Thuwa l'yalude (ܛܘܼܒ݂ܵܐ ܠܝܲܠܘܼܕܹ̈ܐ)

Text

ܛܘܼܒ݂ܵܐ ܠܝܲܠܘܼܕܹ̈ܐ

ܛܘܼܒ݂ܵܐ ܠܝܲܠܘܼܕܹ̈ܐ؛ ܕܲܫܘܵܘ ܕܢܸܚܙܘܿܢ ܠܲܡܫܝܼܚܵܐ ܟܲܕ݂ ܥܵܐܹܠ ܗ̣݇ܘܵܐ ܠܐܘܿܪܸܫܠܸܡ. ܘܲܪܟ݂ܝܼܒ݂ ܥܲܠ ܥܝܼܠܵܐ؛ ܘܲܛܠܵܝܹ̈ܐ ܒܣܵܘܟܲܝ̈ ܙܲܝܬܵܐ ܡܫܲܒ݁ܚܝܼܢ ܩܕܵܡܵܘܗܝ ܟܲܕ݂ ܐܵܡܪܝܼܢ؛ ܐܘܿܫܲܥܢܵܐ ܒܪܵܘܡܵܐ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼـܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ܀

ܛܠܵܝܹ̈ܐ ܛܥܲܢܘ ܣܵܘܟܹ̈ܐ؛ ܘܲܥܠܵܝ̈ܡܵܬ݂ܵܐ ܟܸܢܵܪܹ̈ܐ ܘܲܩܕ݂ܵܡ ܒܲܪ ܕܵܘܝܼܕ݂ ܙܵܡܪܝܼܢ. ܘܲܫܡܲܥܘ ܪ̈ܘܼܚܵܢܹܐ؛ ܩܵܠ ܝܘܼܒܵܒ݂ܗܘܿܢ ܕܝܲܠܘܼܕܹ̈ܐ ܘܲܩܥܵܘ ܟܠܗܘܿܢ ܟܲܕ ܐܵܡܪܝܼܢ. ܐܘܿܫܲܥܢܵܐ ܒܪܵܘܡܵܐ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼـܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ܀

ܫܲܒ݂ܪܹ̈ܐ ܘܝܲܠܘܼܕܹ̈ܐ؛ ܘܲܛܠܵܝܹ̈ܐ ܥܲܡ ܟܠ ܡܘܼܫ̈ܚܵܢ ܠܵܟ݂ ܡܵܪܝ ܬܸܫܒ݁ܘܿܚܬܵܐ ܙܵܡܪܝܼܢ. ܕܲܚܙܵܘ ܬܸܕܡܘܼܪܬܵܐ؛ ܕܲܣܥܲܪ ܗ̣݇ܘܵܐ ܚܲܝܠܵܟ݂ ܪܲܒܵܐ ܒܝܲܕ ܠܵܥܵܙܲܪ ܕܚܲܝܵܘ̈ܗܝ ܦܪܲܩܬ݁. ܐܘܿܫܲܥܢܵܐ ܒܪܵܘܡܵܐ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼـܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ܀

ܠܫܲܒ݂ܪܹ̈ܐ ܕܠܵܐ ܡܸܠܬ݂ܵܐ؛ ܐܲܙܝܼܥ ܗ̣݇ܘܵܐ ܚܲܝܠܵܟ݂ ܪܲܒܵܐ ܘܲܩܥܵܘ ܬܸܫܒ݁ܘܿܚܬܵܐ ܒܗܲܝܟ݁ܠܵܐ. ܘܩܲܛܪܸܓ݂ܘ ܒܡܸܠܵܝ̈ܗܘܿܢ؛ ܠܣܵܦܪܹ̈ܐ ܡܲܠܦܲܝ̈ ܢܵܡܘܿܣܵܐ ܐܵܦ ܠܲܦܪ̈ܝܼܫܹܐ ܕܫܘܼܒ݂ܚܵܟ݂ ܛܠܲܡܘ. ܐܘܿܫܲܥܢܵܐ ܒܪܵܘܡܵܐ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼـܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ܀

ܙܟܲܪܝܵܐ ܐܸܬ݂ܢܲܒܝܼ؛ ܘܐܸܡܲܪ ܗ̣݇ܘܵܐ ܠܵܗ̇ ܠܒܲܪ݇ܬ ܨܸܗܝܘܿܢ ܕܘܼܨܝ ܘܲܚܕ݂ܵܝ ܒܲܪ݇ܬ ܐܘܿܪܸܫܠܸܡ. ܗܵܐ ܡܲܠܟܹܟ݂ܝ ܐܵܬܹܐ؛ ܘܲܪܟ݂ܝܼܒ݂ ܥܲܠ ܥܝܼܠܵܐ ܫܝܼܛܵܐ ܘܒܸܪ̈ܝܵܬ݂ܵܐ ܩܕ݂ܵܡܵܘܗܝ ܣܵܓ݂ܕܵܢ. ܐܘܿܫܲܥܢܵܐ ܒܪܵܘܡܵܐ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼـܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ܀

ܠܒܹܝܬ݂ ܥܲܢܝܵܐ ܡܵܪܲܢ؛ ܫܲܕܲܪ ܘܐܲܝܬܝܼ ܠܹܗ ܥܝܼܠܵܐ ܕܢܸܪܟܲܒ݂ ܘܢܸܥܘܿܠ ܠܐܘܿܪܸܫܠܸܡ. ܘܟܸܢܫܹ̈ܐ ܕܝܼܣܪܵܝܹܠ ܚܙܵܐܘܼܗܝ ܘܐܸܬܬܙܝܼܥܘ ܡ̣ܢ ܩܕ݂ܵܡܵܘܗܝ ܘܲܢܦܲܩܘ ܟܲܕ݂ ܫܘܼܒ݂ܚܹܗ ܙܵܡܪܝܼܢ. ܐܘܿܫܲܥܢܵܐ ܒܪܵܘܡܵܐ؛ ܐܘܿܫܲܥܢܵܐ ܠܲܒ݂ܪܹܗ ܕܕ݂ܵܘܝܼܕ݂. ܒܪܝܼـܟ݂ ܕܐܸܬ݂ܵܐ ܒܲܫܡܹܗ ܕܡܵܪܝܵܐ܀

Images