Yathew b'settare damrayma|ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ|ܝܬܒ ܒܣܬܪܗ ܕܡܪܝܡܐ

ܡܲܙܡܘܿܪܵـܐ ܕܨܲܦܪܵـܐ

ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ. ܫܒ݂ܝܼܚ ܬܘܼܟ݂ܠܵܢܵܟ݂ ܡܫܝܼܚܵܐ ܦܵܪܘܿܩܲܢ. ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ܀ ܘܲܒ݂ܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ܀ ܐܸܡܲܪ ܠܡܵܪܝܵܐ ܬܘܼܟ݂ܠܵܢܝ܀ ܒܹܝܬ݂ ܓܵܘܣܝ ܐܲܠܵܗܵܐ ܕܲܬ݂ܟ݂ܝܼܠ ܐ݇ܢܵܐ ܥܠܵܘܗܝ܀ ܕܗ̤ܘ ܢܦܲܨܹܝـܟ݂ ܡ̣ܢ ܦܲܚܵܐ ܕܬ݂ܘܼܩ̱ܠܬ݂ܵܐ܀ ܘܡ̣ܢ ܡܲܡܠ̱ܠܵܐ ܕܲܣܪܝܼܩܘܼܬ݂ܵܐ܀ ܒܐܸܒ݂ܪ̈ܵܘܗܝ ܢܦܲܨܹܝـܟ݂ ܘܲܬ݂ܚܘܿܬ݂ ܟܸܢܦܵܘ̈ܗܝ ܬܸܣܬܲܬܲܪ܀ ܙܲܝܢܵܐ ܢܸܚܕܪܵܟ݂ ܩܘܼܫܬܹ݁ܗ܀ ܠܵܐ ܬܸܕ݂ܚܲܠ ܡ̣ܢ ܕܸܚܠ̱ܬܹܗ ܕܠܸܠܝܵܐ܀ ܘܡ̣ܢ ܓܹܐܪܵܐ ܕܦܵܪܲܚ ܒܐܝܼܡܵܡܵܐ܀ ܘܡ̣ܢ ܡܸܠܬ݂ܵܐ ܕܲܡܗܲܠܟ݂ܵܐ ܒܚܸܫܘܿܟ݂ܵܐ܀ ܘܡ̣ܢ ܪܘܼܚܵܐ ܕܫܵܝܕܵܐ ܒܛܲܗܪܵܐ܀ ܢܸܦܠܘܼܢ ܡ̣ܢ ܣܸܛܪܵܟ݂ ܐܲܠܦܹ̈ܐ܀ ܘܪܸ̈ܒ݁ܘܵܬ݂ܵܐ ܡ̣ܢ ܝܲܡܝܼܢܵـܟ݂܀ ܘܲܠܘܵܬ݂ܵܟ݂ ܠܵܐ ܢܸܬ݂ܩܲܪܒ݂ܘܿܢ܀ ܐܸܠܵܐ ܒܥܲܝܢܲܝ̈ـܟ ܒܲܠܚܘܿܕ݂ ܬܸܚܙܸܐ܀ ܒܦܘܼܪܥܵܢܗܘܿܢ ܕܪ̈ܲܫܝܼܥܹܐ ܬܸܚܙܸܐ܀ ܡܸܛܠ ܕܐܲܢ݇ܬ݁ܘܼ ܡܵܪܝܵܐ ܬܘܼܟ݂ܠܵܢܝ܀ ܕܒܲܡܪܵܘܡܵܐ ܣܵܡܬ݁ ܡܲܥܡ̱ܪܵܟ݂܀ ܠܵܐ ܬܸܩܪܘܿܒ݂ ܠܵـܟ݂ ܒܝܼܫܬܵܐ܀ ܘܲܡܚܘܿܬ݂ܵܐ ܠܵܐ ܬܸܬ݂ܩܲܪܲܒ݂ ܠܡܲܫܟ݁ܢܵـܟ݂܀ ܡܸܛܠ ܕܲܠܡܲܠܲܐܟ݂ܵـܘ̈ܗܝ ܢܦܲـܩܸܕ݂ ܥܠܲܝܟ܀ ܕܲܢܢܲܛܪܘܼܢܵܟ݂ ܒܟ݂ܠܗܹܝܢ ܐܘܼܪ̈ܚܵܬ݂ܵܟ݂܀ ܘܥܲܠ ܕܪ̈ܵܥܲܝܗܘܿܢ ܢܸܫܩܠܘܼܢܵـܟ݂܀ ܕܠܵܐ ܬܸܬ݁ܩܸܠ ܒܪܸܓ݂ܠܵܟ݂܀ ܥܲܠ ܓܵܪܣܵܐ ܘܥܲܠ ܚܲܪܡܵܢܵܐ ܬܸܕ݂ܪܘܿܟ݂܀ ܘܲܬ݁ܕ݂ܘܼܫ ܐܲܪܝܵܐ ܘܬܲܢܝܼܢܵܐ܀ ܡܸܛܠ ܕܠܝܼ ܒܥܵܐ ܐܹܦܲܨܹܝܘܗܝ ܘܐܹܥܲܫܢܝܼܘܗܝ܀ ܡܸܛܠ ܕܝܼܕܲܥ ܫܹܡܝ ܢܸܩܪܹܝܢܝ ܘܐܸܥܢܸܝܘܗܝ܀ ܥܲܡܹܗ ܐ݇ܢܵܐ ܒܐܘܼܠܨܵܢܵܐ܀ ܐܹܥܲܫܢܝܼܘܗܝ ܘܐܹܝܲܩܪܝܼܘܗܝ܀ ܢܘܼܓ݂ܪܵܐ ܕܝܵܘܡܵܬ݂ܵܐ ܐܹܣܲܒ݁ܥܝܼܘܗܝ ܘܐܹܚܵܘܹܝܘܗܝ ܦܘܼܪܩܵܢܝ܀ ܫܘܼܒ݂ܚܵܐ ܠܐܲܒ݂ܵܐ ܘܠܲܒ݂ܪܵܐ ܘܲܠܪܘܼܚܵܐ ܕܩܘܼܕ݂ܫܵܐ܀ ܡ̣ܢ ܥܵܠܲܡ ܘܲܥܕ݂ܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ܀ ܘܥܵܛܦܝܼܢ: ܝܵܬܹܒ݂ ܒܣܸܬܵܪܹܗ ܕܲܡܪܲܝܡܵܐ. ܫܒ݂ܝܼܚ ܬܘܼܟ݂ܠܵܢܵـܟ݂ ܡܫܝܼܚܵܐ ܦܵܪܘܿܩܲܢ.

ܘܐܵܡܲܪ ܡܫܲܡܫܵܢܵܐ: ܢܨܲܠܹܐ ܫܠܵܡܵܐ ܥܲܡܲܢ