܠܝܼܒ݂ܵܐ ܙܟ݂ܵܐ ܨܠܝܼܒ݂ܵܐ ܙܵܟܹ݁ܐ. ܨܠܝܼܒ݂ܵܐ ܚܲܝܒܹܗ ܠܣܵܛܵܢܵܐ. ܘܐܲܒ݂ܗܸܬ݂ ܠܓ݂ܘܼܕܹ̈ܐ ܕܨܵܠ݁ܘܿܒ݂ܵܘ̈ܗܝ. ܘܚܲܕ݁ܝܼ ܠܟܸܢܫܹ̈ܐ ܕܣܵܓ݂ܘܿܕ݂ܵܘ̈ܗܝ. ܐܲܢ̣ܗܲܪܘ ܒܲܪ̈ܩܵܘܗܝ ܠܬܹܒܹܝܠ. ܕܨܘܼܪܬܵܐ. ܐܸܬ݂ܟܲܣܝܼܘ ܫܡܲܝ̈ܵܐ ܡ̣ܢ ܙܝܼܘܹܗ ܡܫܲܒ݁ܚܵܐ. ܨܠܝܼܒ݂ܵܐ ܕܢܘܼܗܪܵܐ ܕܐܸܬ݂ܚܵܘܝܼ. ܠܩܘܼܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟ݂ ܪܲܒ݁ ܚܲܝܠܵܐ ܐܵܙܹ݁ܠ ܗ݇ܘ̣ܵܐ. ܒܪܹܫ ܡܲܫܪܝܼܬܹܗ ܠܲܩܪܵܒ݂ܵܐ. ܡ̣ܢ ܥܲܡܵܐ ܕܠܵܐ ܡܪܲܚܡܵܢ. ܕܨܘܼܪܬܵܐ. ܬܘܼܒ݂ ܦܘܼܩܕܵܢܵܐ ܚܲܕ݂ܬ݂ܵܐ ܝܵܗܹ݁ܒ݂ ܐ݇ܢܵܐ ܠܟ݂ܘܿܢ. ܨܠܝܼܒ݂ܵܟ݂ ܡܵܪܲܢ ܕܐܸܬ݂ܚܲܦܝܼ. ܡ̣ܢ ܒܝܼܫܘܼܬ݂ܗܘܿܢ ܕܙܵܩ݁ܘܿܦܹ̈ܐ. ܦܪܲܚ̣ܘ ܙܲܠܝܼܩܵܘ̈ܗܝ ܒܲܒ݂ܪܝܼܬ݂ܵܐ. ܘܐܲܢ̣ܗܲܪܘ ܠܥܵܠܡܵܐ ܡ̣ܢ ܣܵܟܹܗ. ܡܒܲܛܸܠ ܩܪ̈ܵܒܹܐ ܡ̣ܢ ܣܵܘܦܹܝ̈ܗ݁ ܕܐܲܪܥܵܐ. ܕܨܘܼܪܬܵܐ. ܘܲܫ̣ܪܵܐ ܣܝܵܓ݂ܵܐ ܕܩܵܐܹ݁ܡ ܗ݇ܘ̣ܵܐ ܒܲܡܨܲܥܬ݂ܵܐ ܘܲܒ݂ܥܸܠܕܒ݂ܵܒ݂ܘܼܬ݂ܵܐ ܒܒܸܣܪܹܗ. ܨܠܝܼܒ݂ܵܐ ܕܥܵܡܲܪ ܒܲܡܪ̈ܵܘܡܹܐ. ܫܲܝܸܢ ܠܥܘܼܡܩܵܐ ܬܲܚܬܵܝܹ̈ܐ. ܕܪܵܘܡܵܐ ܠܵܐ ܣܢܝܼܩ ܥܲܠ ܫܲܝܢܵܐ. ܫܲܝܸܢ ܡܵܪܝ ܠܲܒ݂ܢܲܝ̈ܢܵܫܵܐ. ܕܲܢܚܵܘܸܐ ܓܲܢ݇ܒܵܪܘܼܬܹܗ. ܕܨܘܼܪܬܵܐ. ܐܲܪܝܼܡ ܪܹܫܹܗ ܘܪܲܡ̱ܪܡܹܗ. ܨܠܝܼܒ݂ܵܐ ܙܲܟ݁ܝܹܗ ܠܲܟ݂ܝܵܢܲܢ. ܨܠܝܼܒ݂ܵܐ ܐܲܩ̣ܝܼܡ ܡܲܦܘܼܠܬܲܢ. ܨܠܝܼܒ݂ܵܐ ܪܲܡ̣ܪܸܡ ܕܲܚܝܼܚܲܢ. ܘܥܲܠ̣ܝܼ ܣ̣ܵܡܹܗ ܒܲܫܡܲܝܵܐ. ܬܹܒܹܝܠ ܘܟ݂ܠܗܘܿܢ ܥܵܡ݁ܘܿܪܹ̈ܝܗ݁. ܕܨܘܼܪܬܵܐ. ܘܫܲܝܸܢ ܒܲܕ݂ܡܵܐ ܕܲܙܩܝܼܦܹܗ ܒܐܝܼܕ݂ܵܘ̈ܗܝ. ܒܲܨܠܝܼܒ݂ܵܟ݂ ܐܸܫܬܲܝܲܢܢ ܟܠ. ܘܒܲܨܠܝܼܒ݂ܵܟ݂ ܐܸܬ݂ܚܲܕܲܬ݂ ܟܠ. ܘܒܲܨܠܝܼܒ݂ܵܟ݂ ܡܵܪܝ ܢܲܛܲܪ ܠܲܢ. ܡ̣ܢ ܨܸܢܥܵܬܹ̈ܗ ܕܲܢܟ݂ܝܼܠܵܐ. ܥܲܠ ܥܲܡܵܟ݂ ܒܘܼܪܟ݁ܬ݂ܵܟ݂ ܠܥܵܠܲܡ. ܕܨܘܼܪܬܵܐ. ܡܲܢ ܠܵܐ ܢܸܕ݂ܚܲܠ ܠܵܟ݂ ܡܲܠܟܵܐ ܕܟ݂ܠܗܘܿܢ ܥܲܡܡܹ̈ܐ. ܒܲܨܠܝܼܒ݂ܵܟ݂ ܡܵܪܝ ܢܸܫܬܲܝܢܘܼܢ. ܟܵܗܢܹ̈ܐ ܘܡܲܠܟܹ̈ܐ ܡܪ̈ܲܥܝܵܢܲܝܟ. ܘܒܲܨܠܝܼܒ݂ܵܟ݂ ܬܸܪܘܲܙ ܥܹܕ݁ܬܵܟ݂. ܕܲܒ݂ܡܘܼܟܵܟ݂ܵܟ݂ ܪܲܡܪܸܡ̣ܬܵܗ݁. ܚܢܲܢ ܥܲܡܵܟ݂ ܘܥܵܢ̈ܵܐ ܕܡܲܪܥܝܼܬ݂ܵܟ݂. ܕܨܘܼܪܬܵܐ. ܢܸܬ݂ܒܲܪ ܩܸܫܬܵܐ ܒܲܩܪܵܒ݂ܵܐ. ܘܲܢܡܲܠܸܠ ܫܠܵܡܵܐ ܥܲܡ ܥܲܡܡܹ̈ܐ. ܒܲܨܠܝܼܒ݂ܵܟ݂ ܡܵܪܝ ܢܸܫܬܲܝܲܢ. ܥܵܠܡܵܐ ܕܲܩܪ̈ܵܒܹܐ ܫܲܓ݂ܫ̣ܘܼܗܝ. ܘܲܒ݂ܦܘܼܩܕܵܢܵܟ݂ ܢܸܬ݂ܒܲܛܲܠ. ܣܲܝܦܵܐ ܕܚܵܪܹܒ݂ ܡܲܫܪܝܼܬܲܢ. ܚ̣ܵܘܝܼ ܡܵܪܝܵܐ ܦܘܼܪܩܵܢܹܗ. ܕܨܘܼܪܬܵܐ. ܠܲܝܬ݁ ܒܐ݇ܢܵܫ ܐ݇ܚܪܹܝܢ ܦܘܼܪܩܵܢܵܐ. ܒܲܨܠܝܼܒ݂ܵܐ ܗܘ̤ܵܐ ܦܘܼܪܩܵܢܵܐ. ܠܥܲܡܡܹ̈ܐ ܕܗܲܝܡ̣ܢ̣ܘ ܒܲܨܠܝܼܒ݂ܵܐ. ܘܒܲܨܠܝܼܒ݂ܵܐ ܗܘ̤ܵܐ ܚܘܼܝܵܒ݂ܵܐ. ܠܥܲܡܵܐ ܕܲܟ݂ܦܲܪ ܒܲܨܠܝܼܒ݂ܵܐ. ܡܸܛܠ ܕܡܲܒ݁ܘܼܥܵܐ ܕܚܲܝܹ̈ܐ ܥܲܡܵܟ݂ ܗ݇ܘ̣. ܕܨܘܼܪܬܵܐ. ܢܸܗܘܘܿܢ ܒܹܗ ܡܥܝܼܢܵܐ ܕܡܲܝ̈ܵܐ ܕܢܵܒ݂ܥ݁ܝܼܢ ܠܚܲܝܹ̈ܐ ܕܲܠܥܵܠܲܡ. ܕܵܡܹ݁ܐ ܨܠܝܼܒ݂ܵܐ ܩܲܕ݁ܝܼܫܵܐ. ܠܡܲܒ݁ܘܼܥܵܐ ܕܪܵܕܹ݁ܐ ܒܲܥܕܸܢ. ܘܐܸܫ̣ܬ݁ܝܼܘ ܡ̣ܢܹܗ ܚܲܟ݁ܝܼܡܹ̈ܐ. ܘܐܵܦ ܣܲܟ݂ܠܹ̈ܐ ܩܢ̣ܵܘ ܒܘܼܝܵܢܵܐ. ܢܸܗܘܸܐ ܐܲܝܟ݂ ܐܝܼܠܵܢܵܐ ܕܲܢܨܝܼܒ݂ ܥܲܠ ܬܲܦܵܐ ܕܡܲܝ̈ܵܐ. ܕܨܘܼܪܬܵܐ. ܐܲܝܟ݂ ܙܲܝܬܵܐ ܗܕ݂ܝܼܪܵܐ ܕܪܵܘ̱ܪ̈ܒ݂ܵܢ ܣܵܘܟܵܘ̈ܗܝ. ܕܵܡܹ݁ܐ ܨܠܝܼܒ݂ܵܐ ܩܲܕ݁ܝܼܫܵܐ. ܠܐܝܼܠܵܢ ܚܲܝܹ̈ܐ ܒܓ݂ܵܘ ܥܹܕ݁ܬܵܐ. ܕܦܹܐܪ̈ܵܘܜ ܥܵܗ݁ܢܝܼܢ ܠܡܹܐܟ݂ܘܼܠܬܵܐ. ܘܛܲܪ̈ܦܵܘܗܝ ܚܵܫ݁ܚܝܼܢ ܠܐܵܣ݁ܝܘܼܬ݂ܵܐ. ܫܲܦܝܼܪ ܒܚܸܙܘܹܗ ܡ̣ܢ ܒܢܲܝ̈ܢܵܫܵܐ. ܕܨܘܼܪܬܵܐ. ܐܲܝܟ݂ ܢܘܼܗܪܵܐ ܕܫܲܒ݂ܥܵܐ ܝܵܘܡ̈ܝܼܢ. ܕܵܡܹ݁ܐ ܨܠܝܼܒ݂ܵܐ ܩܲܕ݁ܝܼܫܵܐ. ܠܫܸܡܫܵܐ ܕܕ݂ܵܢܲܚ݁ ܒܲܪܩܝܼܥܵܐ. ܕܙܲܠܝܼܩܵܘ̈ܗܝ ܦܵܪܚ݁ܝܼܢ ܒܐܵܐܲܪ. ܘܢܘܼܗܪܹܗ ܡܲܦܨܲܚ ܒܸܪ̈ܝܵܬ݂ܵܐ. ܣܹܐܡܵܐ ܓܲܒ݂ܝܵܐ ܕܲܒ݂ܚܝܼܪ ܒܐܲܪܥܵܐ. ܕܨܘܼܪܬܵܐ. ܩܲܒ݁ܠܘܼܗܝ ܗܵܟܹܝܠ ܒܡܵܪܝܵܐ ܒܟ݂ܠ ܚܲܕ݂ܘܵܐ. ܕܵܡܹ݁ܐ ܨܠܝܼܒ݂ܵܐ ܩܲܕ݁ܝܼܫܵܐ. ܠܡܲܪܓܵܢܝܼܬ݂ܵܐ ܕܠܵܐ ܡܘܼܡܵܐ. ܕܙܲܒ݁ܢ̣ܘܼܗ݁ ܪ̈ܲܒܲܝ ܬܲܓܵܪܹ̈ܐ. ܘܲܥ̣ܬܲܪܘ ܡ̣ܢܵܗ݁ ܘܐܸܬ݂ܪܲܡܪܲܡܘ. ܠܲܡܗܲܝܡܢܹ̈ܐ ܢ̇ܵܛܲܪ ܡܵܪܝܵܐ. ܕܵܡܹ݁ܐ ܟܸܢܫܵܐ ܕܲܡܗܲܝܡܢܹ̈ܐ. ܟܲܕ݂ ܩܵܐܹ݁ܡ ܒܓ݂ܵܘ ܥܹܕܵܬ݂̈ܵܐ. ܠܟܸܢܫܹ̈ܐ ܕܥܝܼܪܹ̈ܐ ܕܲܡܙܲܝܚܝܼܢ. ܠܲܫܟ݂ܝܼܢܬܵܐ ܐܲܠܵܗܵܝܬܵܐ. ܐܲܝܟ݂ ܪ̈ܣܝܼܣܹܐ ܕܢܵܚ݁ܬ݁ܝܼܢ ܥܲܠ ܐܲܪܥܵܐ. ܕܵܡܹ݁ܐ ܨܠܝܼܒܹܗ ܕܡܲܚܝܵܢܲܢ. ܠܗܵܘ݁ ܕܐܲܪܝܼܡ ܡܘܼܫܹܐ ܒܡܲܕ݂ܒ݁ܪܵܐ. ܗܵܘ݁ ܠܥܸܒ݂ܪ̈ܵܝܹܐ ܐܲܚ̣ܝܼ ܗ݇ܘ̣ܵܐ. ܘܗܵܢܵܐ ܠܐܲܪ̈ܒܲܥܦܸܢܝܵܬ݂ܵܐ. ܢܸܫܬܲܒ݂ܗܲܪ ܟܠ ܕܝ̇ܵܡܹܐ ܒܹܗ. ܠܵܐ ܒܵܗ݁ܬ݁ܝܼܢܲܢ ܒܲܨܠܝܼܒ݂ܵܟ݂. ܝܼܫܘܿܥ ܡܲܠܟܲܢ ܙܲܟܵܝܵܐ. ܕܒܹܗ̤ܘ ܦܪܲܩ̣ܬܵܝܗܝ ܠܲܟ݂ܝܵܢܲܢ. ܡ̣ܢ ܫܘܼܥܒܵܕ݂ܵܗ݁ ܕܲܚܛܝܼܬ݂ܵܐ. ܡ̣ܢ ܣܵܘܦܹܝ̈ܗ݁ ܠܣܵܘܦܹܝ̈ܗ݁ ܕܐܲܪܥܵܐ. ܨܠܝܼܒ݂ܵܐ ܕܲܡܬ݂ܝܼܚ ܫܘܼܠܛܵܢܹܗ. ܒܲܫܡܲܝܵܐ ܘܲܠܬܲܚܬ݁ ܒܐܲܪܥܵܐ. ܫܲܝܢܵܟ݂ ܢܲܡܠܸܟ݂ ܥܲܠ ܥܹܕ݁ܬܵܟ݂ ܕܬܸܙܡܲܪ ܠܵܟ݂ ܫܘܼܒ݂ܚܵܐ ܟܠܝܘܿܡ. ܡ̣ܢ ܡܲܕ݂ܢܵܚܵܘ̈ܜ ܕܫܸܡܫܵܐ ܘܲܥܕܲܡܵܐ ܠܡܲܥܪ̈ܵܒ݂ܵܘܜ. ܕܨܘܼܪܬܵܐ. ܘܬܸܫܒ݁ܘܿܚܬܹ݁ܗ ܐܸܬ݂ܡܲܠܝܲܬ̤ ܐܲܪܥܵܐ. ܫܘܼܦܪܹܗ ܪܓ݂ܝܼܓ݂ܵܐ ܕܲܨܠܝܼܒ݂ܵܐ. ܐܲܙܠܸܓ݂ ܥܲܠ ܟܠܵܗ݁ ܬܹܒܹܝܠ. ܘܲܩܢ̣ܵܘ ܣܲܒ݂ܪܵܐ ܫܲܪܝܼܪܵܐ. ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ. ܒܲܕ݂ܪܵܥܵܟ݂ ܥܲܫܝܼܢܵܐ ܒܲܕܲܪܬ݁ ܠܲܒ݂ܥܸܠܕܒ݂ܵܒܲܝ̈ܟ. ܕܨܘܼܪܬܵܐ. ܫܸܡܫܵܐ ܘܣܲܗܪܵܐ ܩܵܡ̣ܘ ܒܡܸܕ݂ܝܵܪ̈ܲܝܗܘܿܢ. ܐܘܿ ܨܠܝܼܒ݂ܵܐ ܕܲܡܠܸܐ ܚܢܵܢܹ̈ܐ. ܡܲܢ ܐܲܦ̣ܩܵܟ݂ ܠܒܹܝܬ݂ ܐܘܼܪ̈ܚܵܬ݂ܵܐ. ܒܸܪ̈ܝܵܬ݂ܵܐ ܚܙܹ݁ܝܬ݂ ܕܲܫܓ݂ܝܼ̈ܫܵܢ. ܘܢܸܦ݁ܩܹܬ݂ ܕܐܹܫܲܝܸܢ ܐܸܢܹܝܢ. ܢܲܛܲܪܲܝܢܝ ܐܲܝܟ݂ ܒܵܒ݂ܬ݂ܵܐ ܕܥܲܝܢܵܐ. ܨܠܝܼܒ݂ܵܟ݂ ܢܸܗܘܸܐ ܢ̇ܵܛܘܿܪܵܐ. ܠܟܸܢܫܹ̈ܐ ܣܵܓ݂ܕܲܝ̈ ܠܲܨܠܝܼܒ݂ܵܟ݂. ܘܒܲܨܠܝܼܒ݂ܵܟ݂ ܢܲܛܲܪ ܠܥܹܕ݁ܬܵܟ݂. ܡ̣ܢ ܓܘܼܕܵܦܵܐ ܕܡܲܪ̈ܵܚܹܐ. ܚܢܲܢ ܥܲܡܵܟ݂ ܘܥܵܢ̈ܵܐ ܕܡܲܪܥܝܼܬ݂ܵܟ݂. ܒܲܨܠܝܼܒ݂ܵܟ݂ ܡܵܪܝ ܢܸܬ݂ܢ̱ܛܲܪ. ܟܸܢܫܵܐ ܕܙܲܝܚ̣ ܥܲܕ݂ܥܹܕ݂ܵܟ݂. ܘܲܒ݂ܛܸܠܵܠܹܗ ܢܸܣܬܲܬܲܪ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ. ܕܲܨܠܘܿܬ݂ܵܐ܀ ܝܲܡܝܼܢܵܟ݂ ܡܵܪܝܵܐ ܐܲܓܸ݁ܢ ܥܠܲܝ. ܐܘܿ ܕܲܦܫܝܼܛܵܐ ܝܲܡܝܼܢܹܗ. ܘܲܦܬ݂ܝܼܚ ܬܲܪܥܹܗ ܠܬܲܝ̇ܵܒܹ̈ܐ. ܦܬܲܚ ܠܵܗ݁ ܬܲܪܥܵܐ ܠܲܨܠܘܿܬܲܢ. ܘܬܸܥܘܿܠ ܩܕ݂ܵܡܲܝܟ ܒܵܥܘܼܬܲܢ. ܕܒܲܫܡܹܗ ܩܲܕ݁ܝܼܫܵܐ ܣܲܒܲܪ݇ܢ. ܡܫܝܼܚܵܐ ܕܒܲܫܡܹܗ ܟܢܝܼܫܝܼܢܲܢ. ܘܥܲܠ ܛܲܝܒ݁ܘܼܬܹܗ ܬܟ݂ܝܼܠܝܼܢܲܢ. ܢܲܛܲܪ ܠܟܸܢܫܲܢ ܒܲܨܠܝܼܒ݂ܵܟ݂. ܕܢܸܫܬܲܡܠܸܐ ܒܲܢ ܨܸܒ݂ܝܵܢܵܟ݂. ܒܟ݂ܠܙܒܲܢ ܘܲܒ݂ܟ݂ܠܥܸܕܵܢ. ܨܠܘܿܬ݂ܵܗ̇ ܕܲܒ݂ܬ݂ܘܼܠܬܵܐ ܡܲܪܝܲܡ. ܐܸܡܹܗ ܕܝܼܫܘܿܥ ܦܵܪܘܿܩܲܢ. ܬܸܗܘܸܐ ܠܲܢ ܐܲܡܝܼܢܵܐܝܼܬ݂. ܫܘܼܪܵܐ ܒܠܸܠܝܵܐ ܘܒ݂ܐܝܼܡܵܡܵܐ. ܒܥܵܘ ܠܡܵܪܝܵܐ ܘܐܸܬ݂ܚܲܝܲܠܘ. ܢܒ݂ܝܼܹ̈ܐ ܨܲܠܵܘ ܥܲܠ ܫܲܝܢܵܐ. ܘܲܫܠܝܼܚܹ̈ܐ ܥܲܠ ܫܠܵܡܵܐ. ܘܣܵܗܕܹ̈ܐ ܘܟ݂ܵܗܢܹ̈ܐ ܘܡܲܠܦܵܢܹ̈ܐ. ܨܠܘܿܬ݂ܟ݂ܘܿܢ ܫܘܼܪܵܐ ܬܸܗܘܸܐ ܠܲܢ. ܫܲܒܲܚ. ܨܠܝܼܒ݂ܵܟ݂ ܐܲܡ̣ܠܸܟ݂ ܒܲܫܡܲܝܵܐ. ܘܲܨܠܝܼܒ݂ܵܟ݂ ܐܲܡܠܸܟ݂ ܒܐܲܪܥܵܐ. ܘܲܨܠܝܼܒ݂ܵܟ݂ ܟܲܠܸܠ̣ ܐܸܢܘܿܢ. ܠܟܸܢܫܹ̈ܐ ܕܐܵܘܕ݁ܝܼܘ ܒܲܨܠܝܼܒ݂ܵܟ݂. ܥܵܠܲܡ. ܩܲܕ݁ܝܼܫܵܐ ܐܲܠܵܗܵܐ. ܩܲܕ݁ܝܼܫܵܐ ܚܲܝܠ̱ܬ݂ܵܢܵܐ. ܩܲܕ݁ܝܼܫܵܐ ܠܵܐ ܡܵܝ݁ܘܿܬ݂ܵܐ. ܐܸܬ݂ܪܲܚܲܡܥܠܲܝܢ.