Thuyay|ܛܘܼܥܝܲܝ|ܛܘܥܝܝ

ܘܡܲܩܦܝܼܢ ܒܥܸܩܒ݂ܵܗ̇ ܬܸܫܒ݁ܘܿܚܬܵܐ ܗܵܕܹܐ ܕܲܥܒ݂ܝܼܕ݂ܵܐ ܠܡܵܪܝ ܢܲܪܣܲܝ ܡܲܠܦܵܢܵܐ.
ܢܘܼܗܪܵܐ ܕܕܸܢܚܹܗ ܕܲܡܫܝܼܚܵܐ: ܚܲܕ݁ܝܼ ܠܐܲܪܥܵܐ ܘܠܲܫܡܲܝܵܐ܀ ܛܘܼܥܝܲܝ ܒܲܕ݂ܡܘܼܬ݂ ܚܸܫܘܿܟ݂ܵܐ: ܦܪܝܼܣܵܐ ܗ݇ܘ̣ܵܬ̤ ܥܲܠ ܒܸܪ̈ܝܵܬ݂ܵܐ. ܘܲܕ݂ܢܲܚ ܢܘܼܗܪܹܗ ܕܲܡܫܝܼܚܵܐ: ܘܲܩܢܵܐ ܥܵܠܡܵܐ ܒܘܼܝܵـܢܵܐ܀ ܠܥܸܕܵܢ ܠܸܠܝܵܐ ܕܵܡܹܐ ܗ݇ܘ̣ܵܐ: ܙܲܒ݂ܢܵܐ ܕܡ̣ܢ ܐܵܕ݂ܵܡ ܘܲܠܟ݂ܵܐ. ܘܝܘܿܡ ܓܸܠܝܵܢܹܗ ܕܲܡܫܝܼܚܵܐ ܠܪܲܗܛܵܐ ܕܫܵܥܹ̈ܐ ܕܐܝܼܡܵܡܵܐ܀ ܨܲܦܪܵܐ ܟܲܢܝܹܗ ܐܵܦ ܡܵܪܲܢ: ܠܫܘܼܪܵܝܵܐ ܕܟ݂ܵܪܘܿܙܘܼܬܹܗ. ܘܥܸܕܵܢ ܪܲܡܫܵܐ ܠܫܘܼܠܵܡܵܐ: ܕܲܡܢܝܼܚ ܠܥܵܠܡܵܐ ܡ̣ܢ ܥܲܡܠܹܗ܀ ܠܗܵܢܵܐ ܣܲܒ݂ܪܵܐ ܡܣܲܟܹ݁ܝܢ ܗ݇ܘ̣ܵܘ: ܟܵܗܢܹ̈ܐ ܘܡܲܠܟܹ̈ܐ ܘܲܢܒ݂ܝܹ̈ܐ. ܘܐܲܢܝܼܚ ܐܸܢܘܿܢ ܒܵܪܘܿܝܵܐ: ܒܲܠܡܹܐܢܵܐ ܕܝܘܿܡ ܓܸܠܝܵܢܹܗ܀ ܒܓܸܠܝܵܢܹܗ ܢܵܚ̈ ܒܸܪ̈ܝܵܬ݂ܵܐ: ܕܲܫܚܝܼ̈ـܩܵܢ ܗ݇ܘܲܝ̈ ܒܲܚܛܝܼܬ݂ܵܐ. ܘܫܲܪܝܼ ܥܵܠܡܵܐ ܡܸܬ݂ܗܲܓܸ݁ܐ: ܒܥܸܢܝܵـܢܵܐ ܕܲܥܬ݂ܝܼܕ݂ܵܬ݂ܵܐ܀ ܕܝܵܬܹܩܹܐ ܚܕܲܬܵܐ ܐܲܫܠܸܡ: ܠܲܡܩܲܒ݁ܠܵܢܹ̈ܐ ܕܝܘܼܠܦܵܢܹܗ. ܛܲܒ݂ܥܵܗ̇ ܒܲܕ݂ܡܵܐ ܕܲܩܢܘܿܡܹܗ: ܕܠܵܐ ܢܸܬ݁ܕܲܓ݁ܠܘܼܢ ܫܘܼܘܕܵܝܵـܘ̈ܗܝ܀ ܒܫܘܼܘܕܵܝܹ̈ܐ ܕܡܲܠܟ݁ܘܼܬ݂ ܪܵܘܡܵܐ: ܐܲܣܪܹܗ ܠܪܲܗܛܵܐ ܕܲܡܠܝܼܠܹ̈ܐ. ܘܗܵܐ ܡܣܲܟܹ݁ܝܢ ܠܹܗ ܠܓܸܠܝܵܢܹܗ: ܐܲܪ̈ܥܵܢܹܐ ܘܲܫܡܲܝܵـܢܹ̈ܐ܀ ܩܪܸܒ݂ ܠܹܗ ܡܸܟܹ݁ܝܠ ܓܸܠܝܵܢܹܗ: ܕܡܲܠܟܵܐ ܕܐܲܡܠܸـܟ݂ ܡ̣ܢ ܓܸܢܣܲܢ. ܬܵܘ ܢܸܬ݁ܛܲܝܲܒ݂ ܠܲܚܙܵܬܹܗ: ܥܲܡ ܟܸܢܫܹ̈ܐ ܕܲܫܡܲܝܵـܢܹ̈ܐ܀ ܡܸܫܚܵܐ ܚܘܼܒܵܐ ܢܸܣܲܒ݂ ܠܲܢ: ܠܗܵܘ̇ ܝܵܘܡܵܐ ܕܲܡܠܹܐ ܩܸܢܛܵܐ. ܕܠܵܐ ܢܸܫܡܲܥ ܗܵܝ ܒܲܪ݇ܬ݂ ܩܵܠܵܐ: ܕܠܵܐ ܝܵܕܲܥ ܐ݇ܢܵܐ ܥܲܡܠܲܝ̈ܟ݁ܘܿܢ܀ ܒܟܲܟ݁ܪܵܐ ܕܡܸܠܲܬ݂ ܝܘܼܠܦܵܢܵܐ: ܢܸܬ݁ܬܲܓܲܪ ܥܲܕ݂ ܚܲܝܝܼܢܲܢ. ܕܢܸܫܬ݁ܘܸܐ ܕܢܸܫܡܲܥ ܗܵܘ̇ ܩܵܠܵܐ: ܕܬ݂ܵܘ ܩܲܒܸ݁ܠܘ ܡܘܼܠܟܵܢܲܝ̈ܟ݁ܘܿܢ܀ ܒܣܲܒ݂ܪܵܐ ܕܚܲܝܹ̈ܐ ܕܲܥܬ݂ܝܼܕ݂ܝܼܢ: ܢܹܐܣܪܝܼܗ̇ ܠܐܸܠܦܵܐ ܕܪܸܥܝܵܢܲܢ. ܘܲܒ݂ܚܘܼܒܵܐ ܘܗܲܝܡܵܢܘܼܬ݂ܵܐ ܢܡܲܢܲܥ ܠܲܠܡܹܐܝܢ ܚܲܕ݂ܘܵܬ݂ܵܐ܀
ܘܥܲܛܦܝܼܢ ܘܐܵܡܪܝܼܢ: ܢܘܼܗܪܵܐ ܕܢܲܚ ܠܙܲܕ݁ܝܼܩܹ̈ܐ: ܘܠܲܬ݂ܪ̈ܝܼܨܲܝ ܠܸܒܵܐ ܚܲܕ݂ܘܼܬ݂ܵܐ܀