Taw Kollan Mlile| ܬܵܘ ܟܠܲܢ ܡܠܝܼܠܹ̈ܐ| ܬܘ ܟܠܢ ܡܠܝܠܐ

ܬܵܘ ܟܠܲܢ ܡܠܝܼܠܹ̈ܐ

ܒܵܬܲܪ ܐܲܒ݂ܘܼܢ ܕܒܲܫܡܲܝܵܐ ܐ݇ܚܪܵܝܬܵܐ ܕܨܲܦܪܵܐ ܡܵܐ ܕܥܵܒ݂ܪܝܼܢ ܒܲܫܠܵܡܵܐ ܡܲܩܦܝܼܢ ܣܘܿܓ݁ܝܼܬ݂ܵܐ ܕܲܫܠܵܡܵܐ. ܘܐܵܡܪܝܼܢ ܠܵܗ̇ ܒܩܵܠܵܐ ܚܲܠܝܵܐ.

ܥܘܼܢܵܝܵܐ؛

ܬܵܘ ܟܠܲܢ ܡܠܝܼܠܹ̈ܐ؛ ܦܪ̈ܝܼܩܲܝ ܒܲܨܠܝܼܒ݂ܵܐ.

ܢܵܘܕܸܐ ܠܹܗ ܠܝܼܫܘܿܥ؛ ܕܐܐܸܬ݂ܵܐ ܠܦܘܼܪܩܵܢܲܢ܀

ܒܵܬܹ̈‍ܐ؛

ܐ؛

ܐܘܿ ܢܵܛܪ̈ܲܝ ܩܲܒ݂ܪܵܐ؛ ܘܲܡܥܲܓ݁ܠܲܝ̈ ܟܹܐܦܵܐ.

ܓܠܵܘ ܠܝܼ ܕܐܲܝܟܵܘ ܒܹܪܝ؛ ܕܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܒ؛

ܒܥܸܠܝܼܬ݂ܵܐ ܚܙܹܝܬܹܗ؛ ܒܲܝܢܵܬ݂ ܬܲܠܡܝܼܕ݂ܵܘ̈ܗܝ.

ܒܥܹܝܬܹܗ ܘܠܵܐ ܐܸܫܟܲܚܬܹܗ؛ ܕܗܵܘ ܢܲܦ̮ܫܝ ܒܵܥܝܵܐ ܠܹܗ.܀

ܓ؛

ܓܲܢܵܢܵܐ ܓܠܝܼܠܝܼ؛ ܓܠܝܼܠܝܼ ܘܒܲܕܸܩ ܠܝܼ.

ܕܐܲܝܟܵܘ ܒܹܪܝ ܚܲܒ݁ܝܼܒ݂ܝ؛ ܕܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܕ؛

ܕܵܢܘܼܗܝ ܝܗ݇ܘܼܕ݂ܵܝܹ̈ܐ؛ ܘܚܲܝܒ݂ܘܼܗܝ ܨܵܠܘܿܒܹ̈ܐ.

ܘܥܲܠ ܩܲܝܣܵܐ ܬܠܵܐܘܼܗܝ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܗ؛

ܗܵܢ ܠܸܠܝܵܐ ܦܠܲܓ݁ܠܹܗ؛ ܘܬܲܪܢܵܓ݁ܠܵܐ ܩ̣ܪܵܐܠܹܗ.

ܘܫܸܡܥܘܿܢ ܬܠܵܬ݂ ܟܦܲܪ ܒܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܘ؛

ܘܵܝܵܐ ܠܝܗ݇ܘܼܕ݂ܵܝܹ̈ܐ؛ ܘܒܸܗܬ݁ܬ݂ܵܐ ܠܟ݂ܵܦܘܿܪܹ̈ܐ.

ܕܨܲܠܿܒ݂ܘܼܗܝ ܠܒܹܪܝ ܡܲܓܲܢ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܙ؛

ܙܲܝܢܵܐ ܕܪܘܼܚܩܘܼܕ݂ܫܵܐ؛ ܐܲܠܒܸܫ ܒܲܩܝܵܡܬܹܗ.

ܠܲܫܠܝܼܚܹ̈ܐ ܪ̈ܵܚܡܵܘܗܝ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܚ؛

ܚܵܪܹܬ݂ ܒܲܟ݂ܢܘܼܫܬܵܐ؛ ܕܲܬ݂ܪܹܥܣܲܪ ܫܠܝܼܚܹ̈ܐ.

ܘܠܵܐ ܚܙܹܝܬ݂ ܠܒܹܪܝ ܥܲܡܗܘܿܢ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܛ؛

ܛܘܼܪܵܐ ܕܒܹܝܬ݂ ܙܲܝܬܹ̈ܐ؛ ܣܵܗܹܕ݂ ܥܲܠ ܩܝܵܡܬܹܗ.

ܘܡܲܟ݂ܪܸܙ ܢܘܼܚܵܡܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܝ؛

ܝܼܚܝܼܕ݂ܵܝܵܐ ܠܐܲܒ݂ܘܼܗܝ؛ ܘܚܲܒ݁ܝܼܒ݂ܵܐ ܠܐܸܡܹܗ.

ܘܲܪܚܝܼܡܵܐ ܠܐܲܡܬܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܟ؛

ܟܸܬܵܢܹ̈ܐ ܢܛܝܼܪܝܼܢ؛ ܘܚܵܬ݂ܡܹ̈ܐ ܩܲܝܵܡܝܼܢ.

ܘܲܚܢܝܼܛܵܐ ܠܲܝܬܵܘܗܝ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܠ؛

ܠܲܝܬ݁ ܫܸܢܬ݂ܵܐ ܠܥܲܝܢܲܝ̈؛ ܘܢܵܘܡܬ݂ܵܐ ܠܲܓ݁ܒ݂ܝܼ̈ܢܲܝ.

ܥܲܕ݂ ܡܸܫܟ݁ܚܵܐ ܐ݇ܢܵܐ ܠܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܡ؛

ܡ̇ܢ ܟܲܝ ܥܵܒ݂ܕܵܐ ܐ݇ܢܵܐ؛ ܘܠܐܲܝܟܵܐ ܐܵܙܵܠ݇ܐ ܐ݇ܢܵܐ.

ܟܒܲܪ ܡܸܫܟ݁ܚܵܐ ܐ݇ܢܵܐ ܠܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܢܢ؛

ܢܘܼܪܹܗ ܫܵܓ݁ܪܵܐ ܠܝܼ؛ ܘܚܘܼܒܹܗ ܡܫܲܠܗܸܒ݂ ܠܝܼ.

ܕܐܸܦܘܿܩ ܒܲܒ݂ܥܵܬܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܣ؛

ܣܵܦܪܹ̈ܐ ܡܲܪ̈ܵܚܹܐ؛ ܘܟ݂ܵܗܢܹ̈ܐ ܥܵܘܵܠܹ̈ܐ.

ܚܲܝܒ݂ܘܼܗܝ ܠܒܹܪܝ ܒܕ݂ܝܼܢܵܐ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܥ؛

ܥܲܠ ܬܲܪܥܵܐ ܝܸܬ݂ܒܹܬ݂؛ ܐܸܬ݂ܡܵܠܝ ܘܝܵܘܡܵܢܵܐ.

ܟܒܲܪ ܚܵܙܝܵܐ ܐ݇ܢܵܐ ܠܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܦ؛

ܦܝܼܠܵܛܘܿܣ ܕܵܢܹܗ؛ ܘܩܲܝܵܦܵܐ ܚܲܝܒܹܗ.

ܘܚܲܢܵܢ ܐܲܒ݂ܗܬܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܨ؛

ܨܵܒ݂ܝܵܐ ܐ݇ܢܵܐ ܠܦܲܓ݁ܪܹܗ؛ ܪܓ݁ܝܼܓ݁ܵܐ ܐ݇ܢܵܐ ܚܙܵܬܹܗ.

ܕܐܸܚܙܹܝܘܗܝ ܘܐܸܚܕܸܐ ܒܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܩ؛

ܩܲܝܵܦܵܐ ܕܵܢܹܗ؛ ܘܦܝܼܠܵܛܘܿܣ ܚܲܝܒܹܗ.

ܘܝܵܘܣܸܦ ܙܒܲܢ ܦܲܓ݁ܪܹܗ؛ ܘܗܵܐ ܢܲܦ̮ܫܝ ܒܵܥܝܵܐ ܠܹܗ.܀

ܪ؛

ܪܲܒ݁ܘܼܠܝܼ ܢܓ݁ܘܼܠܘܼܢ؛ ܪ̈ܲܚܡܲܝܟ ܥܲܠ ܐܲܡܬ݂ܵܟ݂؛

ܒܝܵܘܡܵܐ ܕܡܹܐܬ݂ܝܼܬ݂ܵܟ݂؛ ܡܫܝܼܚܵܐ ܦܵܪܘܿܩܲܢ.܀

ܫ؛

ܫܲܝܢܵܟ݂ ܘܲܫܠܵܡܵܟ݂؛ ܐܲܫܪܵܐ ܒܲܝܢܵܬܲܢ.

ܡܫܝܼܚܵܐ ܦܵܪܘܿܩܲܢ؛ ܘܐܸܬ݂ܪܲܚܲܡ ܥܠܲܝܢ.܀

ܬ؛

ܬܵܘܕܝܼܬ݂ܵܐ ܠܲܫܡܵܟ݂؛ ܘܣܸܓ݁ܕ݂ܬ݂ܵܐ ܠܡܵܪܘܼܬ݂ܵܟ݂.

ܟܠܗܘܿܢ ܝܵܘ̈ܡܵܬܲܢ؛ ܘܐܸܬ݂ܪܲܚܲܡ ܥܠܲܝܢ.܀